Read Kahua JOBE 38 Bible Online

JOBE 38 - Kahua bible

JOBE 38

¹Na Araha igê na roga raha ki tamasi tanga o Jobe, ki vi:

²“Igo ki pe oto tangago, vigu hagaiga na takoha mataha iaku. Igo ki bono ngavê na bêmu. Na rogaroga purua ma ka na tamasinga iamu.

³Hoi, gu akê me manga na mane ma ku aramigi na hagatenga iaku tangago.

⁴Hoi, matena gê hagavora na maveta, igo ko gâga i he? Hoi, gu visia me, suria go vi, vi igo ko nahuni giraraha.

⁵Ti kani hagararingenia na rahaniha iana na maveta? Ti kani hagevorea na maveta? Visia me, suria go vi, vi igo ko girara!

⁶Na gatana na maveta ki gatagata igê na ta? Ti kani naka na hunana na maveta?

⁷Igê na mahogotana na tangiana ngekana na higu haku ka ki vagevage ma na angero ka ngere vagevage.

⁸Ti kani pepea na asi ki oga igê na atohana, matena i raboa tenia na rarona na maveta?

⁹Inê nga kanigê buhia na asi renigi na vaha ma kê gahuia renia na mengo.

¹⁰Inê nga kanigê pepea na asi ki oga tonge igê na atohana.

¹¹Inê kê bonasia, kê vi: “Go mataro ikê ma. Mareha vi i he nikâ. Na hêmu raramohaga ka marupi so nga ikê.”

¹²Jobe, i hega, igo ko bani bonasia me vari ki raboa na arito ki tangitangi?

¹³I hega, igo ko bani bonasia me vari na mavetana na arito ki ruia na maveta, hanana i kangikangira kasira na enoni era tenigi na ahiahi iata igê?

¹⁴Na mavetana na arito i raboa ki katoa na maveta ki memera, manga na mako memera ga purugenia igê na giraraha, se manga na gahu i totoperega.

¹⁵Na enoni era ka usitenia na mavetana na tangiana, suria i hagabarasira tenigi na bagaparongata.

¹⁶I hega, igo ko bani so tangagi na agua i huhuhu kê me igê na asi, se go bani arârâ igê na rutuni na asi?

¹⁷I hega, igo ko bani banu igê na agua ga oga igê na enoni ga bani me? I hega, igo ko bani bâsigi na maani na tarâta tanga na agua ni mengo ngegana?

¹⁸I hega, igo ko girara, vi na maveta ki raha manga i he? Manga go girara, ma ko visia me.

¹⁹Ma i he kani i pasina na mavetana? I he i kani pasina na mengo?

²⁰I hega, igo ko girara vari go hagabâsirerua renia na tara tanga i pasiterua, hanana garu atata igê?

²¹E, go girara teha vê hete ngao, suria go bani vora kerevê noga ma ko bani oga me, matena i vora me na maveta!

²²I hega, igo ko bani banu vari ko bâsigi na kiboru gê nakagi igê na rangi anumaga ma na êsusu na rangi ga manga na aisi?

²³Inê kê nakagi i ngekana nanêgi na mateni na bagabevoani, na hearihatana ma na henahuita.

²⁴I hega, igo ko bani râ igê na agua i raboa igê na arito, se igê na agua i arâ me igê na târagina?

²⁵Ti kani hagepuria na kumu na rangi? Ti kani naka na tara tanga na roto ni marangea?

²⁶Ti kani hagarangisigi na agua i hihiruga ma na bagamasusu raha?

²⁷Ti kani hagavokarigi na mako avagavaga, hanana na rauga ka vavaka igê?

²⁸I hega, na rangi vari ki tonga o vaemana? Ti kani apara na kârupu?

²⁹Ti kani kenana na ve na aisi? Ti kani hagavoragi na êsusu na rangi na aisi?

³⁰Tanu hega na ve kani gatagata manga na hê? Tanu hega na basina na asi kani vora re na aisi?

³¹Igo ko girara vari go tutugi haku na parani na higu se go musia na seni tenigi?

³²Igo ko girara vari go katogi ki akê me na higu ni tangi igê na mateni tange ma ko hagaotogi na parani na higu?

³³I hega igo ko giraragi vari na ramata tangagi na higu i vavearo hanana ga ara surigi? I hega, igo ko girara go katogi na ramata ngegana ka tarêhia na maveta?

³⁴I hega igo ko girara vari go ngerengere ko bonasigi na roto ni rangi, hanana ga rangisigo ko ruhuruhu ngavê?

³⁵Manga igo ma ko bonasia na marangea ki sisiki, ki hega, i page arâ me vari i pasimu ma ki vivi, ‘Inê kê nanê ma nge.’?

³⁶Ti kani hagagirara na manu i Esipito, vi i page maganu na ve i Nile? Ti kani hagagirara na kua mane renia vi page rangi?

³⁷Ti kani girara i tomanigi na roto ni rangi ma ki horogi ki karakara râ na rangi tenigi,

³⁸hanana ga purupuru haku na momo ma ka voravora re na hêni?

³⁹I hega, igo ko garigari ganiani vari tangara na laione, hanana go hagangêra na kareta,

⁴⁰matena ga ahiahi igê na vabata se ga tâtâ henanasi igê na tâtâ iata?

⁴¹Ti kani hagangêra na manu, matena ga magê ka gagaha rârâ matena na kareta ka avarasiê re ngauha?