Read Kahua JOBE 5 Bible Online

JOBE 5 - Kahua bible

JOBE 5

¹Jobe, gu avaravara so ma! I mareha rârâ na hetamaniha tangago. I hega, i gâga ta na angero, hanana go avarasia?

²Na enoni i mesi takoha, ngaia ki beka. Na enoni i mesi hengariana, ngaia ki bono na bêna.

³Inê kê bâsira na enoni ga bekabekaga. I bâ manga vi ngaira ka akê me maninga. Inê kê hagasuganira kê kuasigi na ruma iata.

⁴O kareta ki asa ngavê vige asitatara. I mareha rârâ ta na enoni vige roherohe pusira igê na tamasinga.

⁵Na enoni ga magê ka page ngêngê igê na mu iata na enoni bekabekaga henigi na koni ga akê i gupuni na tone. Na enoni baguru ka barigigi na ruruguha iata.

⁶Na eraha ki pe akê me i ano. Na bagabevoani ka pe akê me tenia na mako.

⁷Mareha! Na ara ni bagabevoani ka akê me tenia na enoni mangagi na sisikina na gi. Na enoni ki hagaratena marena.

⁸Ge manga inê, inê be tagarenia tanga God na tarana i tarahuê ma be avarasia.

⁹Na tagaraha raha iana ki bara iaka vige aitangisigi ma na mena iana ka rako teha ngavê ma igia ki asa vige tomanigi.

¹⁰Ngaia ki hagarangisia na mako ma ki hagavokarigi na mu.

¹¹God nga kani kasira akê na enoni purua ma ki katora ka vagevage na enoni i rugurugu na obata.

¹²Ngaia ki hagabarasira na enoni ga harikato, hanana ga pe akê me na katoha iata.

¹³Ngaia ki katora na enoni ni hagabekasiha ka tutu igê na katoha iata mareta. Ma ngaira ki asa vige tavoraha igê na tagaraha iata.

¹⁴Henaka i mave na tangiana ma hete i rotosira. Igê na gupuna na tangiana ngaira ka arâ tatagara manga vi igê na bungiana.

¹⁵Ma God ki hagatahira na enoni matareha tenia na mera ma ki hagatahira na enoni i bara tangara tenira na ani ga hagamamasiagara.

¹⁶Ngaia ki katora ka hagêguritogo na enoni ga bagahagêguri ma ki hagamunira na enoni erataga.

¹⁷Ga babarisi na enoni God ki hagaotora! Siana ko usitenia, matena i ramonigo.

¹⁸God ki hagamamari ma ki baraigi nikâ. Ngaia ki bahitarigo ma na rimana ki hagakomagago nikâ.

¹⁹Tarema ngaia ki hagatahigo igê na bagabevoani, hanana siana na eraha ka tarahugo.

²⁰Igê na matena ni magêha raha ngaia ki marupego, hanana go ama ni mauri nga. Igê na hearihatana ngaia ki ngahisigo, hanana siana ko meme.

²¹God ki page hagatahigo tenira na ani ga hagatoraigo ma tenigi na bagabevoani.

²²Henaka vi igê na hearihatana ma na magêha igo ko mamana tenigi ma. I asa vigu magutenira na marâ vasiga.

²³Na mu go hasihasi igê ka pe manihêga ma na marâ vasiga ki asa vige garego.

²⁴Igo ko page maramarapeaga i ruma iamu. Matena go tomanira na sipi iamu, igo ko page tarahua, vi ngaira hato ka gâga.

²⁵Igo ko page ama ni ramoramo nga, naka ma go gemêa, mataro me na matena go meme igê,

²⁶manga na ehogo na koni ga mata ma ka torea i ruma ni harisi.

²⁷Jobe, igia ka bani aitangisia me vikana igê na ogaha iaka. Gu tako renia ma ku aganaria.”