Read Kahua JOBE 6 Bible Online

JOBE 6 - Kahua bible

JOBE 6

¹O Jobe ki arami, ki vi:

²Manga ge hagararingenigi na higahigani na mamasiaganiha ma na hagarugu obaha iaku,

³ngaigi ke higa teharenigi na one i one. Tahema inê kê tamasi bekabekaga.

⁴God raramohaga hunia ki hanasiê renigi na mage ma na harikuha igê ki râhia na apeku hagenani. God ki nakagi ki ura harahara na hagamaguha iana tangê.

⁵Na tonki ki pe angiangi matena i ngaugi na go koro. Na puruka ki pe angiangi matena i ngaugi na go maria.

⁶Ti ki girara i ngaugi na ngêra i maga? Na vaveagana na oruna na manu ki ngê koro se mareha?

⁷Inê kê pe pasi ngêgi na ngêra vigana. Na ngêra vigana ka ngê mâmâga.

⁸Renia ta God ki pe vateê na marâ gê nungigi tenia? Renia ta ngaia ki pe aganaria na avarasiha iaku?

⁹I araria ge hagamagahuruê râ nga, ke rumakaka reniê ma ke hagamesiê.

¹⁰Manga ge page kato vikana, inê be vagevage ngavê ma be mâmâ, naka ma i raha na mamasiaganiha iaku. Inê kê girara, vi God ki apuna ngavê. Inê ki mareha rârâ, vi ve aharêngigi na ramata iana.

¹¹I he kê girara gê tarahua igê na ramoha, hanana vi ve ama ni mauri nga? Tanu hega kanigê ama ni mauri nga, matena gê pe hagêguritogo?

¹²Mareha vi na hê kani inê! Mareha vi aiani ka na apeku!

¹³I bani hato na ramoha iaku, hanana vi ve hagatahiê mareku. I mareha vê vi o ti be kahu avarasia.

¹⁴Na mane i pe tamania na tamana koro igê na mamasiaganiha ngaia ki pe hagahigasia God raramohaga hunia.

¹⁵Igamu na tamaku, kamu hagabekasiê. Igamu kamu mangagi na marave, i mamata matena i pe rangirangi.

¹⁶Na ve ka maganu, matena i rangi raha

¹⁷ma ka mamata, matena i arito, ngaigi ki vora re na marave ma ki mamata.

¹⁸Na enoni igê na raoha ka tarupe, matena ga garigari na ve. Ngaira ka ataka mavê re raoha ma ka kahu meme igê na bagamasusu raha.

¹⁹Na ai ni Seba me Tema ka garigari ve igê na raoha iata,

²⁰ma ka tako hagetage viga meme, matena ga tarahugi ma na marave.

²¹Igamu nga kanimu mangagi na marave ngegana tangê. Igamu kamu girarê vigê mamasiaga ma igamu kamu rukuni aporo, suria mu magutenia na mera iaku.

²²I hega, inê kê nungigi na mahatanga tenigamu? I hega, inê kê nungigamu vigamu vatevatea ta na enoni, hanana i tamaniê?

²³I hega, inê kê nungigamu hanana vigamu hagatahiê tenira na merongaku ga hagamamasiagê?

²⁴Hoita, mu hagaotoê me. Mu visigi me na ta kanigê era igê. Inê kê munimuni kê karingagamu.

²⁵Manga mu tamasi igê na monariha, inê ki asa be mangariaga. Ma igamu kamu tamasi bekabekaga ma.

²⁶Igamu kamu vi, vi inê kê tamasi purua ma. Inê kê tako makira. Tanu hega kamu pe botage renia na tamasinga iaku?

²⁷Igamu nga kanimu agana ni horohoro taisi hanana vi o ti kani page nahunira na kare banogo hanana ga voravora re na kare rakuraku iana! Igamu kamu agana ni hagavuringenira na tamami koro hanana vigamu ruruguha renira!

²⁸Vegamu, mu bâsiê me! I asa be hagaparu.

²⁹Mu tamasi, ki uhu noga. Siana kamu hagatoraiê nikâ. Inê kê vi monari. Siana kamu hagaigê.

³⁰Igamu kamu vi, vi inê kê hagaparu ma na tarana gê visia renia na mamasiaganiha iaku, ki monari. Inê kê girara na ta ki monari ma na ta ki pe monari!