Read Kahua JOBE 8 Bible Online

JOBE 8 - Kahua bible

JOBE 8

¹O Bilitata ki tamasi, ki vi:

²“Go tamasi taraha? Igo ko tamasi igê na bevoa purua ma.

³I hega, God ki horoa vari na monariha? I hega God ki katogi vari na tarani ga pe oto?

⁴Na karemu ngaira nga kaniga haritohea hete God. Tahema ngaia ki hagaitangira meni na tasi iata.

⁵Hoi, gu aharia God raramohaga hunia ma ku nungia ke korokoro aporo tangago.

⁶Manga i monari vigo pe hagaparu ma ko matarotaro hete, hoi, God ki page tamanigo ma ki page korokoro aporo tangago ma ki page naka na ramana tanga na ruma iamu. Ngaia ki page vurigo vigana.

⁷Na ruruguha hato go tê tara renigi, ki bara vige hagararingenigi henigi na marâ God ki page vatego renigi.

⁸Gu takusigi na takoha mataha iata na enoni i nago. Gu takusigi na giraraha iata na êvarika.

⁹Na ogaha iaka ki abubu ngavê. Igia ka hite ngavê. Igia ka riri mangagi na mamarugani na roto ga aharêngia na maveta.

¹⁰Gu naka na takoha mataha iata ke hagesurigo. Gu karingagi na tamasinga iata:

¹¹‘Na asire ki asa vige akê igê na agua i mareha igê na ve. Ngaira ka akê ma igê na sugusugu.

¹²Manga i mamata na ve, ngaigi ki marama hagenago, naka ma ga sisite mêngagi, hanana vige reterete.

¹³Na enoni ga pe botage renia God, ngaira ka mangagi na asire, i mareha na ve tenigi. Matena ga hitenia God, ngaira ki hato vige hagêguritogo.

¹⁴Ngaira ka rangu igê na sigana se igê na robona na rava.

¹⁵Manga viga rangu igê na robona na rava, ki hega, ga girara vari vi gatagata? Manga ga rivato renia na sigana, ki hega, ga girara vari ga arârâ?’

¹⁶Na enoni era ka akê mangagi na rauga igê na arito, mangagi na rauga ga manasia na mu.

¹⁷Na vagani ka gahuigi na hê ma ka ranguigi na mako bêratega.

¹⁸Ma na matena ga bani okegi râ na enoni ka bâbâ mareha renigi i ngegana.

¹⁹Vikana ma nga na vagevageha iata na enoni era. Na enoni getera kaniga urusira.

²⁰Ma God ki asa vige rumakaka renira na enoni ga totosuria, se vige tamanira na enoni era.

²¹Ngaia ki page nakago ku ruru ma ku ngerengere vagevage.

²²Ngaia ki page hagamakira na ani ga kitenigo. Na ruma iata na enoni era ka page aruhuruhu.”