Read Kahua KI 105 Bible Online

KI 105 - Kahua bible

KI 105

¹Mu visia koro na Araha. Mu tarohenia, i rongo raha na atana. Mu hagarongora na enoni hato i maveta renigi na tagaraha iana.

²Mu ki kamu visia raha na araha. Mu visigi na mena iana.

³Mu ageage, suria igamu ka na kariana. Ge vagevage nogata na enoni hato, ga rahesia na Araha.

⁴Mu avarasia na Araha, ki tamanigamu, ma kamu rahesia tare.

⁵Mu takusigi na mena, God ki bani tanugi, ma na tagaraha ma na suriha iana.

⁶Renia igamu nga na raraha iana o Abaramo. Ngaia ki na kariana na Araha. Renia igamu nga na raraha iana o Jakobo. God ki bani ategamu.

⁷Na Araha ki na God iaka. Na ramata iana ka tuguhira na enoni hato i maveta.

⁸Ngaia ki page takusia tare na suruheri iana, ma ki page hagamonarigi na suruha iana tare, ki bê ki arâ.

⁹Ngaia ki page hagamonarigi na suruheri iana henia o Abaramo ma na suruha iana tanga o Isako.

¹⁰Na Araha ki naka na suruheri henia o Jakobo. Na suruheri ngekê ki asa, vige page hato.

¹¹Ngaia ki vi: “Inê kê page haganahunigo renia i Kanani. Ngaia ki na animu.”

¹²I nago na kariana God ka pe rako. Ngaira ka mamahuara i Kanani.

¹³Ngaira ka arârâhigi na agua surigi na hinua.

¹⁴God ki pe hagamarumungenira na enoni i ngekana, hanana vige hagamamasiaga apeta na kariana. Ngaia ki haganunura na maneraha i ngekana, hanana ga anumasira na kariana.

¹⁵Ngaia ki vi: “Siana kamu erasira na kariaku hetakui. Siana kamu merongasira na poropete iaku.”

¹⁶Na Araha ki naka na magêha raha i na marê iata, ma ki hagataragi na ngêra hato iata.

¹⁷Ngaia ki kasia ta na mane, ki nanago tarata. Ngaia ki no Josepo, ga bani hagavuringenia manga na kare rakuraku.

¹⁸Ga barogi na êgana renigi na seni, ma ka arigenia na seni i riona.

¹⁹Ngaia ki oga vikana i ruma ni hagaitangiha, mataro me ki voravora me mave na hinarunga iana. Na tamasinga iana na Araha ki hagatanga monari renia, vi na hinarunga iana o Josepo ki monari.

²⁰Vikê na maneraha i Esipito ki rupasia. Na ani, i marungira na enoni hato, ki kasia hura tenia na ruma ni hagaitangiha.

²¹Ngaia ki kasia, ki bâsurigi na arahanga iana ma na nahuninga ma na mako iana.

²²Mo Josepo ki araha tangara na enoni raha igê na gavumane, ma ki nahunia na ramoha, hanana i hagesurira na mane, ga tamania na maneraha renigi na takotako mataha iata.

²³Me muri o Jakobo ki râ i Esipito ma ki oga mamahuara i ngekana.

²⁴Na Araha ki hagarakonira na kariana, ma ki katora, ka ramo teharira na merongata.

²⁵Ngaia ki katora na ai ni Esipito ka kitenira na kariana, ka hagahagaparura ma ka hagamamasiagara.

²⁶Ma hemuri God ki hagatorangenirerua o Moise na kariana mo Aroni, i bani atea.

²⁷Ngaia ki vaterarua na ramoha, hanana garu tanugi i Esipito na tagaraha raha ma na mena.

²⁸God ki katoa na agua hagenani, ki roto hono. Ma na ai ni Esipito ka usi ni tê viteana.

²⁹Ngaia ki katogi na ve iata ki vora na gapu, ma ka me hato na siare igê.

³⁰Na êrê ka gahuia na apanena iata, ma ki vunu mamasuaga ngavê nikâ na ruma raha iana na maneraha.

³¹God ki hagatorangenira na rango ru ma na namu, ka manasia na agua hagenani.

³²Ngaia ki hagarangisia na agua hagenani renigi na hê na aisi, ma na marangea nikâ.

³³Ngaia ki hagaerasigi ngavê na pariki na vaini iata, ma ki bogegi na apinige na fiki iata ma na ara ni apinige hato.

³⁴Ngaia ki hagatorangenira na pê rako teha ngavê, na rehagaro ma na rehagaro.

³⁵Ngaira ka ngaugi na rê hato i na agua hagenani ma na ara ni ngêra hato nikâ.

³⁶Ngaia ki hagamesira na ara ni bêbê ni kare hato surigi na ara ni ahemata hato i Esipito.

³⁷Memuri ngaia ki merahura na Isiraelita. Ngaira ka migirâ na siliva ma na golo. Ngaira hato ka ape koro ma ka ramoramo.

³⁸Na ai ni Esipito ka magutenira, ma ka manavatenira, matena ga hura.

³⁹God ki buhira na kariana renia na vaha. Ngaia ki naka na gi, i mavesira surigi na bungiani.

⁴⁰Ngaira ka nungia, ma ngaia ki vatera na manu. Ngaia ki hagangêra ka masu renia na ngêra tenia i pasina.

⁴¹Ngaia ki tangahia na verake, ma ki pusu me na ve, ki gogo manga na ve oto igê na masusu.

⁴²Renia ngaia ki takusia na tohenga iana tanga o Abaramo na kariana.

⁴³Vikê ngaia ki bêngenira hura na kariana hetakui. Ma ngaira ka kiki ma ka ngerengere, suria ga obakoro.

⁴⁴Ngaia ki haganahunira renigi na agua ma na mako ma na mu iata na enoni, ga pe rahesia na Araha.

⁴⁵Ngaia ki kato vikana, hanana na kariana ka marupegi na ramata iana ma ka arâ surigi na tamasinga iana. Ka kasia akê na Araha, ma ka hagarahasia!