Read Kahua KI 10 Bible Online

KI 10 - Kahua bible

KI 10

¹Renia ta ko arege, Araha? Renia ta ko ahi, matena ga tarahugami na bagabevoani?

²Na enoni, ga erataga, ka paroparo, ma ka merongasira na enoni matareha. Ngaira ka tura na enoni matareha renigi na tu iata.

³Na enoni, ga erataga, ka paroparo renigi na teniha era iata. Na enoni maongoga ka visia bera na Araha, ma ka marakorotenia.

⁴Na enoni, ga erataga, ka pe gagêmaga renia na Araha. Ngaira ka paroparo, ma ka hagaiga God na Araha.

⁵Na enoni era ka korokoro tare igê na ara ni marâ, ga tanugi. Ngaira ka hitenigi na suriha iana na Araha, ma ka rurusira na merongata.

⁶Ngaira ka tohetohe, ka vivi: “Igami kami tehateha tare. I asa iamami, vigami page vota.”

⁷Ngaira ka guharira tare na enoni, ka hagaparura ma ka hagamakukira. Ngaira ka tamasi erasira tare na enoni, ma na tamasinga iata ka pe oto.

⁸Ngaira ka gamorahia na hinua, hanana viga nahuira na enoni koro. Ngaira ka bâbâ renira na enoni koro, hanana viga page nahuira.

⁹Ngaira ka ababa igê na ahiahi iata mangara na o vasiga. Ngaira ka ahiahi karira na enoni matareha, ma ka tura, ma ka okeke rataratagenira.

¹⁰Ngaira ka gaha vurusira na enoni, ga koro, ma ka nahu erasira ka vota i ano.

¹¹Na enoni era ka takotako, ka vivi: “God ki pe botage renigi. Ngaia ki pe sira me. I asa iana, vige bâsigami.”

¹²Araha, gu hagaitangira na enoni era ngegana. God, gu tamanira na enoni, ga hatamigi na mamasiaganiha.

¹³Tanu hega na enoni era ka ruhigo, Araha? Tanu hega ngaira ka tako i obata, ka vivi: “Ngaia ki bara, vige hagaitangigami?”

¹⁴Ma igo, Araha, ko pe guru. Igo ko bâsigi na bagabevoani. Igo ko bâsigi na mamasiaganiha, ma na hetamaniha iamu ki nanêgi tare. Na enoni matareha ka hagêguri togo renigo, ma igo ko tamanira tare na kare banogo.

¹⁵Gu hatungigi na raramohata na enoni era, ga katogi na eraha. Gu hagaitangira renigi na tauhata era, mataro me ka magahuru hagetage.

¹⁶God, igo ko araha tare ma tarema. Na maveta ki na animu. Igo ko page paira hura tenia na ano na enoni, ga pe rahesigo igo.

¹⁷Araha, igo ko page aganarigi na nunginungi iata na enoni matareha. Igo ko page hagakanura, ma ko page tamanira.

¹⁸Igo ko page surira koro na kare banogo ma na enoni, ga hatamigi na mamasiaganiha. Ma vikê ki asa na enoni, ga era, vige page hagamagusira nikâ.