Read Kahua JOBE 27 Bible Online

JOBE 27 - Kahua bible

JOBE 27

¹O Jobe ki tamasi, ki vi:

²“Inê kê tohe renia God mamauri ma raramohaga hunia, i pe vateê na marâ ge oto tangê ma ki katoa ki mahe ma hete na ogaha iaku.

³Inê kê tohe: mataro me kê meme mataro me ki hatohato teniê na rogaroga,

⁴i asa ngavê na hagaparunga vige hura me tenia na haraku, i asa ngavê vi inê be hagaparu.

⁵Inê ki asa ve vi, vi igamu kamu vi monari. Inê kê page ama ni togeaga nga, mataro me kê meme, vi inê kê pe tasi rârâ.

⁶I asa vi ve page tamasi, ke totora getea râ nikâ, vi inê kê matarotaro, suria na aitangihaku ki tatara.

⁷God ke hagaitangira na enoni hato, ga merongasiê ma ka ura pusiê. Ngaia ke hagaitangira mangara na enoni era ga murisigea.

⁸Na ta kaniga naasia na enoni era, na matena God ki hatungigi igê na mêriha iata?

⁹Matena na bagabevoani ka tarahura, ki hega, God ki page aganarigi na avarasiha iata?

¹⁰I ararira hete vige vagevagesia God ma ke avarasia tare.

¹¹Hoi, be ramatenia tangagamu, vi manga i he kani tagara na raramohana God. Be ramatenigi tangagamu na katoha iana God raramohaga hunia.

¹²A, naka vê! Suria igamu kamu vi, vi igamu kamu bani girara. Ma ki manga vigamu bani girara, Ma ki tanu hega kanimu tamasi bekabekaga?”

¹³O Sopare ki tamasi, ki vi: “Hoi, God raramohaga hunia ki hagaitangira na enoni era ga oga sutaga, vikê:

¹⁴O kareta ka page me igê na hearihatana. Na kareta ka page mesi magêha.

¹⁵Na ani ga tahitahi mêngara ka page meme renia na ringa. Henaka, ma na gete iata ga nâ ki asa vige angisira

¹⁶Vari na enoni era ka aharêsira na haga ma ka aharêsira ngavê na gahu.

¹⁷Vikana tanga na ta? Suria na enoni koro ka page gahugahu renigi na gahu ngegana, ma na enoni ga pe hagahagaparu ka page nahunigi na haga ngegana.

¹⁸Na enoni era ka takusigi, vi na ruma iata ka nganganihaga. Ma ngaigi ki manga na robona na rava, se na ruhu iana na mane i bâsuri sipi.

¹⁹Na enoni ruruguha ka tâtâ ka mauru. Ngekana ka na hatongina hanana vige ruruguha nikâ, suria matena ga riterite, ngaira ka têtê tara renigi na ruruguha iata.

²⁰Na maguha ki page hatani nahuira manga na ruarua. Na roga igê na bungiana ki page ahegenira vê.

²¹Na roga tenia i kerekê ki page asirira vê tenigi na ruma iata.

²²God ki page purisira so manga na roga raha ma ki asa vige takira, henaka vi ngaira ka uhungia viga gavagava.

²³Na enoni ka page manavatenira, suria ga vota. Matena ga gavagava, na enoni i pasita ka page ngirira ma ka vonovono ka konekone tenira