Read Kahua KI 119 Bible Online

KI 119 - Kahua bible

KI 119

¹Ga babarisi na enoni, ga matarotaro na parongata, ma ka marupegi na ramata iana na Araha.

²Ga babarisi na enoni, ga arâ surigi na tamasiga iana, ma ka tê viteana i mêrihata hagenani.

³Ga babarisi na enoni, ga mareha vige tasi, ma ka toto surigi na obaniha iana na Araha.

⁴Araha, igo ko bani vategami na ramata iamu, ma ko bonasigami, vigami marupegi maninga.

⁵Inê kê naasia bâraha, be toto surigo, matena gê arâ surigi na tamasinga iamu.

⁶Manga gê takusigi tare na ramata hato iamu, vikê ki asa iaku, vi ve maki.

⁷Inê be visigo raha i mêrihaku matarotaro, matena gê hagesuringenigi na takotako oto iamu.

⁸Inê be têgi na ramata iamu. Siana hagetage ko paniê.

⁹Manga i he na enoni haoru ki girara i paronga matarotaro? Ki tuguhia, i marupegi na ramata iamu.

¹⁰Inê be toto surigo i mêrihaku hagenani. Gu tamaniê, hanana siana kê aharêngigi na ramata iamu.

¹¹Inê kê bani nakagi na ramata iamu i na aitangihaku, hanana siana kê guguruga tangago.

¹²Inê kê hagarahasigo, Araha. Gu hagesuriê renigi na obaniha iamu.

¹³Inê be tarohenigi na ramata hato, go bani visigi tangê.

¹⁴Inê kê mage ni râ surigi na ramata iamu teharigi na ruruguha raha.

¹⁵Inê kê hagesuringenigi na tamasinga iamu. Inê kê takotako renigi na hagesuringa iamu.

¹⁶Inê kê vagevagesigi na ramata iamu. I asa iaku, be bonotenigi na tamasinga iamu.

¹⁷Araha, gu korokoro tangê, na kariamu, hanana gê mauri, ma kê arâ surigi na hagesuringa iamu.

¹⁸Gu mavesia na obaku, hanana ve giraragi na marâ koro ma na monariha igê na ramata iamu.

¹⁹Inê kê mamahuara ma i maveta ikê. Siana ko pinihigi na ramata iamu teniê.

²⁰Inê kê angisia bâraha, vi be aitangisigi tare na takotako iamu.

²¹Igo ko ramonira na enoni paroparo. I era ngavê tangara na enoni, ga aharêngigi na ramata iamu.

²²Gu hagatahiê tenigi na guhata ma na kasi rurunga iata, suria inê kê marupegi na ramata iamu.

²³Na maneraha ka harikato reniê, ma inê be takotako renigi na hagesuringa iamu.

²⁴Na tamasinga iamu ka hagakoro obaku, ma ka vateê na takotako koro.

²⁵Inê kê tâ i ano. Gu hagamauriê, manga go bani surua.

²⁶Inê kê visia mataha na mêrihaku hagenani, ma igo ko aganariê. Gu hagesuriê renigi na ramata iamu.

²⁷Gu tamaniê, be aitangisigi maninga na ramata iamu, ma inê be takotako renigi na mena iamu.

²⁸Inê ki rugu bâraha na obaku. Go hagaramoniê, manga go bani surua.

²⁹Gu marupeê tenia na tara ni hagaparunga. Gu takuiê ma ku hagesuriê renigi na ramata iamu.

³⁰Inê kê bani atea na tara ni monariha. Inê kê takusigi tare na tamasinga iamu.

³¹Inê kê oto surigi na hagesuringa iamu, Araha. Siana kê raruni era renigo.

³²Inê be hata ni têgi na ramata iamu, manga vigo hagaraha nga na aitangiha tangê.

³³Araha, gu hagesuriê renigi na girarani na ramata iamu, ma inê be marupegi tare.

³⁴Gu ramatenigi na ramata iamu tangê, hanana be toto surigi ma be marupegi i mêrihaku hagenani.

³⁵Gu tamaniê, be arâ surigi na ramata iamu, suria gê vagevagesigi.

³⁶Gu hagaobaniê renigi na tamasinga iamu teharigi na ruruguha.

³⁷Gu tamaniê, hanana siana kê takusigi na marâ purua. Gu korokoro tangê, manga go bani surua.

³⁸Gu hagamonaria na suruha iamu tangê, na kariamu, na suruha iamu tangara na enoni, ga tê viteamu.

