Read Kahua KI 102 Bible Online

KI 102 - Kahua bible

KI 102

¹[៨៧] Araha, gu aganaria na nunginungi iaku, ma ku tamaniê, gê avarasigo.

²Siana ko murisigeê igê na mamasiaganiha iaku. Gu karingê ma ku aganaria na avarasiha iaku.

³Na mêrihaku ki magahuru manga na robona gi nga. Na apeku ki rarata manga na gi ramo.

⁴Inê kê mangagi na go, ga bani retegi ma ki maria. Inê kê marangê hagetage.

⁵Inê kê gegege raha. Inê kê kakasi ma kê rataga ngavê.

⁶Inê kê manga na manu igê na bagamanihê raha. Inê kê manga na komokukuni igê na hiru.

⁷Inê kê tâ i bana ma ka ura na maaku. Inê kê oga getegeteê, manga na manu i tage i gerina na ruma.

⁸I na ara ni tangiani na merongaku ka guhariê. Ngaira ka rurusiê ma ka visiê bera.

⁹Inê kê ngaua ma na rahu, ma kê tonomigi ma na tavoni na maaku.

¹⁰Suria igo ko mangariaga bâraha tangê, igo ko tauê, ko arihateniê.

¹¹Na mêrihaku ki manga na mamaruha i manurahi ngavê. Inê kê mangagi na go, i maria.

¹²Ma na arahanga iamu, Araha, ki goga tare. Na enoni i muri me ka page takusigo nikâ.

¹³Igo ko page gagêmaga renia Sione ma ko takuia. I ngekê ki na matena koro tanga go takuia igê. Ngaia ki na matena, i arari.

¹⁴Na kariamu ka takuia Sione, naka ma na merongata ka bani hagasuhia. Ngaira ka mesia, naka ma na ruma hato ka tâ so i ano.

¹⁵Na enoni hato i maveta ka page magutenia na Araha. Na maneraha hato i maveta ka page magutenia na raramohana.

¹⁶Matena na Araha ki torea aporo Sione, ngaia ki page hagabângenia na raramohana raha.

¹⁷Ngaia ki page rongora na kariana, ga varo mu, ma ki page aganarigi na nunginungi iata.

¹⁸Mu segegi so na tauhana na Araha, hanana na enoni i na bevoana i muri me ka page giraragi. Vikê na enoni, ga mamêngara, ge voravora me, ka page hagarahasia.

¹⁹Na Araha God i pasina ki hahutugia na maveta, ma ki bâ so tenia na agua apuna iana.

²⁰Ngaia ki rongora na enoni, ga gegege i ruma ni hagaitangiha. Ngaia ki hagatatarasira na ani, ga bani surira bera, viga meme.

²¹Vikê na enoni ka page hagarahasia God i Sione ma ka page kasia akê i Jerusaleme.

²²Vikê ki page rongo raha na atana, matena na enoni hato i maveta ma na maneraha iata ka hakuhaku me tanga ga rahesia na Araha.

²³Inê kê karekare mênga, ma na Araha ki bani katoê, kê pe ramoramo, ma ki bani hagabubua na mêrihaku.

²⁴God, igo ko mauri tare ma tarema. Inê kê avarasigo. Siana ko hagamagahuruê, mataro me kê gemêa.

²⁵Araha, i nago kere vê noga igo ko hagavora na maveta ma ko tagarahigi na vavearo ma na bevoa tatara renigi na rimamu maremu.

²⁶Ngaigi hato ki page magahuru, ma ki page kakaga mangagi na kakagani na gahu. Ma igo, igo ko page goga tare ma tarema! Igo ko page tasigi râ mangagi na gahu, ma ngaigi ki page magahuru.

²⁷Ma igo ki asa, vigu page riariaga, ma ko mauri tare, ki bê ki arâ.

²⁸Na kareta na kariamu ka page ape tatara, suria igo ko anumasira ma na raraha iata ka page nahunia na ramana.