Read Kahua KI 135 Bible Online

KI 135 - Kahua bible

KI 135

¹Hagarahasia na Araha! Igamu na kariana na Araha, mu hagarahasia na atana.

²Mu hagarahasia na Araha, igamu mu oga i ruma iana na Araha, i Ruma ni Rotu iana God iaka.

³Mu hagarahasia na Araha, suria ngaia ki koro. Mu hagarahasia, ke rongo raha na atana, suria ngaia ki mamahata.

⁴Ngaia ki bani atea o Jakobo tanga marena, ma na Isiraelita nogata.

⁵Inê kê girara, vi na Araha iaka ki teha. Ngaia ki teharira na ara ni ataro hato.

⁶Ngaia ki katogi na ani ma vê na marâ, i obanigi, i vavearo ma i maveta, i asi ma i na rutuni.

⁷Tenigi na botoni na maveta ngaia ki katogi na tarê heroga. Ngaia ki katogi na marangea igê na roga raha, ma ki nakagi na roga, ka hura tenigi na atohata.

⁸I Esipito ngaia ki nahuira ka meme na bêbê ni kare hato igê, na enoni ma na marâ getera nikâ.

⁹I ngekana ngaia ki katogi na mena ma na tagaraha raha, hanana i hagaitangira na maneraha ma na kariana hato.

¹⁰Ngaia ki erasira ngavê na enoni i na agua getegi, ma ki nahuira ka me na maneraha raramohaga igê.

¹¹Ngaira ka no Sihone, na maneraha iata na Amorita, o Oko, na maneraha ni Basani, ma ara ni maneraha hato i Kanani.

¹²Ngaia ki haganahunira na Isiraelita, na kariana, renigi na agua ma na mako iata.

¹³Na atamu, Araha, ki rongo raha tare ma tarema. Na enoni hato ka page hagarahasigo.

¹⁴Na Araha ki page rohe pusira na kariana, ma ki page takuira ma ki tamanira.

¹⁵Na ataro iata na enoni getera na enoni ka tagarahira renigi na siliva ma na golo.

¹⁶Ngaira ka tonga na harata, ma ki asa, vige tamasi. Ngaira ka tonga na maata, ma ki asa, vige bâbâ.

¹⁷Ngaira ka tonga na karingata, ma ki asa, vige rongorongo, ma ki asa, vige manavaso.

¹⁸Na enoni hato, ga tagarahira ma ka hagarapera, ke usurira na nununi na ataro iata!

¹⁹Mu hagarahasia na Araha, igamu na Isiraelita! Igamu na mane ni hagarahenga iana God, mu hagarahasia.

²⁰Mu hagarahasia na Araha, igamu na raraha iana o Levi. Igamu hato mu rahesia, mu hagarahasia.

²¹Mu hagarahasia na Araha i Sione, i Jerusaleme na hinua iana. Hagarahasia na Araha!