³⁹Gu hagatahiê tenigi na guhata, gê magutenigi. Na takotako iamu ka koro teha ngavê!

⁴⁰Inê kê obania ni têgi na ramata iamu. Gu hagamauriê, suria i oto na tauhamu.

⁴¹Araha, gu hagabângenia na takuiha tarema iamu tangê, ma ku hagatahiê, manga go bani surua.

⁴²Vikê inê kê girara gê aramira na enoni, gê guhariê, suria gê hagêguri togo renigi na tamasinga iamu.

⁴³Gu tamaniê, hanana ve tamasi monari tare, suria ga raruni togo renigi na takotako iamu.

⁴⁴Inê be ama ni marupegi nga na ramata iamu, tare ma tarema.

⁴⁵Inê ki mataku tangê, gê hagaotoa na mauriha iaku, suria gê uhungia, vigê arâ surigi na hagesuringa iamu.

⁴⁶Inê be tamasigi na ramata iamu tangara na maneraha, ma ki asa iaku, be maki.

⁴⁷Inê kê vagevagesigi na ramata iamu, suria gê tenigi bâraha.

⁴⁸Inê kê hagahigasigi na ramata iamu, gê tenigi. Inê be takotako renigi na hagesuringa iamu.

⁴⁹Gu takusia na suruha iamu tangê, na kariamu, suria gê raruni togo renia.

⁵⁰Inê kê ramoramo igê na mamasiaganiha iaku, suria na suruha iamu ki hagamauriê.

⁵¹Henaka na enoni paroparo ka rurusiê tare, ma inê kê pe murisigegi na ramata iamu.

⁵²Na tamasinga iamu i nago kere vê noga inê kê takusigi aporo, ma ngaira ka hagagatagataniê.

⁵³Matena gê bâsira na enoni era, ga aharêngigi na ramata iamu, inê kê mangariaga teha.

⁵⁴I maveta ikê, gê mamahuara igê, na ramata iamu ka na ki iaku.

⁵⁵Surigi na bungiani inê kê takusigo, Araha, ma kê takotako renigi na ramata iamu.

⁵⁶Inê kê vagevage, suria gê têgi na tamasinga iamu.

⁵⁷Araha, igo getego ma kê obanigo. Inê kê surua, vigê têtê viteamu.

⁵⁸Inê kê nungigo i mêrihaku hagenani, hanana go takuiê, manga go bani surua.

⁵⁹Inê kê bani bâ i mêrihaku, ma kê surua, vigê arâ surigi na hagesuringa iamu.

⁶⁰Inê kê pe hagarihu, ma kê hata ni têgi na ramata iamu.

⁶¹Henaka na enoni ka bani tutu kariê, ma inê kê pe bonotenigi na ramata iamu.

⁶²Igê na gupuni na bungiani inê kê rite, hanana gê visigo raha renigi na katoha oto iamu.

⁶³Inê ki na tamata na enoni hato, ga rahesigo, ma na enoni hato, ga têgi na ramata iamu.

⁶⁴Na maveta hagenani ki hagabângenia na takuiha tarema iamu. Araha, gu hagesuriê renigi na ramata iamu.

⁶⁵Araha, igo ko bani hagamonaria na suruha iamu, suria igo ko koro tangê, na kariamu.

⁶⁶Gu vateê na tako mataha ma na giraraha, suria inê kê tongesurigi na ramata iamu.

⁶⁷Matena i mamênga, vigu hagaitangiê, inê kê râ tasi, ma i ngekê inê kê tê viteamu.

⁶⁸Igo ko koro teha ngavê ma nikâ na tauhamu! Gu hagagirarê renigi na ramata iamu.

⁶⁹Na enoni paroparo ka hagahagaparu reniê, ma inê kê tê viteamu i mêrihaku hagenani.

⁷⁰Na enoni ngegana ka bekabekaga, ma inê kê vagevagesigi hete na ramata iamu.

⁷¹Na hagaitangiha, i tarahuê, ki koro tangê, suria i hagagirarê renigi na ramata iamu.

⁷²Tangê inê, na ramata iamu ka teharigi na ara ni haga hato i maveta hagenani.

⁷³Igo ko hagavoraê ma ko marupeê. Gu vateê na aitangiha, hanana gê hagesuringenigi na ramata iamu.

⁷⁴Na enoni, ga rahesigo, ka page vagevagesiê, matena ga bâsiê, gê hagêguri togo renia na suruha iamu.

