Read Kahua JOBE 35 Bible Online

JOBE 35 - Kahua bible

JOBE 35

¹O Elihu ki ama ni tamasi nga, ki vi:

²“Jobe, i hega, i oto vari ka na tarana go vi, vi igo ko matarotaro i maana God?

³Se go hagatea God, ko vivi, ‘Manga ve tasi se ve pe tasi, na ta kanige tarahugo ma na ta kanige ravahiê inê?’

⁴Hoi, inê be aramigamu nikâ, igo ma na tamamu.

⁵Bâ kê i vavearo. Na vaha ka kerekê noga ngavê.

⁶Manga inê ma kê tasitasi, i asa vige erasia God. Manga mu bagaparongami hagarako i asa vige tarahua God.

⁷Manga mu oto i maana God, ki hega, mu takusia vari, vi igamu kamu vatea na marâ koro tanga? I asa vê! God ki bani tongasia na ara ni marâ. Na ta nikâ kanimu page vatea renia?

⁸Ngaira nga hete na enoni kani ga mamasiaga renigi na bagatauhami. Ma na tauhami ga koro i maana God kaniga tamanira.

⁹Matena na enoni ka mamasiaga, suria na enoni ni ramoha ka hagamamasiagara, ngaira ka gegege ma ka avarasia ta na enoni, hanana vi hagatahira tenira.

¹⁰Ma ki mareha vige avarasia hete God i hagavorara ma ki katora ka takotako togo igê na mamasiaganiha raha iata.

¹¹Ngaira ka pe avarasia God, i katogia ka tako mataha teharira na manu se na togoha se na marâ vasiga.

¹²Ngaira ka avaravara ma God ki pe aganarira, suria ga paroparo ma ka erataga.

¹³Ngaira ka avaravara hagaborâ ma. God raramohaga hunia ki pe botage renira.

¹⁴Jobe, igo ko vi, vi igo ko pe bâsia God. Ma ki nakago ma! Na tarana iamu ki oga i rimana God.

¹⁵Igo ko vi, vi God ki pe hagaitangia na enoni renigi na tasi iana, suria vi pe botage renigi.

¹⁶Igo ko tamasi hagaborâ ma. I rongo mataha ngavê, vi igo ko pe girara na ta kanigo visia.