Read Kahua JOBE 40 Bible Online

JOBE 40 - Kahua bible

JOBE 40

¹Na Araha ki vi tanga o Jobe, ki vi:

²“Igo ko hagagege renia God raramohaga hunia. I manga go torea igê na tamasinga. I hega, tani nikâ na hagagegeha? I hega na aramiha i pasimu?”

³O Jobe ki arami, ki vi:

⁴“E, Araha, inê kê tamasi bekabekaga. Gê arami bâ hega? Inê be muni so ma.

⁵Gê tamasi hagetage ma. I arari noga. I hato vê.”

⁶Na Araha ki tamasi nikâ igê na roga raha tanga o Jobe, ki vi:

⁷“Gu aharaga, manga vi igo na mane ma ku aramigi nga na hagatenga iaku tangago.

⁸I hega, go uhungia vari vigo tahetara reniê, vi inê kê aharê? I hega, go uhungia vari, vigo hagatanga monari, vi inê kê aharê ma igo ki mareha?

⁹I hega, igo ko ramo manga inê? I hega, na ringemu ki girara vari i gugusuhia manga na ringeku inê?

¹⁰Manga ngekana, hoi, gu hagabângenigi na raramohamu ma na bâkorohamu. Gu hagabângenia, vi igo ka na Araha raramohaga.

¹¹Gu hahutugira na ani ga paroparo. Gu sirihira renia na mangariaganiha iamu ma ku hatungira na enoni era.

¹²Kasira go hatungira na enoni era. Gu hagamagahurura râ hagetage nga i ngekê.

¹³Gu ahunira hato i ano. Gu purusira banu igê na agua ga oga igê na enoni ga bani me.

¹⁴Manga ngekana hoi, inê be hagarahasigo hagenago, suria igê na raramohamu maremu kani igo go teha.

¹⁵Bâsia na bagamarâ raha ga visia vi na hipopotamo. Inê kê hagavoragamurua, ngaia ma igo. Ngaia ki ngêngê na go manga na puruka.

¹⁶E, ma na apena ki bâ raramohaga ngavê. Na varugina igê na obana ma igê na tangana ka huhuragani!

¹⁷Na kerena ki ura manga na apinige i rapu oto. Na varugina na êgana ma na rimana ka ramo.

¹⁸Na suri ravoravona ki nganganihaga manga na kapa higa. Na êgana ma na rimana ka mangagi na apini na aiani.

¹⁹Ngaia nga ka na ani i teharira na ara ni marâ mamauri gê hagavorara. Inê ma kanigê teharia.

²⁰Ngaia ki tarahugi na go i ngaugi igê vato pere igê na hungani ga ogapisi igê na marâ vasiga.

²¹Ngaia ki rukuruku i ruguhani na rauga ma na asire igê na sugusugu.

²²Ngaia ki tâtâ i berarogani na rauga ma na apinige ga akê i na akerena na ve.

²³Ngaia ki pe magutenia na ve i maganu. Ngaia ki pe gagêmaga, matena na âgogona na ve i Jotano ki hitaria na maana.

²⁴Ti ki girara i ranguia na bêna, se i siviria ki baroa na barisuna, hanana vi torea vê?