⁷⁵Araha, inê kê bani girara, vi na katoha iamu ka oto, ma ko hagaitangiê, suria go toto hesuri.

⁷⁶Gu hagaramoniê renia na takuiha tarema iamu, manga go bani surua tangê, na kariamu.

⁷⁷Gu takuiê ma ku hagamauriê, suria inê kê vagevagesigi na ramata iamu.

⁷⁸Gu hagamakira na enoni, ga pe tê viteamu, suria ga hagatoraiê, ma tangê inê, inê be takotako renigi na hagesuringa iamu.

⁷⁹Na enoni, ga rahesigo, ka râ me i pasiku, hanana ge aitangisigi na ramata iamu.

⁸⁰Gu katoê, be têgi maninga ngavê na ramata iamu, hanana siana kê maki.

⁸¹Araha, inê ki meme na apeku, suria gê naasigo, vigo hagatahiê. Inê kê raruni togo renigi na tamasinga iamu.

⁸²Inê kê hagamera maaku, suria gê bâbâ renia na marâ, go bani surua. Ma inê kê hagate, kê vi: “I na keta ko page tamaniê igê?”

⁸³Henaka gê manga na kakagana na apira, ma inê kê pe bonotenigi na ramata iamu.

⁸⁴I arihu me noga, manga i he kê naasigo? I na keta ko page hagaitangira igê na enoni, ga merongasiê, na kariamu?

⁸⁵Na enoni paroparo, ga haritohegi na ramata iamu, ngaira ka suta kariê.

⁸⁶Na ramata hato iamu ka marisini, viga tongesurigi. Na enoni ka merongasiê purua ma. Gu tamaniê!

⁸⁷Ngaira ka haga ni nahuiê be meme, ma inê kê ama ni tê viteamu nga.

⁸⁸Go korokoro tangê igê na takuiha tarema iamu, hanana gê marupegi na ramata iamu.

⁸⁹Na tamasinga iamu, Araha, ka goga tare ma tarema. Ngaigi ki tâtâ nga i pasimu.

⁹⁰Na totosuriha iamu ki goga tare, ki bê ki arâ. Igo ko bani naka na maveta igê na atohana, ma ki asa, vige guru tenia.

⁹¹Na ara ni marâ hato ka goga mataro me i ngekê, suria igo ko bonasira vikana, ma ngaira ka tê viteamu.

⁹²Manga ve pe vagevagesigi na ramata iamu, inê be bani me renigi na mamasiaga iaku.

⁹³I asa iaku hagetage, be bonotenigi na hagesuringa iamu, suria igo ko hagamauriê renigi.

⁹⁴Inê ki na kariamu. Gu hagatahiê! Inê kê uhungia tare, hanana gê arâ surigi na ramata iamu.

⁹⁵Na enoni era ka ahi kariê, viga nahuiê kê meme, ma inê be takotako renigi na ramata iamu.

⁹⁶Inê kê bani girara, vi na ara ni marâ hato ka pe teha, nga noga ma na ramata iamu ka teha.

⁹⁷Inê kê tenigi bâraha na ramata iamu. Inê kê takotako renigi igê na tangiani hagenani.

⁹⁸Na hagesuringa iamu ki goga tare igê na aitangihaku, ma ki katoê, kê takotako mataha teharira na merongaku.

⁹⁹Na aitangiha iaku ki teharigi na anita na mane hato ni hagesuringa, suria gê takotako renigi na hagesuringa iamu.

¹⁰⁰Inê kê tako mataha teharira na me raha, suria gê oto surigi na tamasinga iamu.

¹⁰¹Inê kê kitenigi na tarani, ga pe oto, hanana gê tê viteamu.

¹⁰²Inê kê pe hagêrahu ni râ surigi na hagesuringa iamu, suria igo kanigo hagesuriê.

¹⁰³Na hagesuringa iamu ki mamaki ngavê tangê teharia na pirui.

¹⁰⁴Na ramata iamu ka katoê, kê tako mataha. Tahema inê kê kitenigi na tarani hato, ga râ tasi.

¹⁰⁵Na tamasinga iamu ki manga na ahame, i mavesiê, hanana gê bâsia na tara.

¹⁰⁶Inê be hagamonaria na tohenga iaku, vigê arâ surigi na hagesuringa iamu.

¹⁰⁷Inê kê mamasiaga teha ngavê, Araha. Gu hagamauriê, manga go bani surua.

