Read Kahua JOBE 32 Bible Online

JOBE 32 - Kahua bible

JOBE 32

¹Suria o Jobe ki ama ni vivi nga, vi ngaia ki pe tasi rârâ, na vera oru na mane ka vato vige metamasi nikâ o Jobe.

²Ma ta na mane ki ura i ngekana ki karinga. Ngaia ki no Elihu tenia na hagosi ninuni iana o Rama ni Busu. O vaemana ka no Barakele ngaia ki hato vige tako ni mangariaganiha nikâ, suria o Jobe ki hagaiga pusia marena, vi pe tasi ma ki hagatoraia hete God.

³Ma ngaia ki mangariaga nikâ tangara na tamana koro gi oru o Jobe. Suria ngaira ka pe tarahua rârâ ta na tarana, hanana vige aramia bê aporo o Jobe renia, tahema i bâ, manga vi na tauhana God tanga o Jobe ki pe oto.

⁴O Elihu ki na gapu haoru. Tahema ngaia ki naasira ka tamasi hagenago, suria ngaira kani i nago tarana.

⁵Matena i bâsira na vera oru na mane ga vato, hanana vige aramia bê aporo o Jobe, ngaia ki mangariaga ngavê, ma ki tamasi, ki vi:

⁶“Inê na gapu haoru ma igamu na gemêa. Tahema inê kê magu, vi ve hagarongogamu renia na takoha iaku.

⁷Inê kê vi ma, ‘Nakara vê ke tamasi ngaira na bani mane ma ke hegirare renigi na giraraha iata.’

⁸Ma na raramohana God raramohaga hunia ki angarira na enoni ma ki vatera renigi na takoha mataha.

⁹Na enoni ga takotako mataha ma ka giraragi na tarani ga oto, ki mareha vi suria ma vi ngaira ka merahaga.

¹⁰Tahema inê kê obanigamu vigamu karingê. Nakê be visia tangagamu na takoha iaku.

¹¹Matena mu tamasi inê kê gâga renigamu ma. Inê kê karingagamu, matena mu garigi na tamasinga ga ararigi na takotakoha iami.

¹²Inê kê karinga maninga ma kê tarahua, vi igamu kamu pe tavoraha maninga igê na tamasinga iami. Igamu kamu pe hagatanga monari, vi na takotakoha iana o Jobe ki pe oto.

¹³Siana kamu vi: ‘E, o Jobe ki tako mataha teharigami. God ngaia getea ma kani girara i aramia o Jobe ma igami na enoni ki bara ngavê.’

¹⁴O Jobe ki tamasi tangagamu igamu mareha vi tangê inê. Manga ge bani tamasi tangê inê, vikê inê ki asa ve aramia manga igamu.

¹⁵I ngekê igamu kamu muni, suria igamu kamu tugupu vi na ta kamu visia nikâ. Igamu kamu pe girara, vigamu aramia o Jobe.

¹⁶I hega, gê gâga noga, suria mu muni? Igamu kamu ura bibi i ngekana.

¹⁷I asa be hagarihu! Inê kê arami ototo râ nga. Be visia tangagamu na takoha iaku.

¹⁸Inê ki asa vi ve kakaviaga vi ve tamasi. Inê ki asa be unumigi so na tamasinga iaku.

¹⁹Na takoha ki vunu mamasuaga igê na aitangihaku. Manga gê pe tamasi, inê kê page raboa, manga na anga na gavona na puruka i vunu renia na vaini haoru.

²⁰I asa be oga noga! Gê tamasi râ nga! Be visia râ nga na takoha iaku.

²¹Inê ki asa be pane henia na hitangimi. Inê ki asa be naka bêku tanga na hitangimi.

²²Na tarana viga nakanaka bê inê kê hitenia. Manga gê katokato vikana, God ki page hagaitangiê ototo râ nga.