Read Kahua JOBE 33 Bible Online

JOBE 33 - Kahua bible

JOBE 33

¹Hoita, Jobe, go karingagi maninga na tamasinga hato iaku.

²Inê ki asa be page muni. Inê be visia mataha na takoha iaku.

³Inê kê girara nga na ta gê visia. Inê kê tamasi monari.

⁴Na raramohana God ki hagavoreê ma kê ama ni mauri nga renia.

⁵Gu aramiê bê aporo, manga vi go girara. Gu nanê, hanana gu rohe pusigo maremu.

⁶Igo ma inê karu tagenakerua ma i maana God. Ngaia ki tagarahigerua renia na mako.

⁷Vikê, siana ko maguteniê. Inê ki asa be rabahigo.

⁸Hoi, inê kê pe bonotenia na tamasinga iamu. Inê kê rongogo, go vi vikê:

⁹‘Inê kê pe tangahuriê. Inê kê pe erasia rârâ ta na marâ. Inê kê matarotaro. Inê kê pe tasi rârâ.

¹⁰Ma God ki rapa ma, vige erasiê ma ke merongasiê.

¹¹Ngaia ki mama i suriê tare manga i barogi na êgaku.’

¹²Hoita Jobe, be vi tangago, na takoha iamu ki pe oto. God ki raha teha ngavê teharira na enoni hato.

¹³Tanu hega kanigo tuguria God, vi ngaia ki pe aramigi bê aporo rârâ na tamasinga iata na enoni?

¹⁴God ki tamasi hagarako igê na mani tarani ga hehegitigi. Ma ki asa ta na enoni vige botage renigi.

¹⁵Igê na bungiani, matena ga tâ ka mauru na enoni, God ki tamasi igê na maruteha.

¹⁶Ngaia ki hahanata i karingata na enoni ma ki ramonira,

¹⁷hanana vi siana ka tasitasi se viga paroparo.

¹⁸Vikana ngaia ki hagatahira hanana vi siana ka meme.

¹⁹God ki hagaotoa na enoni, matena i maeha ki tâtâ ma ki tatata na apena renia na matoroha.

²⁰Na enoni i maeha, ki marangê renigi na ngêra. Henaka na ngêra koro, ma ngaigi bâ mâmâga tanga.

²¹Na apena ki ama ni kakasi nga. Ngaia ki rataga na surina purua ma.

²²Ngaia ki oga akerekere râ tanga na agua iata na ani ga bani me.

²³Vari ta na angero ki arâ me ki tamania. Na hitangita na bera na angero iana God, ki hagaotoa na enoni, hanana i ototo.

²⁴Na angero ngekê ki page takia, ki vivi, ‘Naka vê! Siana ki apuri harê igê na agua iata na enoni ga bani me. Na mena ni vuripusiana iana ikê.’

²⁵Na apena ki page karekare aporo ma ki page ramoramo aporo.

²⁶Matena i avarasia God, God ki page aganaria. Igê na vagevageha iana ngaia ki page rahesia igê God. God ki page hagakorogi aporo na ara ni marâ tanga.

²⁷Na enoni ngekana ki page vi tangara na enoni, ki vivi, ‘Inê kê tasi. Inê kê pe katoa rârâ na tarana vige oto. Ma God ki takiê ma ki pe hagamesiê.

²⁸Ngaia ki ura pusiê tenia na agua iata na ani ga bani me. Inê kê tahitahi mênga!’

²⁹God ki katogi tare na tarani ngegana.

³⁰Ngaia ki hagatahigi na mêrihata na enoni, hanana ga vagevagesigi na mêriha iata.

³¹Hoi Jobe, gu karingagi na tamasinga iaku. Gu muni ma ku nakê be tamasi.

³²Ma ki manga go obania vigo visia ta na marâ, gu visia me tangê. Manga vi igo ma ko girara go hagatanga monari vi igo ko oto, hoi, inê be vagevage renia.

³³Manga i mareha rârâ ta na marâ vigu visia, hoi, go munimuni ma ko karingê ve hagesurigo renia na takoha mataha.