¹⁰⁸Gu aganariê, Araha, matena gê visigo koro, ma ku hagesuriê renigi na ramata iamu.

¹⁰⁹Na mêriha iaku ki goga tare igê na perenga, ma ki asa, be bonotenigi na ramata iamu.

¹¹⁰Na enoni era ka tutu kariê, ma inê kê pe guguruga tangago.

¹¹¹Inê kê têgi na ramata iamu tare, ki bê ki arâ. Ngaigi ki hagakoro obaku bâraha.

¹¹²Inê kê bani vi, vigê marupegi na ramata iamu, tare, mataro me kê meme.

¹¹³Inê kê kitenira na enoni, ga obaherua renigo, Araha, ma kê tenigi bâraha hete na ramata iamu.

¹¹⁴Igo ko anumasiê ma ko marupeê. Inê kê hagêguri togo renia na suruha iamu.

¹¹⁵Mu tari era, igamu na enoni era, hanana gê marupegi na ramata iana God iaku.

¹¹⁶Gu hagaramoniê, manga go bani surua, hanana gê mauri ma kê pe nanasi baguru.

¹¹⁷Gu tamaniê, hanana ve ape tatara, ma be takusigi tare na ramata iamu.

¹¹⁸Igo ko usitenira na enoni hato, ga aharêngigi na ramata iamu. Ngaira ka hagahagaparu ma ka harikato purua ma.

¹¹⁹Igo ko katora na enoni era i maveta manga na roro. Tahema inê kê tenigi na hagesuringa iamu.

¹²⁰Inê kê tatata, suria gê magutenigo, ma kê magutenigi nikâ na suriha iamu.

¹²¹Na tauhaku ka koro ma ka oto. Siana ko paniê tangara na merongaku.

¹²²Gu suru tangê, hanana vigu tamaniê, na kariamu. Siana ka merongasiê na enoni, ga erataga.

¹²³Inê kê hagamera maaku, suria gê naasia na hetamaniha tenigo, hanana vigo hagatahiê, manga go bani surua.

¹²⁴Go korokoro tangê renia na takuiha tarema iamu, ma ku hagesuriê renigi na ramata iamu.

¹²⁵Inê ki na kariamu. Gu vateê na aitangiha, hanana gê aitangisigi na hagesuringa iamu.

¹²⁶Araha, gu gagêmaga i ngekê, suria na enoni ka aharêngigi na ramata iamu.

¹²⁷Inê kê tenigi na ramata iamu teharia na golo, teharia na golo tararina.

¹²⁸Tahema inê kê arâ surigi na tamasinga hato iamu. Inê kê kitenigi na ara ni tarani era.

¹²⁹Na tamasinga iamu ka koro teha ngavê! Inê kê arâ surigi i mêrihaku hagenani.

¹³⁰Na hagararinga renigi na tamasinga iamu ki mavesigi na obata na enoni, ga hite, ma ki katora, ka tako mataha.

¹³¹Inê kê tangakuhigi na ramata iamu ma kê angisigi bâraha.

¹³²Gu ahariê ma ku korokoro tangê, manga go koro tangara na enoni hato, ga takuigo.

¹³³Gu hagaotoê, manga go bani surua. Siana na eraha ki aharêsiê.

¹³⁴Gu hagatahiê tenira na enoni, ga hagamamasiaga apeku, hanana gê marupegi na ramata iamu.

¹³⁵Gu tamaniê ma ku mavesia na obaku, ma ku hagesuriê renigi na ramata iamu.

¹³⁶Inê kê angiangi bâraha, suria na enoni ka aharê igê na ramata iamu.

¹³⁷Araha, na tauhamu ka oto, ma ka oto nikâ na ramata iamu.

¹³⁸Igê na otoha ma na monariha iamu igo ko bani vategami na ramata, ga oto.

¹³⁹Na mangariaganiha iaku ki tarê manga na gi i obaku, suria na merongaku ka pe gagêmaga renigi na ramata iamu.

¹⁴⁰Na suruha iamu ka tahetara renia vi i monari. Inê, na kariamu, kê tenia bâraha.

¹⁴¹Henaka inê na enoni purua, ma na enoni getera ka ruhiê, inê ki asa, be bonotenigi na hagesuringa iamu.

¹⁴²Na otohamu ki asa, vige page hato, ma na ramata iamu ka monari tare.

¹⁴³Ga bani tarahuê na anumanumaha ma na bagabevoani, ma na ramata iamu ka hagakoro obaku.

