Read Kahua JOBE 19 Bible Online

JOBE 19 - Kahua bible

JOBE 19

¹O Jobe ki arami, ki vi:

²“Mu tamasi erasiê taraha? Mu tamasi hagamamasiagê taraha?

³Tarema igamu kamu rabahiê. Mu pe maki vari, suria mu guhariê?

⁴Manga inê ma be tasi, ngaia kani tangê so ma inê, mareha vi igamu.

⁵Mu vi vari, vi igamu kamu koro tehariê inê! Ma kamu vi, vi na mamasiaganiha ga tarahuê ka hagatanga monari reniê, vigê tasi.

⁶Ma be vi tangagamu. Ngaia nga God kani kato vigana Ma ka mareha vige oto. Ngaia ki naka na etu tangê.

⁷Inê kê ngere kê vi, ‘I pe oto.’ Ma ki mareha rârâ tani vige tongesuriê. Inê kê obania na otoha, ma ki mareha rârâ tani vige botage renia.

⁸God ki hagapepe ma ki hagabarasiê. Na mengo ki tâ pusia na tara iaku.

⁹Ngaia ki hagamagahurugi na ruruguha hato iaku ma ki erasia na ataku.

¹⁰Ngaia ki hitariê. Inê kê hato! Ngaia ki piria na raronitogoha iaku henigi na vagani ma ki nakê so kê mêgu ma kê me manga na apinige.

¹¹Na mangariaganiha iana God ki pe tê barebare reniê. Ngaia ki merongasiê ngavê manga vi inê ka na merongana.

¹²Na mane ni me hato iana ka tahariê. Ngaira ka ramo ma ka oga rihia na ruma iaku.

¹³God ki katora na goaku ka rumakaka reniê. Na ani ga girarê, ka kahu hiteniê.

¹⁴Na ahemata iaku ka kasi reniê. Na tamaku koro ka katoê manga vi na mahuara kani inê.

¹⁵Na ani ga meêbêrihu ka pe kahu tako reniê. Na gete vurivuri iaku ka katoê manga vi na mahuara kani inê, ga pe bâgirarê.

¹⁶Matena gê unia me na enoni tagara iaku, ngaia ki asa vige arami, henaka ve avarasia ke tamaniê.

¹⁷Kaniaku ki makimaki teniê, suria i sigini era na manavaso iaku. Ma o vesiku ka vi, vi inê kê mapu ma ka susu pane teniê.

¹⁸Na kere kare ka kiteniê ma ka rurusiê matena ga bâsiê.

¹⁹Na tamaku koro ka arâ hariri teniê. Na enoni gê takuira ka merongasiê.

²⁰Inê ki na suriku ma. Na suriku ka rikihura manga na rivoku.

²¹Mareha vi na tamaku koro kanigamu? I hega kanimu pe takiê? God ki hagamamasiagê.

²²Tanu hega kanimu merongasiê manga God? Mu hagamamasiagê taraha?

²³I hega kaniga pe bani segegi so na tamasinga iaku igê na buka, hanana ge takusigi mênga?

²⁴I hega kaniga pe bani karugi so na tamasinga iaku igê na hê, hanana ge oga hagahu igê?

²⁵Ma inê kê girara nga, vi God ki page panepane heniê ma ki page roherohe pusiê igê na tamasinga, hanana i ototo aporo na apanena iaku ikê i maveta.

²⁶Naka ma na mera ki ngêgi hato na hasigoku, inê kê page bâsia God, matena gê mauri mênga.

²⁷Inê kê page bâsia renigi na maaku mareku. Ngaia ki pe bâ mamahuara tangê, suria i pane heniê. Inê ki so na ramoha, matena mu vi,

²⁸‘Manga i he kaniga hagamamasiaga apena? Na tarana ta kaniga hagatoraia renia?’

²⁹Mu bâsigamu! Mu pe magutenia na tatapa borahu iana God? Ngaia vari ki page hagaitangigamu meni na bagatauhami. Vikana igamu kamu kahu tahetara, vi ngaia nga God kani surira na enoni.”