Read Kahua JOBE 9 Bible Online

JOBE 9 - Kahua bible

JOBE 9

¹O Jobe ki tamasi, ki vi:

²“Ua, inê kê bani rongogi me i nago. I asa ngavê na enoni vige teharia God igê na tamasinga.

³I asa ta na enoni vige mehetuguri. Ngaia ki girara i hagate na bera na hagatenga, ma ki bara ngavê tanga na enoni vige aramigi.

⁴God ki tako mataha ngavê ma ki raramohaga hunia. I asa ta na enoni vige mehesuasua.

⁵Ngaia ki hagagasuga ki gurugi râ na hungani. Ngaia ki hagaguguruhigi igê na mangariaganiha iana.

⁶Ngaia ki katogi na nunu, ka ngingia na ano. Ngaia ki ngingigi na gatani na maveta.

⁷Ngaia ki girara i hagabarasia na arito siana ki akê me. Ngaia ki girara i hagabarasigi na higu siana ki mave igê na bungiana.

⁸I mareha rârâ tani vige tamania God, hanana vige gasia na vavearo. Ngaia getea ma ki pupugusurenia bê aporo na ega raha i garagara.

⁹Ngaia nga God kani nakagi na higu ga bâsigi i vavearo.

¹⁰Igia ki asa iaka vige aitangisigi na tagaraha raha iana. Na mena gahu i katogi ki bara tangagia vige tomanigi.

¹¹God ki ri ma ki asa ve bâsia. Ngaia i pasiku ma inê kê pe hagarea.

¹²Ngaia ki totora na marâ i obanigi. I asa ta na enoni vige urapusia. Na enoni ka hagêrahusia vige hagate, ke vi! ‘Na ta kanigo katoa?’

¹³Na mangariaganiha iana God ki asa vige page hato. Ngaia ki hatungia na raramohata na merongana Rahaba na ega raha ma na tamana.

¹⁴Manga i he kanigê girara gê metamasi bê aporo God? Manga i he kanigê girara gê visigi tanga na takoha iaku?

¹⁵Henaka inê kê pe tasi rârâ, ma na marâ gi tage ma kê girara gê katoa: Inê kê nungia ki takiê matena i suriê.

¹⁶Henaka i manga ngekana ma ki nakê kê tamasi, inê kê pe girara bâkoro, vi ngaia ki aganariê se mareha.

¹⁷Ngaia ki hatariê manga na maguara. Ngaia ki hagamamariê hagaborâ ma.

¹⁸Ngaia ki pe nakê be manavaso taraku. Ngaia ki katoa na ogaha hagenani iaku ki mahemaheaga ngavê.

¹⁹I hega na ramoha iaku mareku vari? E, ma ngaia kani ramo tehariê inê! I hega, gê torea igê na tamasinga? E, ma ti ki girara i rêra i murina ki arâ?

²⁰Inê kê pe tasi rârâ. Inê kê toto suria tare God. Ma na tamasinga ma iaku kaniga rongo manga vi inê kê tasi. Na ara ni marâ gê visigi ka bâ manga ga takeê.

²¹Inê kê pe tasi rârâ ma ki pe marâ na apeku.

²²Inê kê usi re na ogaha. Na ara ni marâ ka tagenani ma. Naka ma ga tasitasi se mareha, God ki page mutegia igia hato.

²³Manga na enoni i pe tasi rârâ ma ki gasuga me, God ki rurusia ma.

²⁴God ki haganahunira na enoni era renia na maveta. Na enoni hato ni hagaotonga ki guru na maata. Manga vi God ma ke pe kato vikana, hoi, ti so ma kani katoa?

²⁵Na mateni iaku ka hatani riri tatage. Mareha rârâ na hitangini vige koro.

²⁶Na ogaha iaku ki riri manga na haka i kosu ngavê. Na ogaha iaku ki rêrê manga na ahetaronga, i hagavato tanga na ganiana.

²⁷Naka ma inê be vi, E, be bonotenia na mamasiaganiha iaku, be bâ rikiriki ma be vagevage.

²⁸Na mamasiaganiha ke ranguiê aporo nikâ, suria gê girara, vi God ki vi, vi inê kê tasi.

²⁹Suria ga vi, vi inê kê tasi, tanu hega kê ama ni botage nga?

³⁰Henaka ve mamanu igê na ve koro, se ve mamanu renia na sopu, i asa be matarotaro.

³¹Suria God ki kasiê so igê na bêni roro, vikana na gahu iaku ka makimaki teniê nogani.

³²God ma ke manga na enoni manga inê, vikê inê be girara ve me hetuguri, hanana muru râ igê na tamasinga, kamuru hagaotoa na berarogamirua.

³³Mareha ta na enoni vige hagaotogamirua. Mareha ta na enoni vige surigamirua God menê,

³⁴hanana vi siana God ki hagaitangiê, hanana vi siana ki hagamagusiê.

³⁵Henaka, ma inê kê pe magu. Inê kê tamasi nga, suria inê kê girara so mareku, vi inê kê pe tasi.