Read Kahua JOBE 30 Bible Online

JOBE 30 - Kahua bible

JOBE 30

¹Ma i ngekê na enoni na voraha haoru ngaira ka meêmarabe. O vaemata nikâ ki pe bani ararira rârâ ta na tagaraha. Ki asa vi ve hagêgurira ke tamanira na o iaku, hanana vige bâbâsurira na sipi.

²Na tagaraha ta be vatera renia? Na rimata ka marumarusiga.

³Ngaira ki memega na apeta, suria ga matareha ma ka magê. Igê na bungiana ngaira ka bâbâ rârâ igê renigi na ngêra igê na bena avagavaga. Igê na bagamanihê raha, igê na hiru i hagagara era ngaira ka ngasingasi igê na ganuni maria na rauga.

⁴Igê na bagamanihê raha ngaira ka tataku igê na ahani na rauga ma ka ngaugi. Ngaira ka ngaugi nikâ na vagani i mahe.

⁵Na enoni ka tarigenira ma ka ngirira, manga ga ngirira na enoni hanago.

⁶Ngaira ka ogasigi na vaba igê na tahataha igê na tarihu ma igê na kiru i ano.

⁷I ngekana ka angiangi igê mangara na tonki ma ka angoango haku i ruguhani na rauga.

⁸Ngaira ka oga sutaga ma ka erataga. Na ogaha iata ka mangara na o. Ngaira ki asa vige maki. Ga paira hura tenia i pasita.

⁹Ma i ngekê ngaira ngegana ka baro ki reniê ka erasiê. Ngaira ka meêmarabe rârâ ma ka tamasi erasiê.

¹⁰Ngaira ka kiteniê ma ka masesi teniê. Ngaira ka vi, vi ngaira ka raha tehariê. Matena ga bâsiê, ngaira ka musuria na maaku.

¹¹Suria God ki hagamagahurua na ramoha iaku ma inê ki memega na apeku ma ki bara tangê, tahema ngaira ka asitatara, hanana ga merongasiê igê na mangariaganiha iata.

¹²Na eragani nuni ngegana ka tahariê ototo me, hanana viga hatungiê râ nga. Ngaira ka katoê kê gava.

¹³Ngaira ka ura pepeê, hanana viga hagamagahuruê ngavê. Ma ki mareha rârâ ta na enoni vige urapusira.

¹⁴Ngaira ka hagareke huriê mangara na me ga teha banu me igê na makuruha na para ni hinua.

¹⁵Na maguha ki aharêsiê ngavê. Na hagahigasiana reniê ki magahuru manga i ahegenia râ na roga. Na ramananiha iaku ki ahe ki râ manga na vaha.

¹⁶I ngekê inê kê sugi meme noga. Na mamasiaganiha iaku ki asa vige hato.

¹⁷Igê na bungiana ka hahara na suriku hato. Na haraniha i nahuiê, ki asa vige page hato.

¹⁸God ki ranguia na tuguni i hunana na rioku ma ki poroa ki rapu na tuguni iaku.

¹⁹Ngaia ki arihateniê so igê na makomako. Na momo ma na rahu kani inê.

²⁰God, inê kê avarasigo ma igo ko pe botage reniê. Inê kê avarasigo ma igo ko pe aganariê.

²¹Igo ko hagamamasiagê ngavê. I asa vigu takiê. Na rimamu raramohaga ki hitariê ngavê.

²²Igo ko manga na maguara i porotageniê ma ki ahegeniê râ. I go ko manga na roga raha i kasikasiê rârâ.

²³Inê kê bani girara, vi igo ko toreê vê tanga vigê meme, tanga na agua ga bani oga igê na enoni me ma ka page hakuhaku igê na enoni hato.

²⁴Tanu hega kanigo ama ni hagamamasiagê nga? Inê kê tê tara renigi na ara ni marâ hato. Na ani gi tage ma na tarana kani oga. Ngaia kanigê avarasigo hanana go takiê.

²⁵I hega, inê kê pe hetaki vari henira na enoni i rugu na obata? I hega, inê kê pe tamanira vari na enoni i bara tangara?

²⁶Inê kê naasia na vagevageha ma ka tarahuê ma hete na bagabevoani. Inê kê naasia na marara Ma ki tarahuê ma hete na mengo.

²⁷Na aitangihaku ki pe oga hahutogo renigi na takoha raha ma na mamasiaganiha. Na mamasiaganiha ki ama ni tarahuê nga igê na mani tangiani.

²⁸Inê kê apeape ruruhi rârâ ma. I mareha rârâ ta na marâ vige haganaku parongaku. Matena ni hakuta inê kê avaravara.

²⁹Na ringeku ki rongo hetaki. Ngaia ki gitagena so ma manga vi inê ka na o se na manu i angiangi so getea.

³⁰Na gavoku ki bâ riariaga. Ki oga so ma na suriku ma ki suhiê na matoroha.

³¹Inê kê tarugigi ma na ki ni hagarugu oba mareha vi ni vagevageha manga i nago. Na êhihi iaku ki kahu râ surigi na ringeni na angiha maramara.