Read Kahua JOBE 37 Bible Online

JOBE 37 - Kahua bible

JOBE 37

¹Na roga raha ki katoa ki hepehepe na matoku ma ki akê ki hanga i manavaku.

²Igamu hato, mu karinga na ringena God, na akurua i râ me tenia na harana.

³Ngaia ki kasigi na marangea ki gaha i vavearo tenia ta bogona na maveta tanga i ta bogona.

⁴Na ringena ki gugusuhia ma ki akurukuru ma na marangea ki mave rârâ.

⁵Na ringena akurukuru God ki hagakonera na enoni. Ngaia ki katogi na mena. I asa iaka vige aitangisigi.

⁶Ngaia ki naka na rangi anumaga ki rangisia na maveta. Ngaia ki nakagi na tangi ni rangi.

⁷Vikana ngaia ki hagabarasira na enoni tenigi na tagaraha iata ma ki hagabâsira renia na raramohana raha.

⁸Na marâ vasiga ka rukuruku igê na tâtâ iata.

⁹Na roga raha na gari ki akê me ma nikâ na târagina i anumaga.

¹⁰Na manavasua iana God ki hagamagarisigi na ve ma ki katogi ki tototo ki voravora re na aisi.

¹¹Na rangi ki rava ma ki arito. Na arito ki sikirigi râ na roto.

¹²Na arito ki arâ suria na tara God i naka tanga, ma ki arâ surigi na bonasiha iana God tanga suria na maveta hagenani.

¹³God ki hagarangisia na maveta. Ta na matena tanga i hagaitangira igê na enoni ma ta na matena tanga i korokoro igê tangara.

¹⁴Jobe, naka noga ku karinga. Gu takusigi na mena God i katogi.

¹⁵I hega, igo ko girara, vi tanu hega God kani marungigi na ara ni marâ ma tanu hega kani katoa na marangea ki sisiki tenigi na vaha?

¹⁶I hega, go girara, vi tanu hega na vaha kani aheahe rârâ i vavearo? God ki manisingenigi ngavê na ara ni marâ hato.

¹⁷Ma igo, igo ko girara go mamasiaga, suria na arito ki ramoramo ngavê, matena na roga mahana ki katoa na mako ki avagavaga.

¹⁸I hega, igo ko tamania vari God ki gasia na vavearo ma ki katoa ki gatagata manga na kapa i togatoga?

¹⁹Hoi, gu visia me tangagami, na ta kani vigami hagagege renia God renia? Igami ki tugupu nga vê na aitangihamami. Igami kami tako makira, vi na ta kami visia.

²⁰Inê kê pe obania vi ve mehetuguri God, i era ma kê naka tara tanga ki hagamesiê.

²¹Ta na matena na arito ki pinihi igê na vaha ki paraparama, ma na roga ki ahegenigi râ na vaha tenia na vavearo ma na arito ki togatoga teha ngavê.

²²Na arito ki takearâra ma ki bâkoro ngavê i vavearo ma na bâkorohana God raramohaga hunia ki hagakonegia ngavê.

²³Na raramohana God ki raha teha ngavê ma igia ka arisia. Na tauhana tangara na enoni ka oto ngavê. I asa iana vige surira bera.

²⁴Tahema na enoni ka magutenia ngavê. Ma ngaia ki pe botage renira na ani ga vi, vi ngaira ka tako mataha.”