Read Kahua JOBE 2 Bible Online

JOBE 2 - Kahua bible

JOBE 2

¹Matena i râ me na tangiana tangara na angero, hanana viga arâ me nikâ i pasina na Araha, Satana ki oga nikâ i berarogata.

²Na Araha ki hagatea, ki vi: “I he go arâ igê?” Satana ki arami, ki vi: “Inê kê barebare kê atani arârâ ma i maveta.”

³Na Araha ki hagate, ki vi: “I hega, igo ko bâsia vari o Jobe na kariaku? I mareha rârâ ta na enoni i maveta, vige totosuriê ma ke koro manga ngaia. Ngaia ki rahesiê ma ki hagatogo suria marena, hanana siana ki tasitasi. Igo ko nungiê, kê hagamarumungenigo ko erasia purua ma. Inê kê aganarigo. Ma ku bâ, o Jobe ki ama ni totosuriê nga manga bani hanana.”

⁴Satana ki arami, ki vi: “Na enoni i gunahia na tahingana, ngaia ki kasigi râ na ara ni marâ hato iana.

⁵Hoita, manga gu katoa ke ape era, e, vikê ngaia ke tê erasigo ngavê i maamu.”

⁶Hoi, na Araha ki vi tanga Satana, ki vi: “Hoita, igo ma! Gu katoa vikana ma siana ki meme.”

⁷Satana ki râ pania i pasina na Araha ma ki hagagaroa na apena hagenani o Jobe.

⁸O Jobe ki râ i bêni roro ma ki oga igê. Ngaia ki garusigi na garuna renia na apapagana na apira na hê.

⁹Kaniana ki vi tanga, ki vi: “I hega, go totosuria mênga God, iê? Tanu hega kanigo pe tê erasia God ma ku kahu meme?”

¹⁰O Jobe ki arami, ki vi: “Go tamasi beka! Matena God ki vategia ta na marâ koro, igia ka vagevagesia. Tanu hega kaniga hagagege renia, matena i nakagi na mamasiaganiha ka tarahugia?” Henaka ga raha na mamasiaganiha, ma o Jobe ki pe torahuria rârâ God.

¹¹Na vera oru na hitangita na kariana koro o Jobe ka no Elipasi ni hinua i Temana, o Bilitata ni Suaga ma o Sopare ni Naama. Matena ga rongoa na mamasiaganiha iana o Jobe, ngaira ka râ, hanana viga haganaku parongana.

¹²Matena ga hagatê me mêngara, ngaira ka bâsia râ o Jobe ma ka pe bâgirara. Matena ga kahu bâ hagagara renia, ngaira ka haganega ka angi raha, ka tarisigi na tuguni iata, suria i rugu na obata, ma ka kuhuigi na bêta renigi na momo.

¹³Hemuri ngaira ka oga hatara so i ano henia surigi na tangiani ma na bungiani gi pi. Ngaira ka pe tamasi rârâ, suria ga bâsia i mamasiaga bâraha ngavê.