¹⁴⁴Na hagesuringa iamu ka oto tare. Gu vateê na aitangiha, hanana gê mauri.

¹⁴⁵Araha, inê kê avarasigo i mêrihaku hagenani. Gu aganariê, ma inê be tê viteamu.

¹⁴⁶Inê kê avarasigo. Gu hagatahiê, hanana ve marupegi na ramata iamu.

¹⁴⁷Igê na kahuagana na tangiana inê kê avarasigo. Gu tamaniê, suria gê raruni togo renia na suruha iamu.

¹⁴⁸Surigi na bungiani hagenani inê kê bâbâ ma, hanana gê takotako renigi na hagesuringa iamu.

¹⁴⁹Araha, gu aganariê renia na takuiha tarema iamu. Gu takuiê ma ku anumasia na mêriha iaku.

¹⁵⁰Na enoni, ga merongasiê, ka hagarangiê me noga. I asa hagetage iata, vige marupegi na ramata iamu.

¹⁵¹Ma igo ko ngahisiê, Araha, ma na ramata hato iamu ka monari tare.

¹⁵²I kere vê noga inê kê bani giraragi, vi na hagesuringa iamu, ko bani nakagi, ka goga tare, ki bê ki arâ.

¹⁵³Araha, gu rigia na mamasiaganiha iaku ma ku hagatahiê, suria inê kê pe bonotenigi na ramata iamu.

¹⁵⁴Gu rohe pusiê ma ku hagatahiê. Gu hagamauriê, manga go bani surua.

¹⁵⁵Na enoni era ki asa, vige tahi, suria ngaira ka aharêngigi na ramata iamu.

¹⁵⁶Araha, na takuiha iamu ki raha teha. Gu takuiê ma ku hagatahiê.

¹⁵⁷Ka rako na merongaku ma na enoni, ga hagamamasiaga apeku, ma inê kê pe murisigegi na ramata iamu.

¹⁵⁸Inê kê makimaki tenira na enoni, ga murisigego, suria ga pe marupegi na ramata iamu.

¹⁵⁹Bâ, Araha, inê kê tenigi na hagesuringa iamu. Na takuiha iamu ki goga tare. Gu anumasia na mêriha iaku.

¹⁶⁰Na monariha ka na hunani na tamasinga iamu, ma na ramata hato iamu ka oto, ma ki asa, vige page hato.

¹⁶¹Na maneraha ka merongasiê purua, ma inê kê pane henigi na ramata iamu.

¹⁶²Inê kê vagevagesigi bâraha na suruha iamu, manga na enoni i vagevagesigi na ruruguha raha.

¹⁶³Inê kê kitenigi na hagaparunga hatohato, ma kê makimaki tenigi ma kê tenigi hete na ramata iamu.

¹⁶⁴Hagepi i na ara ni tangiani inê kê visigo koro renigi na tamasinga oto iamu.

¹⁶⁵Na enoni, ga tenigi na ramata iamu, ka oga igê na marapeha, ma ki asa ta na marâ, vige hagavotarira.

¹⁶⁶Inê kê naasia na tahinga tenigo, Araha, ma kê marupegi na ramata iamu.

¹⁶⁷Inê kê arâ surigi na hagesuringa iamu. Inê kê tenigi i mêrihaku hagenani.

¹⁶⁸Inê kê marupegi na ramata ma na hagesuringa iamu. Igo ko girara na mêrihaku hagenani.

¹⁶⁹Araha, gu aganaria na avarasiha iaku. Gu hagamataha obaku, manga go bani surua.

¹⁷⁰Gu aganaria na nunginungi iaku, ma ku hagatahiê, manga go bani surua.

¹⁷¹Inê be hagarahasigo tare, suria go hagesuriê renigi na ramata iamu.

¹⁷²Inê be kirigi na ramata iamu, suria ga oto na tamasinga hato iamu.

¹⁷³Gu nanê tare, hanana go tamaniê, suria inê kê arâ surigi na ramata iamu.

¹⁷⁴Inê kê naasia bâraha na tahinga tenigo, Araha. Inê kê vagevagesigi bâraha na ramata iamu.

¹⁷⁵Gu hagamauriê, hanana gê hagarahasigo. Na hagesuringa iamu ke tamaniê.

¹⁷⁶Inê kê tarupe manga na sipi, i tasi. Gu gariê, na kariamu, suria gê takusigi tare na ramata iamu.