Read Kahua KI 139 Bible Online

KI 139 - Kahua bible

KI 139

¹[៩៨] Araha, igo ko bani hahutugiê, ma ko aitangisiê ngavê.

²Igo ko giraragi na ara ni tauhaku hato. Ma na takotako iaku ki asa, vige pinihi tenigo.

³Igo ko boreteniê, matena gê tagara ma matena gê mamaro. Igo ko giraragi na ara ni parongaku hato.

⁴Matena gê nanê ni tamasi, igo ko bani giraragi na ta kê page visigi.

⁵Igo ko ngahisiê ma ko rihiê, ma ko anumasiê renia na raramohamu.

⁶Igo ko girarê erasiê, ma inê kê pe girara, i tanu hega.

⁷I he be gava igê panigo? I he be ahi igê tenigo?

⁸Manga be akê i vavearo, igo ko bani oga i ngekana. Manga ve so i pasita na enoni, ga me hato, igo ko bani goga i ngekana.

⁹Manga ve gaha bêkê, se goga kereso ngavê,

¹⁰igo ko bani oga i ngekana, hanana go bêngeniê ma ko tamaniê.

¹¹Inê kê girara gê nungia na roto hono ki rotosiê, ma kê girara gê nungia na marara mave ki bungisiê.

¹²Ma na roto hono ki pe roto tangago, ma tangago na bungiana ki mave manga na tangiana. Na roto hono ma na marara karu tagenaterua ma tangago.

¹³Igo ko hagavorê, na ara ni agua taro me i apeku. Igo ko hagatotoê i obana kenaku.

¹⁴Inê kê visigo raha, suria i tuguhira na enoni, viga hagarahasigo. Na ara ni tagaraha iamu ka hagakonera ngavê na enoni. Inê kê bani girara ngavê i mêrihaku hagenani.

¹⁵Matena gê haganega kê raha i obana kenaku, igo ko goga i ngekana, suria igo ko hagatotogi maninga na suriku.

¹⁶Matena gê goga pinihi i ngekana, igo ko aitangisiê. Igo ko bani bâsiê, ma kê kahu vora me. Matena gê mamênga be voravora, igo ko bani segegi so igê na buka iamu na harisi, gê page mauri surigi.

¹⁷I bara tangê ve aitangisigi na takotako iamu, ma ngaigi ki na marâ manimani tangê, ma ka rako ngavê.

¹⁸I asa be tomanigi, suria ga rako teharigi na one. Matena gê riterite, igo ko ngahisiê mênga.

¹⁹God, inê kê tenia bâraha, vigu hagamesira na enoni era! Inê kê tenia bâraha, vi na ani, ga nahu enoni, ke nakê so mareku.

²⁰Ngaira ka tamasi erasigo. Ngaira ka harikato renigo.

²¹Araha, inê kê kitenira ngavê na ani, ga kitenigo. Inê kê ruhira ngavê na ani, ga merongasigo.

²²Inê kê kitenira ngavê i mêrihaku hagenani. Ngaira ka na merongaku nogaku.

²³God, gu hahutugiê ma ku aitangisia na aitangihaku. Gu uhungiê, hanana gu giraragi na takotako iaku.

²⁴Manga go tarahua ta na marâ era i pasiku, gu hagaporosiê tangago.