Read Kahua JOBE 14 Bible Online

JOBE 14 - Kahua bible

JOBE 14

¹Igami ka na enoni. Na gete kani aparagami. Na mêriha iamami ki abubu, ma na mamasiaganiha ki aharêsia ngavê.

²Igami kami mangagi na mahe, ga ahaketa ma ka hatani maugu. Igami kami magahuru mangagi na mamarugata na manu ga gaha ka riri.

³God inê kê manga ngekana. Ma igo ko bore rapurapu reniê. Igo ko toreê igê na tamasinga ma ko suriê!

⁴Na enoni ki erataga ngavê. Ma ki manga i he na marâ koro ka girara viga arâ me tenia? I bara vê.

⁵God, igo ko bani naka hagenago na matena i hatohato igê na ogaha iana na enoni, na hageha i page mauri surigi. Igo ko bani naka na matena ki tâ ma na enoni ki asa vige page hagate renia.

⁶Gu sira getego tenia. Ku naka vê marena, hanana ge vagevagesia na ogaha iana, naka ma na ogaha ki higa tanga.

⁷Na apinige ga bani tapia, ngaia ki girara ma, i papêhu ma ki mauri aporo.

⁸Naka ma ga êvariga na vagani ma na barêrigana ki meme i rarona na mako, ma ki manga vi tarahua na ve,

⁹ngaia ki page babâgora ma ki hisihisi manga na apinige haoru.

¹⁰Ma ki manga na enoni ma ki meme, ngaia ki hato tanga. Matena i meme hunu, i he kani gâga igê?

¹¹Tagenana manga na arito i hagamamatarigi na rano ma na ve, ka voravora re na marave,

¹²na enoni nikâ ka me ka tâtâ ma ki asa vige aharaga aporo nikâ. Ngaira ka me ka mamaro ma ki asa iata vige page rite mataro me na hagahatongina na vavearo.

¹³Gu pinihiê noga igê na agua iata na enoni ga bani me. Gu nakê be oga pinihi tenia na mangariaganiha iamu, ma hemuri ka takusiê aporo igê na matena go bani naka.

¹⁴Manga na enoni ma ki meme, ki hega, ngaia ki girara vi mauri aporo? Ma inê kê naasia na matena ge koro râ nga. Inê kê naasia na matena i hatohato igê na mamasiaganiha.

¹⁵I ngekana igo ko page uniê ma inê kê page aramigo. I ngekana igo ko page obania, vigo basiê nikâ igê inê go hagavorê.

¹⁶Igo ko page harisurigi na tauhaku nikâ ma ki hato vigu tomanigi na tasi iaku.

¹⁷Igo ko page nakagi igê na anga. Igo ko page bonotenigi ma ko page ahunigi râ.

¹⁸I page arâ me na matena ga guguru igê na hungani, ma ka maopa igê na tarihu.

¹⁹Na ve ka page paparigi na hê. Na rangi raha ki page bagoregi na mako. Vikana nga hanana go katora na enoni ga bagahagêguri.

²⁰Igo ko ranguia na enoni ma ko hagamagahurua ngavê. Na maana ki ahiohio matena i meme.

²¹O karena ki rongo raha na atata ma ngaia ki pe hagare. Ngaia ki pe girarara nikâ matena ga votavota.

²²Ngaia ki hatamia so ma na mamasiaganiha igê na apena marena ma ki takia so ma marena.”