Read Kahua JOBE 20 Bible Online

JOBE 20 - Kahua bible

JOBE 20

¹O Sopare ki tamasi, ki vi:

²“Jobe, igo ko hagamangariê ma ko hagaera obaku. Gê pe vi hega. Inê kê aramigo râ nga.

³Na tamasinga iamu ki erasiê ma inê kê girara ma gê aramigo.

⁴Igo ko bani girara vi haganega me tenia i kerevê noga matena na enoni ka vora moramora ikê i maveta,

⁵na enoni era ki tehateha suria na matena abubu ma ma na vagevageha iana ki asa vige arihu.

⁶Henaka ngaia ke raha ke têa akê na vavearo, ma na bêna ke surungigi akê na vaha,

⁷ma ngaia ki page magahuru râ mangagi na momo i ahegenigi râ na roga. Na enoni ga bani girara ka page hagate, vi, ‘I he ngaia?

⁸Ngaia ki page magahuru manga na maruteha, manga na maruteha era igê na bungiana ma ki asa vige page bâsia nikâ.

⁹Ngaia ki page magahuru tenia i pasina. Na ruma iana ka page bâbâ tatara renia.

¹⁰O karena ka page hagapurusigi tangara na enoni matareha na marâ i hanagogi tenira.

¹¹Henaka na apena ki ramoramo manga na apena na mane na gapu haoru, ki page arihu ma ngaia ki tâtâ hurihuri so i ano. Na raramohana ki anu râ.

¹²Na eraha ki mamaki ngavê tanga. Ngaia ki kumikumia i harana, hanana i hatamia na mamakihana.

¹³Ngaia ki kumikumia ma, ma ki pe unumia hanana ge rono i meana.

¹⁴Ma ki mahe igê na bahurina manga na tavona na rivona na ma.

¹⁵Na enoni era ki momoatenigi na ruruguha i hanagogi. God ki toregi aporo, henaka tenia na bahurina.

¹⁶Na eraha na enoni era i unumia ki manga na tavona na rivona na ma, i girara i hagamesia na enoni.

¹⁷Ngaia ki asa vige tahi, hanana ge vagevagesigi na oile ni olive, na miliki ma na pirui, ga nonga ngavê manga na ve.

¹⁸Ngaia ki page hagapurusigi na varahani na tagaraha iana. Ngaia ki asa vige vagevagesigi na ruruguha iana,

¹⁹suria ngaia ki hagamamasiagara na enoni matareha ma ki pe botage renira. Ngaia ki rurugu tenigi na ruma iata ma ki hogegi, ma ki mareha vige tagarahigi aporo.

²⁰Na hagatageha iana ki asa vige togo. Ngaia ki asa vige togo na aitangihana renigi na nahuninga iana.

²¹Ngaia ki ngêngê hagatage, mareha vige hagahitagi rârâ. Tahema na ramana iana ki sugi anu râ tenia.

²²Matena i ruruguha rârâ ki akê ki tariha, ma na bagabevoani ka page tarahua. Na mamasiaganiha ki page higea ngavê ma ki page rumurumugia.

²³Naka vê ke botea. God ki page mangariaga ngavê tanga ma ki page hagaitangia.

²⁴Matena i gunaguna, vi gavagava tenia na tatapa borahu, na epage ki page hanasia.

²⁵Na mage ka page tarasia re na gerina ma ki huhura i obana. Na gapuna ki gogogo hura me igê na maana na mage. Ngaia ki magu ngavê ki meme.

²⁶Na nahuninga hato iana ka makaka. Na gi tenia na vavearo ki ngaugi na ara ni marâ hato iana: ngaia ma ngaira hato i ruma iana.

²⁷Na vavearo ki ranganigi na bagatauhana ma na maveta ki merongasia.

²⁸God ki mangariaga ma ki barua tanga na siva. Na maganuha ni mangariaganiha iana God ki sinogi hato ngavê na nahuninga hato iana.

²⁹Nga hanana ga katora na enoni era ngegana. Nga hanana God i katora nge.”