Read Kahua JOBE 4 Bible Online

JOBE 4 - Kahua bible

JOBE 4

¹O Elipasi ki tamasi, ki vi:

²“Jobe, manga gê tamasi, ki hega, igo ko mangariaga vari? Henaka ma inê kê tamasi râ nga.

³Igo ko bani hagesurira rako na enoni. Igo ko bani hagaramonira na enoni ga pe ramo.

⁴Na enoni ga tapasu, igo ko rapirapira. Na ani ga memega ma ka sugi rumakaka igo ko hagaramonira renigi na tamasinga iamu.

⁵Ma i ngekê na mamasiaganiha ki tarahugo ma ko tako tugupu. I ngekê ki tarahugo na bagabevoani ma igo ko bagatatako râ nga.

⁶Igo ko rahesia tare God ma ko toto suria. Na ogaha iamu ki hagakoro obana tare God. Tahema i ararigo vigo takotako togo ma ko raruni togo.

⁷Hoi, gu tako bê aporo. Igo ko girara vari ta na enoni i koro ma ki tarahua na mamasiaganiha? Na enoni i hagakoro obana God ki hega, ga tarahua vari na eraha?

⁸Inê kê girara: Na marâ na enoni ga hasihasi, ka page tarahura. Manga na enoni ma ka hasigi na eraha ma na tarani ga pe koro, hoi, na eraha ma na tarani ga pe koro ka page tarahura nikâ.

⁹God ki mutera ngavê igê na mangariaganiha iana i manga na maguara raha.

¹⁰Na enoni erataga ka mangara na laione ga angiangi ma ka ngurunguru. Ma God ki hagamunira ma ki huhurigi na rivota.

¹¹Ngaira ka mangara na laione i asa iata vige taburira nikâ na ganiani, hanana viga ngaura. Ngaira ka meme ma na kareta hato ka totoko.

¹²Ta na hahanataniha ki râ me ki tara i karingaku.

¹³Ngaia ki manga na maruteha i mamagutaga. Ngaia ki erasia na mêruha iaku.

¹⁴Inê kê tatata ma kê gisigisi. Na apeku hagenani ki gasuga.

¹⁵Na mamava ki hataria na maaku. Na apeku ki ririhuruga.

¹⁶Inê kê bâsia na mara i maramarenuni. Inê kê pe bâ hagagara renia. Inê kê rongoa na ringe Igê na mangumanguaganiha, i vi:

¹⁷‘Ti ki koro ma ki matarotaro i maana God i hagavora?

¹⁸God ki pe tako togo renira na angero iana, suria i tarahugi na tasi i pasita nikâ.

¹⁹Go takusia vari, vi ngaia ki takotako togo renira na enoni, i hagavorara renia na mako? Na enoni ni momoganiha, ga girara ga rumurumugira mangara na pepe igê na bungiana?

²⁰Na enoni ki mauri igê na mavoraro ma vari igê na manurahi ki meme ma ki mareha ta na enoni vige bâsia i me.

²¹Ngaia ki magahuru panigi na nahuninga hato iana. Ngaia ki me i mamênga vige takotako mataha.”