Read Kahua JOBE 34 Bible Online

JOBE 34 - Kahua bible

JOBE 34

¹Hoi, igamu na mane mu tako mataha. Igamu na mane ni giraraha, mu karingagi na tamasinga iaku.

³Igamu kamu girara na ngêra koro, matena mu ngaua anaki. Igamu kamu giraragi na tamasinga ga mareha vi na takoha mataha, matena mu rongogi.

⁴Naka ke bâ i rarona na tarana ga hekarigi renia, hanana ge kahu girara na monariha.

⁵O Jobe ki vi, ‘Inê kê matarotaro ma God ki pe suriê oto.

⁶Inê ki asa be hagaparu. Manga vigê vivi, vi inê kê tasi, inê kê hagaparu ma. Henaka vi inê kê pe tasi rârâ, ma God ki hanasiê renigi na mage ni mera kê meme.’

⁷Vegamu, igamu kamu girara noga vari ta na mane ni hagatoraiha manga o Jobe ikê? Ngaia ki pe hagahigasia rârâ God.

⁸Ngaia ki na hitangita na enoni ga erataga, na enoni ga pe botage ngavê renia God.

⁹Ngaia ki vi, vi na enoni i tê viteana God, i asa ngavê vige tarahua ta na tarana vige koro tanga.

¹⁰Hoi, igamu na mane mu nahuni takoha, mu karingê. I hega, God raramohaga hunia ki tanugi vari na tarani ga pe oto?

¹¹Ngaia ki vurira na enoni surigi na tauhata. Ngaia ki katora manga hanana i ararira.

¹²God raramohaga hunia ki asa vige katogi na tarani era. Ngaia ki asa vige katoa bera ta na enoni.

¹³I hega, God ki nahunia vari na ramoha i râ me tenia ta na enoni? I hega, ta na enoni vari ki atea God, hanana i marungia na maveta?

¹⁴Manga vi God ma ke takusia so ma marena ma ke torea aporo tenia na maveta na raramohana i vatera na marâ re na mauriha,

¹⁵hoi, na ara ni marâ ga mauri ka page me hato ma ka page voravora aporo renia na mako.

¹⁶Manga igamu ma kamu tako mataha, hoi, mu karingê maninga.

¹⁷Na tauhana God ka oto tare. I hega, ngaia ki girara vari i katogi na tarani ga pe oto? Tanu hega kamu vi, vi ngaia ki katogi na tarani ga pe oto?

¹⁸Ngaia ki girara i hagakitara na maneraha, ki vivi, ‘Igamu na maneraha mu erataga.’ Ngaia ki girara i hagakitara na enoni raha, ki vi, ‘Na eragani nuni kanigamu!’

¹⁹Ngaia ki asa vige nakanaka bêna tangara na maneraha. Naka ma na enoni ruruguha ma na enoni matareha, ngaira ka tagenata ma tanga ngaia, suria ngaia ki hagavorara ngaira hato.

²⁰Na enoni raha vari ka gasuga me igê na bungiana. Ngaira ka me ma ka magahuru. I mataku ma tanga God vi hagamesira.

²¹Ngaia ki mama i surira na enoni. Ngaia ki giraragi na ara ni tauhata hato.

²²Na mengo ki asa vige roto hono, hanana vi na enoni era ke ahiahi igê tenia God.

²³God ki pe naka na matena tangara na enoni, hanana vige surira igê.

²⁴Ngaia ki asa vige hagate masira noga na enoni, hanana vige hatungira na enoni raha ma ke urusira renira tani.

²⁵Suria ngaia ki aitangisigi ngavê na tauhata, tahema ngaia ki kasira so igê na bungiana ma ki puhuritagenira i ano.

²⁶Na enoni era ngegana ngaia ki ramusira i maata na enoni hato,

²⁷suria ngaira ka murisigea ma ka aharêngigi na ramata hato iana.

²⁸Ngaira ka hagamamasiagara na enoni ga matareha. Tahema na enoni matareha ka avarasia God ma ngaia ki aganarigi na avarasiha iata.

²⁹Ma manga vi God ma ki pe botage, i asa ta na enoni vige hagagege renia ngaia. Manga i aharo getea, na enoni ki asa vige katoa na ta.

³⁰Na enoni ki bara tangara vige katoa ta na marâ, hanana vige hatungia na marungiha iana na eragani nuni i hagamamasiagara.

³¹Manga vi na eragani nuni ngekana ma ki vi tanga God, ki vivi, ‘Inê kê bagaparongaku. Inê kê tohe, vi i hato vi ve bagaparongaku nikâ.

³²Gu hagagirarê renigi na tasi iaku. Manga vi inê ma kê tasi, inê kê suru, vi i asa ve page tasi nikâ.’

³³Jobe, i hega, na ta ko takusia? I araria ma vi God ki hagaitangia vari na enoni ngekana se mareha? Igo hete kanigo vi, vi na tauhana God ki pe oto. Inê ki mareha. Hoi, gu visia me na takoha iamu, suria igo ko tamasi manga vi igo ko giraragi na ara ni marâ.

³⁴Na ara ni enoni ni takoha kaniga tage tako manga gê tamasi. Na ara ni enoni ga tako mataha ka page vi nogata, ka vivi:

³⁵‘O Jobe ki tamasi purupuru. Na tamasinga iana ki râ bekabekaga.’

³⁶Hahariria maninga na tamasinga iana o Jobe ma kamu page tarahua, vi ngaia ki tamasi manga vi ngaia ka na merongana God.

³⁷Ngaia ki hagepurigi kê nikâ na tasi iana, suria ngaia ki merongasia God. Ngaia ki tamasi erasia God i berarogaka igia hato.”