Read Kahua KI 107 Bible Online

KI 107 - Kahua bible

KI 107

¹“Visia koro na Araha, suria ngaia ki koro! Na takuiha tarema iana ki asa, vige page hato!”

²Igamu na enoni hato, i bani hagatahigamu na Araha, mu hagarahasia nga vikana, suria i bani hagatahigamu tenira na merongami.

³Ngaia ki bani toregamu aporo tenigi na agua, mu mamahuara igê. Ngaia ki bani toregamu aporo tenigi i kerekê ma i kereso, i kere ataha ma i kere banu.

⁴Tani ka ata ni kumu ma vê igê na masusu hêga, ma ki bara tangara, vige tarahua na tara tanga ta na hinua raha, hanana vige goga igê.

⁵Ngaira ka magê ma ki mamata na riota, ma ka hagêguri era.

⁶Ma igê na mamasiaganiha iata ngaira ka avarasia na Araha, ma ngaia ki hagatahira tenigi na bagabevoani.

⁷Ngaia ki bêngenira suria na tara oto tanga ta na hinua raha, vige goga igê.

⁸I tuguhira, viga visia koro na Araha renia na takuiha tarema iana tangara ma renigi na mena, i bani tanugi tangara.

⁹Ngaia ki hagatonomira na enoni, i mamata na riota, ma ki hagamasura na ani, ga magê, renigi na marâ koro.

¹⁰Tani ka anumanuma ma ka goga igê na roto hono, igê na mamasiaganiha, igê na ruma ni hagaitangiha.

¹¹Renia ngaira ka pe marupegi na ramata iana na Araha ma ka pe tê viteana God raramohaga hunia.

¹²Ngaira ki meme na apeta renigi na tagaraha, ga higa. Ngaira ka votavota, ma ki mareha na enoni, vige tamanira.

¹³Ma igê na mamasiaganiha iata ngaira ka avarasia na Araha, ma ngaia ki hagatahira tenigi na bagabevoani.

¹⁴Ngaia ki toregi vê na anumanumaha ma na roto hono tenira, ma ki musigi na seni tenira.

¹⁵Ki tuguhira, viga visia koro na Araha renia na takuiha tarema iana tangara ma renigi na mena, i bani tanugi tangara.

¹⁶Ngaia ki kumukumugi na maa ni ruma, ga upupuga ma ka nganganihaga, ma ki barugigi na aeani igê na mabaha.

¹⁷Tani ka maeha renigi na tasi iata, ma ka hatamigi na mamasiaganiha renigi na erahata.

¹⁸Ngaira ki mamâga na obata renigi na ngêra, ma ka haga ni me renia.

¹⁹Ma igê na mamasiaganiha iata ngaira ka avarasia na Araha, ma ngaia ki hagatahira tenigi na bagabevoani.

²⁰Ngaia ki tamasi ma, ma ngaira ka komaga. Ngaia ki hagatahira tenia na matahu.

²¹Ki tuguhira, viga visia koro na Araha renia na takuiha tarema iana tangara ma renigi na mena, i bani tanugi tangara.

²²Ki tuguhira, viga visia koro renigi na vogasiha. Ki tuguhira, viga kirigi na ki ni vagevageha ma ka visigi na tauhana hato.

²³Tani ka tagetage i asi igê na haka, igê na haka ni tagaraha i asi.

²⁴Ngaira ka rigigi na tagaraha iana na Araha, na mena iana igê na matava tara.

²⁵Ngaia ki bonasia na roga, ki rogaroga raha, ma ki hagakirokiroa na asi.

²⁶Na navo ka ragegi ngavê na haka ma ka rahutenigi. Na mane igê na haka ka oga igê na perenga, ma ka hagêguri era.

²⁷Ngaira ka tapasu ma ka tariahehu, mangara na mane ga aripo na maata renigi na tonoha, ma ngaira ka tugupu.

²⁸Ma igê na mamasiaganiha iata ngaira ka avarasia na Araha, ma ngaia ki hagatahira tenigi na bagabevoani.

²⁹Ngaia ki hagamanapua na roga raha, ma ki hagapiova na asi.

³⁰Ngaira ka vagevage, renia i piova. Ma ngaia ki hagatahira, suria ga ata igê na sugu, ga tabea.

³¹Ki tuguhira, viga visia koro na Araha renia na takuiha tarema iana tangara ma renigi na mena, i bani tanugi tangara.

³²Ki tuguhira, viga kasia akê, matena ga hakuhaku na enoni. Ma ki tuguhira, viga hagarahasia i maata na maneraha, matena ga hekarigi.

³³Na Araha ki hagamamatarigi na ve oto ma na ve banga nikâ.

³⁴Ngaia ki katoa na mako ango, ki vora na masusu hêga, suria na enoni i ngekana ka era na parongata.

³⁵Ngaia ki katogi na masusu hêga, ka vora na rano, ma na mako avagavaga ka vora na ve banga.

³⁶Ngaia ki nakara na enoni, ga magê, ka oga i ngekana, ma ngaira ka tagarahia na hinua raha, ga goga igê.

³⁷Ngaira ka hasigi na mu ma na pariki na vaini, ma ka hungu ma ka ganora bâkoro igê na ngêra.

³⁸Ngaia ki koro tangara na kariana ma ki hagarakonira, ma na totoha ni puruka ka rakorako nikâ.

³⁹I ta na mateni na merongata ka teharira na kariana na Araha, ka hagamakira ma ka hagamamasiaga apeta bâraha, ma ka hagarugu obata.

⁴⁰Ma God ki merongasira na merongata, ma ki katora, ka ata ni kumukumu ma vê igê na bagamasusu raha, i hêga.

⁴¹Ma ngaia ki hagatahira na enoni, ga baguru, tenigi na mamasiaganiha iata. Ngaia ki hagarakonira na ahemata iata, mangara na totoha ni sipi.

⁴²Na enoni, ga tê viteana God, ka bâsia na tarana ngekê, ma ka obakoro renia. Ma ngaia ki hagamunira na enoni hato, ga pe tê viteana.

⁴³Na enoni, ga tako mataha, ki ararira, viga takusigi na tarani ngegê ma na takuiha tarema iana na Araha.