Read Kahua KI 104 Bible Online

KI 104 - Kahua bible

KI 104

¹Inê be hagarahasia na Araha i mêrihaku hagenani. Araha God iaku, go raha teha ngavê! Na bâbâhamu raha ma na raramohamu karu manga na tuguni iamu,

²ma ko togatoga manga na marara. Igo ko bani gasia na vavearo manga na gerina na ruma,

³ma i pasimu ki oga i avorani na ve i avorana na vavearo. Igo ko tagirigi na vaha ma ko tage igê na gagahana na roga.

⁴Igo ko hagatoragi na roga, ka totora na tamasinga iamu ma na marangea ka mangara na kariamu.

⁵Igo ko bani naka na maveta, ki nganganihaga igê na atohana, ma ki asa, vige guru râ tenia.

⁶Igo ko gasia na asi igê na maveta manga na gahu, ma na ve ka anuigi na barani.

⁷Ma na matena go ramonigi na ve, ngaigi ki gava. Ngaigi ki gava vê, matena ga rongoa na ringemu, i rongo raha manga na akurua.

⁸Na barani ka riki kê, ma na ve ka gogo, ka so igê na maruguni, igê na atohata, go bani nakagi tangagi.

⁹Igo ko katogi, ka goga tonge igê na taritarihani, hanana siana ka aharêngigi ma ka anuia aporo na maveta.

¹⁰Igo ko katogi na ve banga, ka gogo igê na maruguni, ma na ve oto ka gogo i berarogani na hungani.

¹¹Na marâ vasiga i bemu ka tonomigi, matena i mamata na riota.

¹²Igê na apinige hagarangi na manu ka roborobo ma ka angiangi igê.

¹³Tenia na vavearo igo ko hagarangisigi na hungani, ma ko katogi, ki akê i maveta na ara ni marâ hato, ga koro.

¹⁴Igo ko katogi na go, ki akê koro tangara na puruka, ma na ngêra tangara na enoni. Vikê na enoni ka hasihasi ngêra,

¹⁵ma na varo ni vaini, i hagakoro obata. Ma nikâ na apinige na olive tanga na oile, hanana ga vagevagesia, ma na bereti, ga apeape koro renigi.

¹⁶Na apinige raha i Libanone ka mauri bâkoro renigi na rangi. Ngaigi ki na apinige iana marena na Araha, i hasigi.

¹⁷Na manu ka roborobo igê, ma na manu raha ka beabea igê na mararu.

¹⁸Na goti vasiga ka goga igê na hungani, ma na garagu ka rukuruku igê na vaba.

¹⁹Igo ko hagavora na hageha, ki hagagiraragami renigi na bevoani. Ma na arito ki girara na matena, i araria, i susu igê.

²⁰Igo ko hagavora na bungiana, ma na marâ hato vasiga ka arârâ igê na roto.

²¹Na o vasiga ka ngerengere, matena ga gagari. Ngaira ka garigari na ngêra, na mahatanga iana na Araha.

²²Igê na kakahuagani na tangiani ngaira ka aporo igê na tâtâ iata.

²³Hemuri na enoni ka tabegi na tagaraha iata, mataro me ki manurahi.

²⁴Na marâ go bani hagavorara, Araha, ka rako teha ngavê. Ngaira ka hagabângenia, vi igo ko tako mataha ngavê. Na maveta ki vunu renira na marâ, go bani hagavorara.

²⁵Na asi ki raha ma ki aberabera. Na ega raha ma na ani sisite ka rako teha igê. I bara, vige tomanira.

²⁶Na haka ka arâ igê na asi, ma i rarona na asi ki barebare Leviatane, na ega raha teha, go bani hagavora.

²⁷Ngaira hato ka naasigo re ngêra, matena ga obanigi.

²⁸Igo ko hagangêra ma ngaira ka ngêngê. Ngaira ka ngê masu renigi na ngêra, go vatera.

²⁹Matena go mumu tenira, ngaira ka magu. Matena go torea vê na rogaroga tenira, ngaira ka meme, ma ka voravora aporo renia na mako.

³⁰Matena go vatera na rogaroga, ngaira ka voravora me, ma ko votoa tare na mêriha haoru i maveta.

³¹Na bâbâhana raha ma na raramohana na Araha ke oga tare ma tarema. Na Araha ke koro na obana renigi na tagaraha iana.

³²Ngaia ki boretenia na maveta, ma na ano ki gisigisi. Ngaia ki hatarigi na barani, ma ka asêsu.

³³Inê be kiria na Araha suria na mêrihaku hagenani. Suria na mêrihaku hagenani inê be kiria be visia raha God iaku.

³⁴Ge hagakoro obana na Araha na ki iaku, suria inê kê vagevagesia.

³⁵Ge magahuru tenia na maveta na enoni era, ma ke hato hagetage na enoni, ga tasi. Inê be hagarahasia na Araha i mêrihaku hagenani. Inê be kasia akê na Araha.