Read Kahua JOBE 41 Bible Online

JOBE 41 - Kahua bible

JOBE 41

¹Takusia Leviatana na bagahua raha. I hega, igo ko girara vari go hagarea renia na hinu, se go baroa na paratena renia na varo?

²I hega, go girara vari go surua na varo i barisuna se go garea na paratena renia na hinu?

³I hega, ngaia ki page vi tangago vari, ki vivi, ‘Hetaki. Gu nakê so!”

⁴I hega, ngaia ki page vi tangago vari, ki vivi, ‘Garu heaganari. Inê kê suru, vigê tagara tare tangago.’

⁵I hega, go girara vari go mebare manga na manu manimani iamu? I hega, go girara vari go baroa, hanana na gete rakuraku iamu ka mebare?

⁶I hega, na mane hugohugo ka obania vari viga vuria tenigo? I hega, na enoni ni hohoronga ka metaria vari tanga na hagavuringa?

⁷I hega, go girara vari vigo rapurapusia na apena renigi na marata, se go rupurupukurua na bêna renia na ora?

⁸Gu hataria hagetage râ ma ki page taritari na ataromu renia. I asa iamu vigu page bonotenia.

⁹Manga na mane i takusia, vi araria ma i taua pusina ma i bâsia râ, ngaia ki vivi, ‘E, ve rumakaka mavê.’ Na maguha ma kani katoa manga i bagamame.

¹⁰Matena ga hagamangaria, ngaia ki garagara ngavê. I asa ta na enoni vige memato hetanga.

¹¹Na mane i taharia ma ki tahitahi pania, inê be haganahunia renia na maveta hagenani.

¹²Hoi, be hagarongogo renigi na êgana ma na rimana ma na gerina raha ma raramohaga.

¹³I asa ta na mane vige sibia râ na gavona se vige takekurua na ênahina.

¹⁴Ti ki girara i tahia na paratena na harana henigi na rivona ga hagamamaguraga?

¹⁵Na ênahina raha ka gahuia na gerina ma ka hepuruge haku ma ka rate manga na hê.

¹⁶Ngaigi ki puru haku gatagata, hanana siana na roga ki bêbanu i berarogani.

¹⁷Ngaigi ki hekavikavi ki puru haku. I bara ngavê vige hasuigi hegitigi.

¹⁸Matena i ramesi, ki sisiki manga na gi ma na maana karu togatoga manga na arito i raboa.

¹⁹Na vavatani na gi ka huhura me tenia na harana ma ka sisiki.

²⁰Na roborobo ki huhura me i hengohengona manga na vavangana na ve i agobogobo.

²¹Na manavasua iana ki tanga na gi. Na vavatani ki huhura me tenia na harana.

²²Na riona ki raramohaga ngavê ma ki hagabubununugara ngavê na enoni.

²³I mangasi ngavê na gavona na apena hagenani. Ngaia ki rate ngavê manga na aiani.

²⁴Na bunaniana ki manga na hê. Ngaia ki rate ngavê manga na hê ahe. Ngaia ki asa vige magu.

²⁵Matena i aharaga, henaka na mane ni me ramo teha, ngaira ka magutenia ma ka gavagava.

²⁶Na tatapa borahu ki bara vige hagamamaria, ma na ora, na mage ma na marata nogani.

²⁷Tanga ngaia na aiani ki manga na go maria ma na kapa higa ki manga na kakagana na apinige.

²⁸Na mage ki asa vige hagavasia. Na hê ga hêsigogoa renigi ka mangagi na go maria ga hêhêgi.

²⁹Tanga ngaia na buritahuru ki manga na ri maria. Ngaia ki rurusigi ma na ora na mane ga takea renigi.

³⁰Na obana ki sutasutaga. Na sutani ngegana ki harasigi na sugusugu manga na vato ni ahura.

³¹Ngaia ki katoa na asi ki babaruru manga na ve se na oile i agobogobo.

³²Matena i tangotango na asi na asêsuna ka agobogobo i murina ma ki katoa na asi ki hutohutoga.

³³I mareha rârâ ta na marâ i maveta vige maratorana. Ngaia ki asa vige magu.

³⁴Ngaia ki bâruhira na ara ni marâ mamauri, henaka ngaira ka paroparo ngavê. Ngaia ki marungira na marâ vasiga hato.”