Read Kahua KI 103 Bible Online

KI 103 - Kahua bible

KI 103

¹[៨៨] Inê be visia raha na Araha i mêrihaku hagenani. Inê be hagarahasia, ke rogo raha na atana.

²Inê be kasia akê na Araha, ma ki asa, be bonotenia na korohana raha tangê.

³Ngaia ki bonotenigi na tasi iaku hato, ma ki hagakomagê tenigi na mera hato.

⁴Ngaia ki hagatahiê tenia na matahu. Na takuiha iana ma na korohana karu aganariê.

⁵Ngaia ki hagavagevagesiê renigi na marâ, ga koro, suria na mêrihaku hagenani. Vikê inê kê karekare ma kê ramoramo, manga na ahetaronga.

⁶Na Araha ki tamanira ma ki surira oto na enoni, ga goga igê na mamasiaganiha.

⁷Ngaia ki hagagirara o Moise renigi na katoha iana, ma ki hagabâsira na Isiraelita renigi na raramohana ma na tagaraha raha iana.

⁸Na Araha ki korokoro tangara na kariana ma ki takuira. Ngaia ki pe mangariaga garigari. Ma na takuiha iana ki asa, vige page hato.

⁹Ngaia ki asa, vige ama ni ramonira nga na kariana, ma ki asa, vige mangariaga tare.

¹⁰Ngaia ki pe hagaitangigia ararigi na tasi iaka, se vi na ginoka era, se vi na parongaka era.

¹¹Na takuiha tarema iana tangara na enoni, ga tê viteana, ki raha teharia na vavearo i avorana na maveta.

¹²Ngaia ki kasigi vê na tasi iaka hagatê ngavê, manga i kerekê ma kereso garu hehagatêri.

¹³Tagenana manga na mane i takuira na karena, na Araha ki takuira nogana na enoni, ga tê viteana.

¹⁴Ngaia ki girara, vi igia ka makumakusiga. Ngaia ki pe hitenia, vi igia ka na mako.

¹⁵Tangagia igia, na mêrihaka ka mangagi na go ma. Igia ka mangagi na rauga i bemu, ga akê ma ka tataka.

¹⁶Ma na roga ki rogatenigi vê, ka magahuru, ma ka pe bâsigi nikâ.

¹⁷Ma tangara na enoni, ga tê viteana, na Araha ki takuira tare, ki bê ki arâ. Ma na korohana ki asa, vige page hato.

¹⁸Tagenana tangara na ani, ga marupegi maninga na ramata iana ma ka toto suria na suruheri iana henira.

¹⁹Na Araha ki marungirerua na matava ma na maveta hagenani.

²⁰Mu hagarahasia na Araha, igamu na angero ramo ma raramohaga, mu marupegi na ramata iana ma kamu tê viteana.

²¹Mu hagarahasia na Araha, igamu na kariana raramohaga, mu tagara tanga ma kamu arâ surigi na tamasinga iana.

²²Mu hagarahasia na Araha, igamu hato na marâ, i bani hagavoragamu, i na ara ni agua, i marungigi. Inê be hagarahasia na Araha i mêrihaku hagenani.