Read Kahua KI 106 Bible Online

KI 106 - Kahua bible

KI 106

¹Ka hagarahasia na Araha! Visia koro na Araha, suria i takuigia. Na takuiha iana ki asa, vige page hato.

²Ti ki girara i tomanigi na tagaraha raha hato iana? Ti ki girara i hagarahasia maniga?

³Ga babarisi na enoni, ga marupegi na ramata iana, ma ka paronga koro ma oto tare.

⁴Gu takusiê, Araha, matena go tamanira na kariamu. Gu hagatahiê nogaku henira.

⁵Gu haganahuniê nogaku renia na ramana henira na kariamu. Gu hagakoro obaku nogaku henira, ma ku katoê, be ageage nogaku henira na kariamu.

⁶Igia ka bani tasi mangara na uvarika. Igia ka bani tanugi na marâ, ga pe koro ma ka pe oto.

⁷Matena na uvarika ka oga i Esipito, ngaira ka pe aitangisigi na mena iana na Araha. Hagarako teha ngavê God ki bani hagabângenia na takuiha iana tangara, ma ngaira ka pe takusigi. Ngaira ka guguruga tanga God raramohaga hunia igê na Asi Memera.

⁸Ma ngaia ki hagatahira, manga i bani surua, hanana i hagabângenia na raramohana raha.

⁹Ngaia ki bonasia na Asi Memera, ma ki mamata. Ngaia ki bêngenira na kariana, ka râ igê na tara mamata.

¹⁰Ngaia ki hagatahira tenira na enoni, ga kitenira. Ngaia ki hagatahira tenira na merongata.

¹¹Ma na asi ki buhira na merongata, ka me hagetage, ma ki pe tahi na hitangita.

¹²I ngekana na kariana ka tongesurigi na suruha iana, ma ka ki ka hagarahasia.

¹³Ma ngaira ka hata ni bonotenigi na tagaraha iana, ma ka pe toto suria.

¹⁴Igê na bagamanihê raha na teniha ki angarira. Ma ngaira ka uhungia God na Araha.

¹⁵Vikê ngaia ki vatera na marâ, ga nungigi, ma ki hagaitangira nikâ renia na ringa raha.

¹⁶I ngekana igê na masusu ngaira ka hengarirerua o Moise mo Aroni, na mane ni vogasiha iana na Araha.

¹⁷Ma na ano ki avaga ma ki taku pusia o Tatano, ma nikâ o Abiramo ma na ahemata iana.

¹⁸Na gi ki agorata hurira na kariata ma ki ngaura na enoni era ngegana.

¹⁹I Sinai ngaira ka vogasia igê na kere puruka mane, na ataro iata, ga bani tagarahia renia na golo.

²⁰Ngaira ka urusia God raramohaga hunia renia na nununa na marâ, i ngêngê go ma.

²¹Ngaira ka bonotenia God, i bani hagatahira renigi na tagaraha raha iana i Esipito.

²²Na mena iana ka rako ma ka raha teha! Na tagaraha iana i Asi Memera ka hagamakuku ngavê.

²³Matena God ki obania, i hagaerasira ngavê na kariana, o Moise na kariana ki vi pusia God, ma na mangariaganiha iana ki pe erasira.

²⁴Ma hemuri ngaira ka usitenia na agua bâkoro, suria ga pe tongesuria na suruha iana na Araha.

²⁵Igê na ruhu iata ngaira ka tamasi ngurunguru ma ka pe tê viteana na Araha.

²⁶Vikê ngaia ki kanukanura ma ki tohe, vi ngaia ki page hagamesira igê na masusu hêga.

²⁷Ngaia ki tohe, vi tokorenira i pasita na enoni ahuroto, hanana ga mamahuara ma ka meme i ngegana.

²⁸Ma hemuri na kariana God ka hakunira na enoni, ga vogasia na ataro o Bala i Peori. Ngaira ka ngaugi na vogasi, ga sungigi tangara na ataro, na nununi na marâ purua.

²⁹Ngaira ka hagamangaria na Araha renigi na tauhata, ma na ringa raha ki tarahura.

³⁰Mo Pinehasi ki hagaitangira na enoni, ga vogasia na ataro, ma na ringa ki hato.

³¹Haganega tenia i ngekana, mataro me i ngekê, ki bê ki arâ, na enoni ka vi, vi na tarana ngekê ki hagabângenia, vi o Pinehasi ki na mane koro.

³²Igê na ve banga i Meriba na enoni ka hagamangaria na Araha ma ka hagamamasiaga apena o Moise.

³³Ngaira ka hagaera obana bâraha, ma ngaia ki pe tamasi takotako.

³⁴Ngaira ka pe nahuira ke me na enoni ahuroto, manga i bani bonasira na Araha.

³⁵Ma ngaira ka auragi hetarênge henira, ma ka râ surigi na tauhata ahuroto.

³⁶Ngaira ka vogasira na ataro. Vikê ngaira ka maratorana na manu, i tu igê na basu.

³⁷Ngaira ka vogasira na ataro i Kanani renira na kareta mane ma na hehene.

³⁸Ngaira ka nahuira ka me na kareta, ga pe tanugi rârâ ta na marâ era, ma na gaputa ka mamuaga i hinua iata.

³⁹Ngaira ka era renigi na tauhata. Ngaira ka paronga manga na êrâ, suria ga pe toto suria God na Araha.

⁴⁰Vikê na Araha ki mangariaga tangara na kariana, ma ki kitenira ngavê.

⁴¹Ngaia ki nakara vê tangara na enoni ahuroto, ma na merongata ka marungira.

⁴²Na merongata ka hagamamasiaga apeta, ma ki asa ngavê, vige gavatenira.

⁴³Hagarako na Araha ki hagatahira na kariana, ma ngaira ka guguruga tanga, ma na eraha ki ama ni aharêsira nga.

⁴⁴Naka ma i manga ngekana, ma na Araha ki rongora, ma ki aganarira, matena ga avarasia.

⁴⁵Ngaia ki takusia na suruheri iana henira, tahema i tamanira ma ki tako rugu renira, suria i takuira bâraha.

⁴⁶Ngaia ki katora na merongata, ga hagamamasiaga apeta, ka obarugu renira.

⁴⁷God Araha iamami, gu hagatahigami. Gu megami aporo tenigi na agua, mi totoko surigi. Megami kami page visigo koro ma kami page hagarahasia na atamu ma kami page rahesigo.

⁴⁸Ka visia raha na Araha, God na Isiraelita ka rahesia. Ka visia raha i ngekê, ma tare, ki bê ki arâ. I koro na enoni hato ka vi, vi: “Monari! Ge hagarahasia na Araha.”