Read Kahua JOBE 28 Bible Online

JOBE 28 - Kahua bible

JOBE 28

¹Tagua ka oparigi igê na siliva. Tagua ka hagamatarotarogi igê na golo.

²Tagua ka oparigi igê na aiani i ano. Tagua ka hagaronogi igê na hê tangagi na kapa higa.

³Na enoni ka vato ka bâbâ kereso ngavê i gupuna na ano i roto ngavê. Ngaira ka opaopa ka soso i porona na maveta, hanana ga bâbâ renigi na hê igê na mengo i ngekana.

⁴Na enoni ka opaopa hagaoto bêrere, hagatê vato ngavê tenira na enoni. I ngekana ngaira ka kukuku igê na varo ma ka pupu tarata.

⁵I ano igê na tangitara ka akê igê na ngêra ma i ruguhana vato na gi ramo ki ngêngê papangigi na marâ hato.

⁶I rarona na hê i ngekana ka oga igê na hê marava, i raha teha na meni. Ma i ngekana nikâ ka oga igê na aiani ma na golo.

⁷Na tehe ki bara vige bâsia na tarana i ngekana ma na ahetaronga ki pe girara nogana.

⁸Na laione ma na marâ vasiga vigana ki bara vige râ i tara ngegana.

⁹Ngaira ma na enoni kaniga karukaru rugu igê na hê, henaka vi na parisihê. Ngaira ka aparigi râ na hungani.

¹⁰Matena ga karukaru rugu igê na hê, ngaira ka tarahugi igê na hê i raha na meni.

¹¹Ngaira ka opaopa vato ka hagarangigi na ve, hanana ga toregi hura mave na marâ, ga pinihi i ngekana ma ka raha na meni.

¹²Hoita, i he kaniga girara viga tarahua igê na takoha mataha? Na aitangisiha mora, i he kaniga girara viga tarahua igê?

¹³I mareha rârâ ta na enoni vige girara na tara tanga na takoha mataha. Ngaia ki pe oga i berarogata na enoni.

¹⁴Na rutuni i avoatara ka vi, vi ngaia ki pe oga ikê. Ma na rutuni ni asi ka vi vikana nogata.

¹⁵I asa vige hohoroa renia na siliva se vige vuria renia na golo.

¹⁶Ngaia ki teharigi ngavê na golo taranini ma na hê i raha na meni.

¹⁷Na mena ki raha teharia na golo se na apira na golo, se na haga mora.

¹⁸Na mena na takoha mataha ki raha teharia na haga mora se na hê mera i raha na mena, se na anga i vunu renigi na oruni na egugu.

¹⁹Na mena na takoha mataha ki raha teharia na hê toratorakaga i raha na mena ma teharia na golo taranina.

²⁰Hoita, na takoha mataha ki râ me tenia i he? Na aitangisiha mora ki gâga i he?

²¹I mareha rârâ ta na enoni vige bâsiâ, ma na manu ga gagaha ki mareha nogata.

²²Na mera ma na agua iata na ani ga bani me karu pe hagarea ma karu rongoa ma.

²³God ngaia getea ma ki aitangisia na tara tanga na takoha mataha. Ngaia getea ma ki girara vi i he,

²⁴suria ngaia ki bâsigi na ara ni marâ hato, ki râ ki tariha igê na bogoni na maveta. I mareha rârâ ta na marâ i ruguhana na vavearo vige pinihi tenia.

²⁵Matena God ki naka na ramoha tanga na roga ma ki naka na taritarihana na asi,

²⁶matena God ki nakagi na ramata tanga na rangi ma ki naka na tara tangagi na roto ni marangea,

²⁷hoi, i ngekana nga ngaia ki bâsia na takoha mataha ma ki uhungia vi manga i he. Ngaia ki ahariria maninga ma ki kahu visia vi i koro era.

²⁸God ki vi tangara na enoni, ki vi: “Manga mu obania vigamu nahunia na takoha mataha, hoi, mu hagahigasia na Araha. Manga mu obania vigamu nahunia na aitangisiha mora, hoi, mu susu pane tenia na eraha.”