Read Kahua JOBE 15 Bible Online

JOBE 15 - Kahua bible

JOBE 15

¹O Elipasi ki tamasi ki vi:

²“Jobe, go tako bekabeka. Na guruni ma na tamasinga ka na tamasinga iamu.

³Na enoni i tako mataha ki asa vige tamasi manga igo, se vige roherohe pusia marena renigi na tamasinga ga pe tonga na hunani.

⁴Manga na enoni ma ka arâ suria na takoha iamu, i asa ta na enoni vige rahesia God se vige hagarahasia.

⁵Na tamasinga iamu ka hagatanga monari, renia vi igo ko erataga. Igo ko tora pusigo maremu renigi na guruni na tamasinga iamu.

⁶Na haramu maremu kani surigo. Inê ki mareha.

⁷Go takusia vari, vi igo kanigo hagenago ko vora renira na enoni? I hega, igo ko bani oga me vari, matena God ki mamênga vige hagavoragi na hungani?

⁸I hega, igo ko bani rongogi vari na katoha iana God? I hega, igo ma kanigo nahunia na takoha mataha?

⁹Na ta kanigo girara igo ma igami ki mareha? Na ta kanigo aitangisia igo ma igami ki mareha?

¹⁰Na bani nuni i nago tarana i vora o vaemamu ngaira kaniga hagatarêngenigi na takoha mataha tangagami.

¹¹God ki uhungia vi haganaku parongamu. Ma ki tanu hega go usi? Igami nga kanimi haganaku parongamu urusia God.

¹²Tanu hega go mangariaga tangagami? Tanu hega go bâ ni mangariaganiha tangagami?

¹³Igo ko mangariaga tanga God. Tahema go tamasi erasia.

¹⁴I hega, na enoni ki girara vari i matarotaro ngavê? I hega na enoni ki girara vari, i matarotaro i maana God?

¹⁵Bâ, God ki pe tako togo renira nikâ na angero iana, suria ngaira ka pe matarotaro i maana.

¹⁶Vikana, tangara na enoni, ngaia ki kitenira ngavê. Na enoni ki totono marave renigi na eraha. Monari, na enoni ki erataga ngavê.

¹⁷Hoita Jobe, gu karingê maninga. Be visia tangago na marâ gê girara.

¹⁸Na enoni ga tako mataha ka hagesuriê renigi na monariha, ga toregi tenira na êvarita ma ka pe pinihigi.

¹⁹Igê na matena iata na êvarita ki mareha rârâ na enoni mahuara vige oga igê na apanena iata. I mareha rârâ ta na enoni vige hagaharora tenia God.

²⁰Na enoni erataga, i hagamamasiagara na enoni getera, ngaia ki page mamasiaga ngavê igê na ogaha hagenani iana.

²¹Igê na ara ni agua ngaia ki rongogi tare igê na marâ ni hagamakukuha. Na manero ka taharia igê na matena i takusia vi ngaia ki asitatara.

²²Ngaia ki bara ngavê tanga vige gava tenia na mera. Ngaia ki bani girara vi na tatapa borahu ki nanê, hanana vi nahuia ki meme.

²³Ngaia ki magutenira na ahetaronga ga bani nanê, hanana viga ngaua na gahuana.

²⁴Ngaia ki bani girara, vi na mera ki gamorahia, manga na maneraha i raramohaga i nanê tanga i taharia.

²⁵Na tarana vikana ki tarahua, suria i hagaramo tanga God raramohaga hunia ma ki nungia vi meheariha.

²⁶Ngaia ki ura nunuhia God. Ngaia ki ngahingahi renia na bêata raha.

²⁷Ngaia ki monea na apena renia na oile ma ki pupuni na maana ma ki paroparo.

²⁸Ngaia ki page ogasigi na hinua ga aruhuruhu ma na ruma ga ahogehoge. Na avanuni ka bani gavatenigi.

²⁹Na ruruguha iana ki asa vige oga tare. Na nahuninga iana ka page hato. Ngaia ki page magahuru ma ki asa iana vige page tahi.

³⁰Ngaia ki maratorana na apinige ga sungigi na arani ma na roga ki ahegenigi vê na takani.

³¹Ngaia ki beka, suria i hagêguria na eraha. Ngaia ki page takotako hemuri, suria na eraha ki tarahua.

³²I mamênga na matena iana ma ngaia ki bani meme, manga na arana na apinige i asa vige mamêriga aporo.

³³Ngaia ki manga na apinige na vaini i mabomebome na guani se manga na apinige ni olive i takataka nunu.

³⁴Ki page marehasira na raraha na enoni ga murisigea God. Na gi ki page ngaugi na ruma iata na enoni ga vatevate.

³⁵Ngaira ka akê me tare henigi na eraha ma ka gâga sutaga tare. Na hagaparunga ka aharêsira tare.”