Read Kahua JOBE 12 Bible Online

JOBE 12 - Kahua bible

JOBE 12

¹O Jobe ki arami, ki vi:

²“O igamu ma ka na mane mu tako mataha. Matena mu meme, na takoha mataha ki page magahuru henigamu!

³Ma inê kê nahunia nogaku na bêku manga igamu. Inê kê pe abubu tenigamu. Na enoni hato ka bani giraragi na marâ mu bani visigi.

⁴Naka ma na tamaku koro ngaira ka rurusiê nogata, suria gê hagatea God, vi tanu hega kani katoê vikana. Henaka inê kê matarotaro ma kê pe tasi rârâ, ngaira ka rurusiê.

⁵Igamu kamu oga igê na ramana ma ki hega mu rurusiê. Igamu kamu tahuruê inê na mane gê sugi votavota.

⁶Na manero ka vagevagesia na ramana. Na ani ga haritohea God ka asitatara. I bâ manga vi God ki oga i ruguhata.

⁷Mu hagatera na puruka. Ngaira ka girara ga hagesurigamu. Mu hagatera na manu. Ngaira ka girara ga hagamataha obami.

⁸Mu hagatera na marâ ga angoango i ano. Ngaira ka girara ga hagarari tangagamu. Mu hagatera na ega i asi. Ngaira ka girara ga mavesigi na obami.

⁹Ngaira hato ka girara, vi na Araha ki hagavorara.

¹⁰God nga kani hagamaurira na ara ni marâ. Na mêrihata hato ka oga i na ababa ni rimana.

¹¹I hega na karingana na enoni ki hagakitagi vari na tamasinga manga na meana na enoni i namigi anaki na ngêra?

¹²Na bani nuni ka takotako mataha. Ma God nogana ki tako mataha ma ki raramohaga hunia nikâ.

¹³Na bani nuni ka mataha na obata ma God nogana ki mataha na obana.

¹⁴Na marâ God i ruhuruhua ti ki girara vi tagarahia aporo? Ti ki girara vi rupasia na enoni God i purusia i ruma ni hagaitangiha?

¹⁵Manga God ma ke pe hagarangi, na arito ru ke katoa na mako ke avagavaga. Manga God ma ke hagarangi bâraha, na maganuha ke berasia na mako.

¹⁶God ki raramohaga hunia ma ki tehateha tare. Na ani ga hagamamasiaga na enoni ma na ani ga mamasiaga, ngaira hato ka oga i ruguhana God.

¹⁷Ngaia ki hagamagahurugi na takoha mataha tenira na enoni raha. Ngaia ki katora na mane ni hagaotonga ka vora bekabekaga.

¹⁸Ngaia ki kasira vato na maneraha ma ki rakura.

¹⁹Ngaia ki hagamarehara na mane ni hagarahenga. Ngaia ki hagamagahurugi na raramohata na enoni raha.

²⁰Ngaia ki hagamunira na mane ni hagaotonga. Ngaia ki hagamarehagi na takoha mataha iata na bani nuni.

²¹Ngaia ki hagamakira na ani ga nahuni ramoha ma ki hatungigi râ na raramohata.

²²Ngaia ki mavesigi na agua ni mengo. Na agua ni roto hono ka mave.

²³Ngaia ki hagaramonigi na marê ma ki henahuraugi na marê getigi ma hemuri ki teharira ma ki mutera.

²⁴Ngaia ki katora na maneraha ka bekabekaga ma ki katora ka tarupe ma ka tugupu rârâ.

²⁵Ngaira ka arâ tatagara igê na roto hono ma ka tariahehu mangara na enoni i ruguhira na tonoha.