Read Kahua JOBE 13 Bible Online

JOBE 13 - Kahua bible

JOBE 13

¹Na ara ni marâ hato mu visigi, inê kê bani bâsigi re maaku. Inê kê bani rongogi re karingaku. Inê kê aitangisigi ngavê.

²Inê kê giraragi nogaku manga igamu. Inê kê pe abubu tenigamu.

³Inê kê obania vigê metamasi God, mareha vi igamu. Inê kê obania vigê roherohe pusiê mareku i maana.

⁴Ma igamu, suria igamu kamu hite, tahema igamu hagaparu, hanana vi siana ka giraragamu, vigamu hite. Igamu kamu mangara na mane mangata i bara tangara vige rikia na enoni.

⁵Mu muni, hanana ta na enoni vari ki takusia, vi igamu kamu tako mataha.

⁶Mu karinga, matena gê roherohe pusiê mareku. Mu karinga maninga.

⁷Tanu hega kanimu hagaparu? Mu takusia vari, vi na hagaparunga iami ka pane henia God?

⁸I hega, igamu kamu uhungia vari, vigamu roherohe pusia ngaia? I hega, mu takusia vari, vigamu panepane henia igê na tamasinga?

⁹Manga vi God ma ke haharirigamu, i hega, ngaia ki pe bani aitangisigamu? Mu takusia vari, vi igamu kamu girara mu hagabekasia God manga mu hagabekasira nenuni?

¹⁰Ngaia ki page ramonigamu, suria mu hagatoraiê matena mu panepane henia.

¹¹I hega, igamu kamu pe hagahigasia God? I hega, na raramohana ki pe hagamagusigamu vari?

¹²Na tamasinga iami ka arârâ ma ma ka pe tonga hunani. Ngaigi ki mangagi ma na momo ma na rahu.

¹³Mu muni! Taraku be tamasi! Naka ma na ta!

¹⁴Hoi, be uhungia ma. Manga gê me, gê me!

¹⁵Manga vi God ma ki obania vi hagamesiê, i koro ma, suria inê kê pe tako togo rârâ. Henaka, ma inê kê roherohe pusiê mareku i maana.

¹⁶Manga gê pe magu vi ve tamasi, vari na tarana ngekana ki page hagatahiê, suria na enoni era ki magu vige mehesuasua God.

¹⁷Hoi, mu karingagi na tamasinga iaku. Mu karingagi maninga.

¹⁸Inê be ramatenia na apanena iaku, suria inê kê girara, vi na apanena iaku ki na monariha.

¹⁹God, manga igo ma ko tehariê igê na tamasinga, hoi, inê kê page munimuni so ma kê naasia ma na mera.

²⁰Be nungirerua tenigo na marâ gi rua ma ko aganarirerua nga, hanana siana kê ahehi panigo.

²¹Siana ko ama ni hagaitangiê nga ma siana ko hagamagusiê.

²²Hoi, God, gu tamasi hagenago igo ma inê kê page aramigo. Se gê tamasi hagenago inê ma igo ko page aramiê.

²³Visigi me na tasi iaku! Gi hita? Na ta kê erasigi? Na tarani ta kanigo visiê, vigê aharê igê?

²⁴Renia ta gu usiteniê ma ko katoê manga vi inê na merongamu?

²⁵I hega, go uhungia vari vigo hagamagusiê? Na ahana rê ma kani inê. Igo ko taharia ma na go i maria. Tanu hega go tarigeniê?

²⁶Igo ko visiê, vigê bagatauhaku raha ngavê. Ma ki tanu hega go visigi nikâ na bani tauhaku matena gê sisite?

²⁷Vikana igo ko hagarohagi na êgaku igê na mavorona na apinige. Igo ko mamasuriê tare igê na ara ni marâ. Igo ko harisuriê i na ara ni agua.

²⁸Ma inê kê manga na apinige i makahukahu, manga na gahu i anega.