Read Kahua JOBE 18 Bible Online

JOBE 18 - Kahua bible

JOBE 18

¹O Bilitata ki tamasi, ki vi:

²“Jobe, go tamasi taraha? Gu muni. Kami tamasi igami.

³Tanu hega go visigami, vi igami kami bekabekaga mangara na puruka se na bo?

⁴Na mangariaganiha iamu ki erasigo maremu ma. Go takusia vari, vi na maveta ki page bâbâ riariaga, suria vi igo ko mangariaga? Go takusia vari, vi God ki page gurugi râ na hungani, hanana vi hagakoro obamu?

⁵Mareha. Ga page hunia na laiti iana na enoni era. Na ârârana i mavesia, ki asa vige page mave aporo nikâ.

⁶Na laiti i ruma iana ki page meme ma na ruma iana ki page rotoroto.

⁷I nago ngaia ki arâ gatagata, ma i ngekê ngaia ki tariahehu ma ki votavota surigi na takotako iana marena.

⁸Ngaia ki tu igê na basu. Na êgana ka tu igê.

⁹Ngaia ki vota igê na suta ma na sutani ka hekumuri i êgana.

¹⁰Na etu ki oga pinihi i tara. Na suta ka oparia karia.

¹¹Na maguha ki angaria ngavê i na ara ni agua i arâ igê.

¹²I nago ngaia ki ruruguha ma i ngekê ngaia ki magê. Na eraha ka oga karia. Na bagabevoani ka oga naasia.

¹³Na mera ki gahuia na apena ma ki katogi na apeni rimana ma na êgana ki kakaga.

¹⁴Ga bahenia hura tenia na ruma i asitatara igê, ma ka okerataratagenia râ tanga o Mera.

¹⁵Ga maningaia na ruma iana renia na marâ i girara i rêrapusia na mera, hanana na enoni ka girara ga ogasia.

¹⁶Ngaia ki manga na apinige i meme noga. Na vagani ma na arani ka maria.

¹⁷Na enoni i na agua ka tako hagamareha na atana. Ngaira hato ka bonotenia.

¹⁸Ga page paia hura tenia na maveta, tenia na marara tanga na mengo.

¹⁹Ga mareha rârâ na raraha iana, ma ki mareha tani vige takusia mênga na atana.

²⁰Ngaira hato tenia i kerekê mataro me i kereso ka rongogi na eraha ga tarahua. Ngaira ka tata ma ka bubununuga.

²¹Nga hanana ga katora nenoni era ngegana, na enoni ga pe botage renia God.”