Read Kahua JOBE 39 Bible Online

JOBE 39 - Kahua bible

JOBE 39

¹I hega, igo ko girara vari na matena ga agusi igê na goti ni hungani. Igo ko bâsira vari na goti vasiga matena ga apara?

²I hega, igo ko girara vari vi gi hita na hageha kaniga obara surigi? I hega igo ko girara vari na matena ga voravora igê?

³I hega, i go ko girara vari na matena ga tukutuku hetanga ka gusurenira hura igê na kareta?

⁴Na kareta ka raharaha ma ka gatagata ma ka taritari getera ma ki asa vige aporo me i pasita na kenata.

⁵Ti kani katora na tonki vasiga ka arârâ suri parongata? Ti kani nakara mavê ka arârâ?

⁶Inê nga kanigê naka na bagamasusu raha tangara ka oga igê ma kê nakara ka oga igê nikâ na bena marasiga.

⁷Ngaira ka oga hagatê tenigi na hinua babarongoga. I asa ta na enoni vige hagamanatara, hanana ge hagatagarahira.

⁸Ngaira ka ngêngê ma igê na hungani. I ngekana ngaira ka garigari igê na ani mavê na rauga ga ngaugi.

⁹I hega na puruka vasiga ki agana vari ki tagara tangago ma ki mauru igê na ruma ni puruka iamu?

¹⁰I hega, igo ko girara vari go hagamanata ma ko herehere varona hanana i horoa na mako i mu iamu ma ki vutuvutu igê?

¹¹I hega igo ko girara vari go takotako koro renia na raramohana raha? I hega igo ko girara vari go hagêguria ki katoa na tagaraha higa tangago?

¹²I hega, igo ko girara go takotako togo renia vari, hanana i toratora me na harisi iamu ma ki pupu nuinuigi na raisi igê na agua ni hatanga?

¹³Na emiu henaka i hepehepe ngavê, ma ngaia ki bara vige gaha, suria na varehuna ma na gagahana ki pe araria, hanana vige gagaha.

¹⁴Na emiu auru so ma i ano ma ki panigi ma tanga na mako, hanana i hagamahanagi.

¹⁵Ngaia ki pe takusira na marâ vasiga, vi i era ma ka pu botagigi.

¹⁶Ngaia ki katogi, manga vi ngaigi ki mareha vi na oruna marena. Ngaia ki pe botage vige bâsia na mena i orungenigi.

¹⁷Inê nga kanigê katoa ki bekabekaga. Inê kê pe haganahunia renia na takoha.

¹⁸Ma na matena i tangotango, oi, ngaia ki rêrê teharirerua na hosi ma na mane igê ma ki rurusirerua matena i tangotango tenirerua.

¹⁹Jobe, i hega, igo kanigo haganahunira na hosi renigi na raramohata ma na varehu i riota ga averovero, matena ga tangotango?

²⁰I hega, igo kanigo katora ka rekereke mangara na pê ma ka hagamagusira na enoni, matena ga hengohengo?

²¹Ngaira ka sikosiko, matena ga pasi râha ma ka gahasia ramo ngavê na hearihatana.

²²Ngaira ki asa vige magu ma ki asa vige sugare bê aporo tenigi na tatapa borahu.

²³Na tangaruha iata na me ga tagirira ka hetagitagi ma ka togatoga renia na arito.

²⁴Ngaira ka bururu ma ka nonono matena ga gaha ka arâ. Matena i angiangi na ahuri ni hearihatana i bara ngavê vige têra tonge so.

²⁵I na ara ni matena i angiangi na ahuri ngaira na hosi ka angiangi nogata. Ngaira ka bani siginia râ na hearihatana ma ka rongora na mane ga bêngenira na mane ni me ga ngerengere ka haribona.

²⁶I hega, igo ko hagesuria na tehe hanana i gaha matena i aheahe tanga na bagamasusu raha?

²⁷I hega na ahetaronga ki naasigo, hanana vigo bonasia, ki tagarahia na beana kere tagere igê na barani?

²⁸Ngaia ki beabea igê na hê ma ki mauru i ngekana. Na bugusuni na barani i manga na ruma nganganihaga iana.

²⁹Tenia i ngekana ngaia ki bâbâ rârâ igê renigi na ganiani vi ngaugi, suria i masi na maana.

³⁰Na ahetaronga ka hakurigi na gahuata na ganiani ma na kareta ka tonomigi na gaputa na ganiani.”