Read Kahua JOBE 7 Bible Online

JOBE 7 - Kahua bible

JOBE 7

¹Na ogaha iata na enoni ki manga na tagaraha i higa ga hagatagarahira igê na mane ni me. Se i manga na ogaha iana na enoni i tutu igê na tagaraha raha suria na tangiana hagenani.

²Se i manga na kare vurivuri i obania vi gâga mamaru, ki hagamamava. Se i manga na enoni tagara i naasia na vurina.

³I na ara ni hageha inê kê mamasiaga rârâ ma. Mareha vige page totora getea râ tani. I na ara ni bungiani inê kê mamasiaga renigi na takoha bâraha.

⁴Matena gê tâ kê mauru, na bungiana ki arihu era. Inê kê tâtâ horota igê na bungiana hagenani. Inê kê naasia bâraha na tangiana.

⁵Na apeku ki mamaga ngavê. Na gorani na babasu ka gahuiê. Na nana ka huhura me igê na babasuku.

⁶Na tangiani iaku ka rêrê teharirerua na rimana na gete i hêhê. Ngaigi ki magahuru râ ma ki asa vige page totora getea râ tani.

⁷God, gu takusia na ogaha iaku. Ngaia ki manga na kere manavaso ma. Na vagevageha iaku ki bani hato vige tarahuê nikâ.

⁸Igo ko bâsiê i ngekê, ma ki sugia ma, vigu bâ mareha reniê. Manga go gariê, ma inê kê bani magahuru.

⁹Na vaha ki arâ me, ki tehateha ma ki magahuru râ. Na enoni ki manga ngekana nikâ. Ngaia ki meme ma ki arâ ngavê.

¹⁰Ngaia ki asa vige page aporo me nikâ. Ngaira i ruma iana ka page bonotenia ngavê.

¹¹Mareha! I asa be muni. Inê kê mangariaga ma kê obaera. Inê kê tamasi nga.

¹²Tanu hega go pagoê? I hega, na ega i garagara vari kani inê?

¹³Inê kê uhungia vigê tâtâ kê mamaro, hanana vi soso vari na mamasiaganiha iaku.

¹⁴Ma igo, igo ko hagamagusiê renigi na maruteha. Igo ko katoê kê bagamamêru.

¹⁵Vikana inê kê obania, vige nguriê be me, hanana siana kê gâga igê na mamasiaganiha ngekê.

¹⁶Inê kê tako hagetage. I usi na apeku vi ve oga. Nakê so! Na ogaha iaku ki na kere manavaso ma.

¹⁷Tanu hega na enoni ka na marâ raha i maamu? Tanu hega ko mamasurigi na tauhana?

¹⁸Tanu hega ko kikirihia i na ara ni mavoraro? Tanu hega ko hagakitagi tare na tauhana hato?

¹⁹Tanu hega ko pe sirasira getego râ, hanana ve unumi na musuku?

²⁰Igo nga kanigo mamasurira tare na enoni, ma ki manga ve tasi ma, ke hega, ve erasigo? Tanu hega ko katoê manga na pupusikare? Inê kê hagamarâ apemu vari?

²¹I bara tangago vari, vigu bonotenigi na tasi iaku? I bara tangago vari, vigu ahunigi râ na bagatauhaku? Inê ki sugia ma ve oga igê na anoanoku. Matena go page gariê, ma inê kê bani magahuru.”