Read Kahua JOBE 24 Bible Online

JOBE 24 - Kahua bible

JOBE 24

¹Tanu hega God ki oga purupuru ma ki pe surua na matena ni tamasinga, hanana na enoni ga totosuria ke girara?

²Na enoni ka gurugi na pereperegani na mako, hanana ga nahunigi na agua raha. Ngaira ka hanagora na sipi ma ka kasira henira na anita mareta.

³Ngaira ka hanagora na tonki iata na kare banogo ma ka torea noga na puruka ni tagaraha tenia na gete na nâ, mataro me ki barua aporo na hagaba tenira.

⁴Ngaira ka usi vige vatera na enoni matareha na marâ i oto tangara ngaira na enoni matareha. Vikana ngaira ka katora na enoni i bara tangara ka gava ma ka ahi.

⁵Tahema na enoni matareha ka mangara na tonki vasiga, ga garigari ngêra igê na bagamanihê raha, ma ki bara tangara vige tarahugi igê na ngêra tangara na kareta.

⁶Vikana ngaira ka tagara nga i mu iata na enoni getera meni na kere haga sisite ma, ma ka husigi nga na hunguni na vaini igê na pariki ni vaini iata na enoni ga hagavoro.

⁷Igê na bungiani ngaira ka atani mauru so ma, suria i mareha na aruhata tenia na maratoha.

⁸Ngaira ka managahu renia na rangi igê na hungani. Ngaira ka rêra mamaru igê na tarihani na hê, suria i marehasira na agua, vige rukuruku igê.

⁹Manga na kare ma ka bani meme o vaemata, na enoni era ka torera vê tenira kenata ma ka katora ka voravora re na kare rakuraku iata. Ki manga na mane i matareha ma ki bara tanga vige barua aporo na hagaba tenira na enoni era, ngaira ka torera na karena baruna na hagaba ngekana.

¹⁰Na enoni matareha ka arârâ rupaturi, suria i marehasira na gahu. Ngaira ka magê, matena ga opaopa na harisi igê na mu iata na enoni ruruguha.

¹¹Ngaira ka tagara bâraha tanga na arito igê na pariki ni vaini igê na tarihani na hungani. Ngaira ka rusirusi na guani na vaini. Henaka, ma ngaira ki mamata ngavê na riota.

¹²Surigi na hinua na enoni matareha ka avaravara, suria ga mamari ma ka meme, ma God ki herepusigi na karingana tenira.

¹³Ga oga na eragani nuni ga usitenia na mavetana na tangiana. Ngaira ka pe girara vi manga i he na ogaha igê. Tahema ga makuku tenia.

¹⁴Na mane ni nahunga ninuni ki riterite, matena i raboa na arito, ma ki arâ, hanana i nahuira ka meme na enoni matareha. Igê na bungiana na mane hanago ki arârâ, hanana i hogehoge ruma.

¹⁵Na mane i gamogamo ki naasia i hihite nuni ma ki buhia na maana, hanana vi siana ka bâbâgirara.

¹⁶Igê nga na bungiana na mane hanago ki harihari ruma ma igê nga na tangiana ngaia ki ahehi, suria i usitenia na mavetana na tangiana.

¹⁷Ngaira ka magutenia na mavetana na tangiana ma ka pe magutenia na roto hono igê na bungiana.”

¹⁸O Sopare ki tamasi, ki vi: “Na enoni era ki magahuru manga i torea na maganuha. God ki kuasia na mako iana. Vikana na tagaraha ni pariki ni vaini ki mareha vê igê.

¹⁹Tagenana manga na ve i mamata matena i mahana ma ki arito ru, na enoni tasi ki magahuru tenia na berarogata na enoni i maveta.

²⁰Na enoni hato ka hitenia, naka ma vi kenana nikâ. Ngaia ki mamaga. Ngaia ki manga na apinige i tâ i ano ma ki kakaga.

²¹I manga ngekana, suria ngaia ki hagamamasiagara na gete na nâ ma ki pe koro tangara na gete ga gomara.

²²God raramohaga hunia ki mutera na ani ga nahuni ramoha. Manga God ki akê me, hoi, na enoni erataga ka meme.

²³Vari God ki naka vê na enoni era, hanana na enoni era ki takusia vi asitatara, ma God ki mamasuria tare.

²⁴Na enoni era ki gâga sisite râ ma igê na ramana ma hemuri ki manga na go i maugu se i manga na apena na koni ga bani retegi.

²⁵Ti ki hagaigê? Ti ki girara, vi inê kê pe tamasi monari?”