Read Kahua JOBE 16 Bible Online

JOBE 16 - Kahua bible

JOBE 16

¹O Jobe ki arami, ki vi:

²“Na tamasinga vigana inê kê bani rongogi me hagarako i nago. Igamu kamu vi, vigamu haganaku parongaku ma kamu hagamamasiagagê ma.

³Mu tamasi taraha? Tanu hega kanimu obania vigamu hagahato tamasinga manga igamu?

⁴Manga vi igia ma ke heurusige, inê be girara ve tamasi manga igamu ma be girara ve hagaigagamu be karikarige bê, ma be hagatunumigamu renigi na tamasinga iaku,

⁵ma be hagaramonigamu ma be hagaotogamu renigi na tamasinga iaku, ma be ama ni tamasi nga, hanana ve haganaku parongami.

⁶Ma henaka gê tamasi, ma na mamasiaganiha ki pe vatovato. Henaka ve muni, ma ke tagenana ma.

⁷God kani katoa ki higa tangê. Inê kê so renia. Ngaia ki naka na ahemata hagenani iaku ki me.

⁸Ngaia ki ranguiê ma ki merongasiê. Inê na suriku purua ma. Tahema na enoni ka vi, vi inê kê tasi.

⁹God ki hagaerasiê ngavê igê na mangariaganiha iana. Ngaia ki kurukuru rivo ma ki bore rapurapu reniê.

¹⁰Na enoni ka rabahiê. Ngaira ka aruruhiê ma ka hitabariê.

¹¹God ki tagareniê tangara na enoni era. God ki nakê i rimata na enoni ga oga sutaga.

¹²Inê kê oga igê na marepeha ma God ki hagakangiê. Ngaia ki herekonokonoê ma ki arihateniê so i ano. Inê kê vora re na pupusikare iana.

¹³Ngaia ki hanahanasiê. Na mage ka hekumukumuhi igê na apaneku. Henaka ma ngaia ki pe takiê. Na êsusuku ki gogo so i ano.

¹⁴Ngaia ki ama ni hagamamariê nga. Ngaia ki tanguhiê ma ki okeê manga na mane ni me i merongasiê ngavê.

¹⁵Inê kê gegege ma kê hagesuru kakaga. Inê kê oga ruruhi igê na roro.

¹⁶Na maaku ki memera suria gê angi. Na maaku karu mamanu ma karu pungu.

¹⁷Ma inê ki mareha ngavê vi ve bagamangamangariaga rârâ. Na nunginungiha iaku tanga God ki matarotaro.

¹⁸Na mako, siana ko ahunia na gapuku, hanana i ama ni avaravara nga tanga na otoha.

¹⁹God ki page panepane heniê ma ki page roherohe pusiê.

²⁰Na tamaku koro ka meêmarabe. Tahema inê kê angi kê avarasia God.

²¹Inê kê obania ta na enoni ke rohe pusiê i maana God, manga na enoni i roherohe pusia na tamana koro.

²²Na harisi iaku ka hato noga. Inê kê râ suria na tara, i asa vi ve page rugu aporo me nikâ.