Read Kahua JOBE 29 Bible Online

JOBE 29 - Kahua bible

JOBE 29

¹O Jobe ki tamasi nikâ, ki vi:

²“Manga vi na ogaha iaku ma ke manga hete i nago, matena God ki anumasiê.

³Igê na matena ngekana, God ki ngahisiê tare. Ngaia ki mavesia na tara tangê, matena gê râ igê na roto hono.

⁴Igê na matena ngekana inê kê oga igê na ramana ma na korohana God ki anumasia na ruma iaku.

⁵Igê na matena ngekana God ki pane heniê ma na kareku hato ka oga heniê.

⁶Na puruka ma na goti iaku ki vunuvunu bâraha na susuta. Na apinige ni olive iaku ka rasirasi, naka ma igê na mako i bêratega ngavê.

⁷Matena gâ arâ igê na maani para ni hinua, inê kê gâga so henira na enoni raha, ga hakuhaku igê na mahera i ngekana.

⁸Na enoni haoru ka sugare taraku, matena ga bâsiê. Na bani nuni ka rêra aharaga, hanana ga hagahigasiê.

⁹Na meraha ka munimuni so noga ma ka hagapêpu.

¹⁰Na ani ga bâsurira na enoni ka haraburu so noga, manga i puru na meata.

¹¹Na enoni ga bani rongoê, ka vi, vi inê kê tamasi bâkoro. Na enoni ga bani girarê, ka tamasi kasikasiê akê.

¹²Matena na enoni matareha ka avarasiê, inê kê tamanira. Inê kê tamanira na kare banogo, i mareha ta na enoni vige marupera.

¹³Na enoni ga oga igê na mamasiaganiha raha, ngaira ka visiê, suria gê tamanira. Inê kê tamanira na gete na nâ ka asitatara.

¹⁴Inê ki oto tare na parongaku. Inê kê katogi tare na tarani ga oto.

¹⁵Inê ka na maata na ani ga guru. Inê ka na êgata na ani ga tavi.

¹⁶Inê kê manga o vaemata na enoni matareha. Inê kê panepane henira na enoni mahuara, matena na enoni getera ka hagamamasiagara.

¹⁷Inê kê hatungia na ramoha iata na manero ma kê hagatahira na enoni tenigi na hagatavatavaniha iata.

¹⁸Inê kê takusia ma vigê mauri arihu ma ki aharêsia na ramana mataro me kê meme i pasiku.

¹⁹I nago inê kê manga na apinige. Na vagani ka so tarahua na ve. Ma igê na bungiana na korupu ka vokasigi na arani.

²⁰Na enoni hato ka kasiê akê tare. Na raramohaku ki asa vige vato.

²¹Na enoni ka karingê maninga, matena gê tamasi. Matena na ani ga hagate tarata i pasiku ka munimuni so ma ka karingê nogata.

²²Matena gê tamasi hato, ngaira ka pe tamasi rârâ, suria na ara ni marâ kê bani tamasigi. Ngaira ka karinga manganga reniê, manga ga manganga na êsusu na rangi.

²³Ngaira ka vagevagesigi na tamasinga iaku, mangara na enoni ga vagevagesia na rangi, i rangisia na mu, matena igê na arito ru.

²⁴Inê kê mamanamui tangara. Vikana inê ki hagaramonira, suria ngaira ka bagahagêguri.

²⁵Inê kê hagabângenia na tara tangara ma kê bêngenira manga na maneraha, i bêngenira na mane ni me iana. Inê kê haganaku parongata, Suria ga rumakaka.