Read Kahua KI 118 Bible Online

KI 118 - Kahua bible

KI 118

¹Visia koro na Araha, suria ngaia ki koro, ma na takuiha tarema iana ki asa, vige page hato.

²Na Isiraelita ki ararira, ge vivi: “Na takuiha tarema iana ki asa, vige page hato.”

³Na mane ni hagarahenga ki ararira, ge vivi: “Na takuiha tarema iana ki asa, vige page hato.”

⁴Na enoni, ga rahesia God, ki ararira, ge vivi: “Na takuiha tarema iana ki asa, vige page hato.”

⁵Igê na mamasiaganiha iaku inê kê avarasia na Araha. Ngaia ki aganariê ma ki hagatahiê.

⁶Na Araha ki tamaniê, ma ki asa, be magu. Na ta ka girara na enoni, vige tanua tangê?

⁷Na Araha ki tamaniê. Inê kê pe makuku tenira na merongaku, ma inê kê page teharira.

⁸Na hagêguringa togo renia na Araha ki teharia na hagêguringa togo renira na enoni.

⁹Na hagêguringa togo renia na Araha ki teharia na hagêguringa togo renira na maneraha.

¹⁰Rako na merongaku ka oga rihiê, ma inê kê hagaerasira ngavê renia na raramohana na Araha.

¹¹Ngaira ka oga rihiê, ki taku, ma inê kê hagaerasira ngavê renia na raramohana na Araha.

¹²Ngaira ka akuriê mangara na manivo. Ngaira ka manga na gi, i vatahu. Ma inê kê hagaerasira ngavê renia na raramohana na Araha.

¹³Ngaira ka ramo ka sugariê, ma kê haga ni vota, ma na Araha ki tamaniê.

¹⁴Na Araha ki na raramohaku, i hagaramoniê. Ngaia ki bani hagatahiê.

¹⁵Rongora na kariana God ka ngerengere vagevage i ruma iata, suria ga teha ma ka kiki, ka vivi: “God raramohaga hunia ngaia nge!

¹⁶Na raramohana ki katogia, ka teha! Ngaia ki rako teha igê na hearihatana!”

¹⁷Inê ki asa be me, ma kê mauri hete. Inê kê tarohenigi na tauhana na Araha.

¹⁸Ngaia ki bani hagaitangiê bâraha, ma ki pe hagamesiê.

¹⁹Mu tangahigi na maa ni Ruma ni Rotu. Inê be banu vê ma be visia koro na Araha.

²⁰Na maa ni ruma ngekê ki râ tanga na Araha. Na enoni ma, ga koro ma oto na parongata, ka girara ga bêbanu igê.

²¹Inê kê visigo koro, Araha, suria go aganariê, suria go katoê, kê teha.

²²Na u, ga usitenia na mane, ga totora ruma, suria ga vi ma, vi pe koro, ngaia ki vora na u na rangata.

²³Na tauhana na Araha nga! Igia ka konetenia teha ngavê!

²⁴I ngekê ki na tangiana iana na Araha. Ge vagevage ma ke ageage!

²⁵Igami kami avarasigo, Araha. Gu hagatahigami! Igami kami nungigo, ko vategami na ramana.

²⁶God ke korokoro tangara na enoni, ga rahesia ikê. Igami kami nungia na Araha, ki korokoro tangagamu, mu râ me i Ruma ni Rotu ikê.

²⁷Na Araha ngaia nga ki God nga, ma ki bani koro tangagia. Mu karikaringenigi na arani na apinige. Mu vagevage ma kamu rihia na bea ni vogasiha.

²⁸Igo ki na God iaku, ma inê be visigo koro, Araha, ma be tarohenia na raramohamu raha.

²⁹Visia koro na Araha, suria ngaia ki koro, ma na takuiha tarema iana ki asa, vige page hato.