Read Kahua KI 109 Bible Online

KI 109 - Kahua bible

KI 109

¹[៩០] God, inê kê visigo raha. Siana ko ama ni munimuni nga.

²Na enoni era ma na mane ni hagaparunga ka erasiê ma ka hagaparu reniê.

³Ngaira ka visiê bera, ma ka tamasi erasiê purua ma, baharamu.

⁴Naka ma gê takuira ma kê nunginungi tangara, ma ngaira ka merongasiê.

⁵Ngaira ka barua na korohaku renia na eraha, ma na takuiha iaku renia na kiteniha.

⁶Gu atea ta na mane era, ke suria na merongaku. Gu naka na hitangita na merongana marena, ke tuguria hagaparu.

⁷Vikê ka hagatamasia ma ka suria bera, ma ka visia, vi na nunginungi iana ki na marâ tasi nikâ.

⁸I araria, i meme rêrê, ma ta na enoni ke têgi na nahuninga iana!

⁹I araria, i meme tenira na karena ma tenia na gete iana.

¹⁰Na karena ka araria, ge bagâgâga ma ke baganunungi. I araria, ge tarigenira hura tenia na ruma ahoge iata.

¹¹Na enoni, i kaone tenira, ki araria, i taugi hato vê na nahuninga iana. Na enoni mahuara ki araria, ge hanagogi ma ke erasigi na ara ni marâ hato, i tagarahigi.

¹²I araria, siana hagetage na enoni, i korokoro tanga, se vige takuira na kare banogo, i me tenira.

¹³I koro, ka meme hato na raraha iana, hanana ga bonotenia ngavê na atana.

¹⁴Na Araha ki araria, ge takusigi na eraha iata na uvarina, ma ke pe bonotenigi na tasi iana na kenana.

¹⁵Na Araha ki araria, ge takusigi tare na tasi iata, ma ke tako mu renira ma ngaira.

¹⁶Na mane ngekana ki asa hagetage, vige korokoro tangara na enoni. Ngaia ki merongasira ma ki nahuira ka meme na enoni matareha ma na ani ga baguru, ma na enoni, ga hagêguri era.

¹⁷Ngaia ki vagevagesigi na guhata. I araria, na guhata ka tarahua hete. Ngaia ki pe obanira na enoni, vige nahunigi na marâ koro. I araria, na marâ koro ke mu vê tenia.

¹⁸Na guhata ki manga na tuguni iana. Na guhata iana ki araria, ga tarahua so marena, manga na ve i rarona na apena ma na âvovo na surina.

¹⁹Na guhata ki araria, i aruhea manga na gahu ma ke manga na hogosina.

²⁰Araha, gu hagaitangira vikana na merongaku, suria ngaira ka guhariê ma ka hagatoraiê.

²¹Araha God, gu tamaniê, manga go bani surua. Gu hagatahiê, renia na takuiha tarema iamu ki koro.

²²Inê kê matareha ma kê baguru, ma kê mamasiaga i mêrihaku hagenani.

²³I sugia ma, be magahuru, manga na mamaru i manurahi ngavê, manga na rango, ga uhia râ.

²⁴Na buru ni ugaku ka marumarusiga, suria gê pe ngêngê. Inê kê rataga ngavê, ma na suriku ma ka oga.

²⁵Matena na enoni ka bâsia, ngaira ka rurusiê. Na merongaku ka babaringe reniê.

²⁶Araha God iaku, gu tamaniê! Gu hagatahiê renia na takuiha tarema iamu!

²⁷Gu hagagirarara na merongaku, vi igo nga ko hagatahiê.

²⁸Henaka ngaira ka guhariê, ma igo ko page korokoro tangê. Gu teharira na merongaku, ma inê, na kariamu, be ageage.

²⁹Gu hagamakira bâraha na merongaku, hanana i nahuira na makiha iata.

³⁰Inê be visia koro bâraha na Araha, ma be hagarahasia igê na hagarahenga iata na enoni.

³¹Renia ngaia ki anumasia na enoni matareha, ma ki hagatahia tenira na enoni, ga suria ki meme.