Read Kahua JOBE 21 Bible Online

JOBE 21 - Kahua bible

JOBE 21

¹O Jobe ki arami, ki vi:

²“Mu karinga maninga. Mu haganaku parongaku. Ngaia kanigamu karingê.

³Mu nakê be tamasi. Matena gê tamasi hato, ma ki manga mu obania vigamu rurusiê, ma kamu kahu rurusiê.

⁴Inê kê pe hagagege renira na enoni. Inê ki oto ma tangê, vigê pe marape.

⁵Bâsiâ me! Ma kamu kahu munimuni ma kamu kahu mamakuku, vigamu bâsiê.

⁶Matena gê takusigi na marâ ga tarahuê, inê kê bagatatako, kê magu ma kê tata.

⁷Tanu hega God ki nakara na enoni era ka gâga? Tanu hega ki nakara ka gâga borahu ma ka gâga igê na ramana?

⁸Ngaira ka nahunira na kareta ma na esita. Ngaira ka bâsira ga raharaha.

⁹Na marapeha ki gâga tare i ruma iata. God ki pe hagamagusira renigi na bagabevoani.

¹⁰Na puruka mane iata ka hanehane bâkoro ma na puruka hehene iata ka agusi bâkoro.

¹¹Na kareta na enoni era ka barebare ma ka rekereke rârâ mangara na kareta na puruka. Ngaira ka mâmâ rârâ mangara na kareta na sipi.

¹²Ngaira ka kiki henigi na gita ma na gogo ma ka migivage na êhihi.

¹³Ngaira ka vagevagesia na marapeha mataro me ka gemêa maninga ma ka kahu meme bâkoro suri parongata.

¹⁴Na enoni era ka vi tanga God, ka vi, ‘Râ vê! Nakagami so maremami! Igami kami pe obanigo, vigu hagesurigami renigi na ramata tanga na ogaha iamami.’

¹⁵Ngaira ka tako, ka vi: ‘Ga têtê viteana God tanga na ta? Ga rahesia God tanga na ta?’

¹⁶Ngaira ka vi ma, vi ngaira ka tavoraha bâkoro ngaira mareta ma ka pe botage renia God.

¹⁷I hega, na enoni era ka oga igê na mengo? I hega, na bagabevoani ka tarahura? I hega, God ki hagaitangira igê na mangariaganiha iana?

¹⁸I hega na roga ki ahegenira râ mangagi na go maria se mangagi na momo i ahegenigi na roga raha?

¹⁹Igamu kamu vi, vi God ki hagaitangia na kare meni na bagatauhana o vaemana. Mareha vikana! God ki hagaitangira nga ngaira hete meni na tasi iata mareta, hanana ngaira ka tahetara, vi i hagaitangira meni na tasi iata.

²⁰I tuguhira vi ngaira mareta nga hete, kaniga hatamia na hagaitangiha tangara so mareta. Ki tuguhira vi ngaira mareta nga hete kaniga hatamia na mangariaganiha iana God raramohaga hunia.

²¹Matena na enoni ki bani me ki hega, ngaia ki takotako renira na karena, hanana viga vagevage se mareha?

²²I hega na enoni ki girara vi hagamataha obana God i surira nogata na angero?

²³Tani na enoni ka apeape koro rârâ mataro me ka meme.

²⁴Ngaira ka vagevagesigi na apekoroha ma na ogaha iata mataro me ka meme suri parongata.

²⁵Ma tani ki marehasira rârâ na vagevageha surigi na ogaha iata hagenani. Ngaira ka obâbaera rârâ ma mataro me ka meme.

²⁶Ma ngaira hato ka tagenata ma. Ngaira hato ka meme ma ka bagira ma ka mamaga.

²⁷Inê kê bani giraragi na takotako iami. Inê kê bani giraragi na aramiha mu page vateê renigi.

²⁸Igamu kamu page hagateê, kamu vivi, ‘I he nga na ruma iana na mane ruruguha? I he kani gâga igê na mane i haritohea God?’

²⁹I hega, mu pe meratamasi na enoni ga arârâ hagatê? I hega, mu pe rongogi vari na rongoha ga migiaporo me?

³⁰Matena God ki mangariaga ma ki hagaitangira na enoni, na enoni era ki tahitahi tare tenia na hagaitangiha.

³¹Ti ki ramonia rârâ na enoni era renigi na bagatauhana? Ti ki hagaitangia meni na bagatauhana?

³²Ngaira ka tugia hete tanga na matahu, tanga na matikuna bâkoro, ga anumasia.

³³Na bera na akêkuha ka râ ka bagia. Na mako nogana ki pe higea.

³⁴Ma igamu, igamu kamu uhungia, vigamu haganaku parongaku, ma kamu tamasi bekabekaga ma hete!”