Read Kahua JOBE 22 Bible Online

JOBE 22 - Kahua bible

JOBE 22

¹O Elipasi ki tamasi, ki vi:

²“Naka ma na enoni i tako mataha ngavê, ngaia ki asa vige tamania God renigi na takoha mataha iana.

³Manga go hagakoro obana God igê na ogaha iamu, ki hega, na tarana ngekana ki tamania God? Manga vi na ogaha iamu ma ki matarotaro i maana God, ki hega, na tarana ngekana ki tamania God?

⁴God ki ramonigo ma ki hagatamasigo, mareha vi suria igo ko hagahigasia,

⁵ma suria hete igo ko tasi ngavê ma ko bagatauhamu.

⁶Igo ko hagaturia na enoni, ki barua aporo na haga iamu. Igo ko toregi na gahu iana na enoni matareha mena na hagaba iana tenigo. Vikana ngaia ki rupaturi.

⁷Na enoni i mamata na riota igo ko pe vatera rârâ na ve ke tono. Na ani ga magê igo ko pe hagangêra.

⁸Suria igo ko raramohaga ma ki rongo raha na atamu, tahema igo ko parênigi na mako iata na enoni hato.

⁹Igo ko hagamamasiagara na gete na nâ ma na kare banogo, ga avarasigo, suria go kasira vê baguru.

¹⁰Vikana ki asa vigu gava ku tahi, suria na etu ka oga rihigo. Ma i ngekê ki nahuigo na maguha.

¹¹Ki rotosigo ngavê. Na ruarua ki anuigo.

¹²I hega, God ki pe oga vari igê na agua i akê teharia na vavearo? I hega, ngaia ki pe bâ bê vato vari renigi na higu, ga oga kerekê noga i vavearo?

¹³Henaka, ma igo ko vi, ‘God, na ta kani girara? Na vaha ka pusia! Ma ki tanu hega kani vi bâsigia ma ki surigia?’

¹⁴Igo ko takusia, vi na vaha puru ka pusia God, hanana vige bâsigia, matena i arârâ igê na pereperegana na vavearo.

¹⁵I hega, igo ko obania, vigo arâ mênga vari suria na tara, ga arâ tare igê na enoni era?

¹⁶Na enoni era ngegana ka me, i mamênga na matena iata. Ngaira ma igo nogamu kamu magahuru igê na maganuha.

¹⁷Ngaira ka kikitenia God, ma ka vivi vi God raramohaga hunia ki asa vi henakara.

¹⁸Ma ti kani katora, ka oga igê na ramana? God nge! Ma ngaira ka pe botage renia.

¹⁹Na enoni ga koro ma ka matarotaro i maana God ka vagevage ma ka ruru, matena ga bâsia na hagaitangiha i tarahura na enoni era.

²⁰Na nahuninga hato iata ka makaka. Na gi ki bani ngaugi hato.

²¹Hoi, Jobe, siana ko katoa God manga vi na merongamu. Gu mehekorokoro. Manga go katokato vikana, ngaia ki page korokoro tangago.

²²Go arâ surigi na hagesuringa iana tangago. Go nakagi so na tamasinga iana igê na aitangihamu.

²³Go tangahurigo ma ko aganaria God. Go hatungigi râ nga na eraha hato ga vora me i ruma iamu.

²⁴Go kasigi râ nga na golo iamu. Na golo taranini iamu ko kasigi râ igê na agua ni marave.

²⁵Vikana igo ko naka God raramohaga hunia ki mangagi na golo ma na siliva iamu ga haripage tangago.

²⁶Ngekana igo ko page takotako togo tare renia God, ma ko page tahetara, vi ngaia ka na hunana na vagevageha iamu.

²⁷Ngaia ki page aganarigi na avarasiha iamu ma igo ko page girara go hagamonarigi na suruha iamu.

²⁸Na tagaraha hato iamu ka page tavoraha bâkoro ma ki page mave na tara go arâ igê.

²⁹God ki kasira so na ani ga paroparo ma ki kasira akê na ani ga haritagi.

³⁰Ngaia ki hagatahira na ani ga matarotaro. Ma ki page hagatahigo igo nogamu, manga vi na ogaha iamu ma ki korokoro i maana.”