Read Kahua JOBE 42 Bible Online

JOBE 42 - Kahua bible

JOBE 42

¹O Jobe ki aramia na Araha, ki vi:

²“Araha, inê kê girara, vi igo nga ko raramohaga hunigo ma ki pe bara tangago ta na marâ.

³Igo ko hagateê, vi tanu hega kanigê pe magu kê hagaigago vigo pe tako mataha, henaka inê kê pe girara. I monari, inê kê tamasigi na marâ gê pe aitangisigi. Inê kê tamasigi na mena ga bara tangê vi ve giraragi.

⁴Igo ko vi tangê, kê karinga, matena go tamasi, hanana gê uhungia kê aramigi na hagatenga iamu tangê.

⁵I nago inê kê girarago, suria ma na enoni ka hagarongoê renigo ma i ngekê inê kê bâsigo renigi na maaku mareku.

⁶Tahema inê kê maki surigi na tamasinga hato iaku. Inê kê oga so i ano ma na rahu i bêku, suria gê kasi mena.”

⁷Matena na Araha ki tamasi hato tanga o Jobe, ngaia ki vi tanga o Elipasi, ki vi: “Inê kê mangariaga tangagamu, igo ma na vererua na tamamu, suria na tamasinga iami reniê ki pe oto, ma ki pe manga hete o Jobe na kariaku.

⁸Tahema mu torera me na puruka mane gi pi ma na sipi mane gi pi tanga o Jobe, ma kamu susu renira meni na tasi iami, matena o Jobe ki avarasiê tangagamu. Inê be aganaria na avarasiha iana ma ki asa be hagamakigamu, hanana vige ararigamu. Igamu kamu pe tamasia na monariha reniê manga ngaia.”

⁹O Elipasi, o Bilitata mo Sopare ka tê viteana na Araha ma na Araha ki aganaria na avarasiha iana o Jobe.

¹⁰Hemuri, matena o Jobe ki avarasia hato na Araha tangara na tamana gi oru, na Araha ki haganahunia aporo o Jobe renigi na ramana ma ki vatea aporo renigi na nahuninga iana ma ki hagatonganigi.

¹¹Ngaira hato o goana ma ka goana ma na bani tamana ka râ me ka vatugia ma ka magoto henia i ruma iana. Ngaira ka haganaku parongana ma ka hetaki suria na Araha ki nakagi na bagabevoani ki tarahua. Na ara ni hitangita ki vatea o Jobe tani na haga ma na ringi na golo.

¹²Na Araha ki koro tanga o Jobe teharia manga i nago. O Jobe ki nahunira na 14,000 na sipi, na 6,000 na kamelo, na 2,000 na puruka ma na 1,000 na tonki.

¹³Ngaia ki aparara o karena gi pi ma ka karena gi oru.

¹⁴Ngaia ki hêtana ka karena hagenago vi ka Jemina, na ruata kani ka Kesia ma na oruta kani ka Kereni Hapuku.

¹⁵Ka karena o Jobe ka bâkoro ngavê teharira na gete hato i maveta. O vaemata ki tonganira o goata ma ngaira renigi na nahuninga iana.

¹⁶O Jobe ki oga surigi na harisi 140 i murina ngekana. Ngaia ki bâsira na esina ma na kareta na esina.

¹⁷Ngaia ki kahu me matena i merahaga ngavê.