Read Kahua JOBE 26 Bible Online

JOBE 26 - Kahua bible

JOBE 26

¹O Jobe ki arami, ki vi:

²“Igo ko tamaniê bâraha hete ngao! Igo ko takiê hete ngao, suria gê maeha ma kê pe ramo!

³I koro vê na hagaotonga iamu! Na giraraha go vateê renia ki koro ngavê ngao! Marâ gê beka nge?

⁴Ti ki pasi rongogi? I he kanigo tora igê na takoha mataha ngegana?”

⁵O Bilitata ki tamasi, ki vi: “Igê na ve i ruguhana na maveta na atarota na enoni ga bani me ka tatata i maana God, ma ngaira nogata na ani igê na rutuni na asi.

⁶Na agua iata na enoni ga bani me ki oga tatara i maana God. I mareha rârâ ta na marâ igê vige pinihi tenia.

⁷God ki gasia na vavearo i avorana na bevoa ma ki kuharenia na maveta igê na bevoa.

⁸God ki tigi na roto renigi na ve ma ki mareha vige aputa na rangi.

⁹Ngaia ki katoa ki pe mave na hageha, suria i naka na vaha pusia.

¹⁰Ngaia ki voasia na tangiana tenia na bungiana, suria ngaia ki nakagi na hunani na parêru kere ataha igê na asi.

¹¹Matena God ki ngingigi na una na vavearo, ngaigi ki magu ma ki tatata.

¹²Na raramohana God ki teharia na asi. Suria i mama oto, ngaia ki menamenaria ngavê na ega raha Rahaba.

¹³Na manavaso iana ki uhia na vavearo ki bagora. Na rimana ki nahuia ki me na ega raha vi gavagava.

¹⁴Na tarani ngegana ka hagabângenia, vi na raramohana ki raha teha ngavê. Ngaigi ka na aogani ga rongogi. Ti ki aitangisia, vi manga i he God ki raramohaga hunia ngavê?”