Read Kahua JOBE 31 Bible Online

JOBE 31 - Kahua bible

JOBE 31

¹Inê kê bani tohe, vi inê ki asa be bâbâ tenira na kere gete.

²Na ta igia ka girara ga naasia tenia God raramohaga hunia? Na vuriha ta ki page vategia meni na tauhaka?

³Na enoni ga bagatauhata na bagabevoani ki tarahura. Na enoni ga bagaparongata na perenga ka tarahura.

⁴God ki aitangisigi na tauhaku hato. Ngaia ki giraragi na ara ni tarani hato gê katogi.

⁵Inê kê tohe, vi inê kê pe erasia rârâ ta na enoni se vi ve hagaparua.

⁶God ke hagakitakitê maninga ma ki page tarahua, vi inê kê pe tasi rârâ.

⁷Manga inê ma kê ahoro pania na tara oto se gê arâ surigi na teniha era se ga makoraga na rimaku,

⁸hoi, ge ragegi akê na hasinga i mu haoru iaku se ge ngê i mu iaku.

⁹Manga inê ma kê tenia na gete êragi ma kê ahi karia i metara na ruma iana,

¹⁰hoi, kaniaku ke hagamako ngêra tanga na mane getea ma ke memêru na mane getea.

¹¹Manga gê katokato vikana, inê kê gamogamo ma ka suriê nga kê meme suria na ramata.

¹²Vikê na teniha era ramo ngekana ke manga na anguruna na gi, i ngaugi na nahuninga hato iaku ma ke kasiê so igê na mamasiaganiha.

¹³Matena ta na enoni tagara iaku na mane se na gete, ma ki hagagege reniê, inê kê karinga ma kê katoa maninga igê na otoha.

¹⁴Manga i mareha, na ta kê girara vigê aramia God renia, matena i uniê ki hagateê? Na ta kê page visia tanga, matena i suriê?

¹⁵God i hagavoreê i obana kenaku ngaia nga kani hagavorara nogata na enoni tagara iaku.

¹⁶Inê kê pe usisi rârâ, hanana vi ve tamanira tare na enoni matareha. I mareha rârâ vi ve pe botage renira na gete na nâ i bara tangara,

¹⁷se vi ve merangê na kare banogo, matena gê ngêngê.

¹⁸Inê kê bani marupera me suria na ogaha iaku hagenani, suria God ki marupeê ma ki hagaotoê, haganega me tenia na matena gê vora igê manga vi ngaia ki na vaemaku.

¹⁹I na ara ni matena gê bâsia ta na enoni, i barabara tanga, hanana vige vurigi na gahu se na tokotoko ni mêruha iana,

²⁰inê kê vatea renigi na ani ga tagarahigi renigi na varehuta na sipi. Ma ngaia ki visiê koro renigi igê na mêrihana hagenani.

²¹Manga vigê hagaparua na kare banogo, suria gê girara, vi na mane ni suriha ka panepane heniê,

²²hoi, ge barugirerua na rimaku se ge hârerua tenia na gaparaku.

²³Suria gê magutenia na hagaitangiha tenia God, tahema ki asa, vi ve kato vikana.

²⁴I hega, na haga vari ki na hagêguringa iaku? I hega, inê kê vi tanga na golo, kê vi, ‘E, igo nga ka na hagêguringa iaku?’

²⁵I hega, inê kê paroparo vari renigi na ruruguha iaku se renigi na nahuninga gê tagarahigi mareku?

²⁶Matena gê bâsia na mavetana na arito se na bâkorohana na hageha, i mareha rârâ vi ve rahesirerua.

²⁷Ngairerua karu mareha rârâ vigaru hagatasiê. Inê kê pe hagarapererua rârâ.

²⁸Manga gê katokato vikana inê kê tasitasi ngavê ma ka suriê nga kê meme, suria gê murisigea God raramohaga hunia.

²⁹I hega, inê kê vagevage vari, matena na merongaku ka mamasiaga? Se gê manavatenira vari matena i tarahura na bagabevoana?

³⁰Mareha! Inê kê pe kuasira rârâ, hanana vige meme.

³¹Ngaira hato i ruma iaku ka girara, vi inê kê unira banu tare na mahuara.

³²Inê kê unira banu i pasiku na enoni ni rârâha, hanana siana ka mauru i metara.

³³Na enoni getera ka uhungia viga pinihigi na tasi iata ma inê ki mareha rârâ.

³⁴Inê kê pe magutenigi rârâ na tamasinga iata na enoni reniê. Inê kê pe munimuni rârâ se vi ve gâga kunikuni i ruma, suria vi gê magutenira na enoni ga tamasi erasiê.

³⁵I hega, i mareha rârâ vari ta na enoni vige tongesurigi na tamasinga iaku? Inê kê tohe, vi inê kê vi monari. God raramohaga hunia ke aramiê bê aporo. Manga na ani i meêhetuguri ma ki segegi so na tuguriha iana tangê, hanana vigê bâsigi,

³⁶hoi, inê kê ageage renigi ma kê hagabângenigi ma kê nakagi i bêku manga na tarepuri.

³⁷Inê kê girara gê ranganigi tanga God na ara ni tauhaku hato. Inê ki asa be magu se vi ve maki i maana.

³⁸Manga inê ma kê hanagoa na mako tanga na mu iaku tenia na avanuna,

³⁹manga vigê ngêgi na ngêra ga akê igê ma be pe vurira na ani ga tagarahigi ma kê nakara vê ma, ke mesi magêha,

⁴⁰hoi, na tone ke akê urusigi na koni ma na rauga era ke akê urusigi na ngêra.” Na hatongini na tamasinga iana o Jobe ngegê.