Read Kahua KI 145 Bible Online

KI 145 - Kahua bible

KI 145

¹[១០៤] Inê be hagarahasigo, Araha God iaku. Inê be visigo koro tare ma tarema.

²Inê be visigo koro i na ara ni tangiani. Inê be visigo raha tare ma tarema.

³Igo, Araha, ko teha, ma ki tuguhigami, vigami hagarahasigo ngavê. Igami kami pe aitangisigo, suria go raha teha.

⁴Na raraha ma na raraha ka page hagarahasigo renigi na tauhamu. Ngaira ka page tarohenigi na tagaraha raha iamu.

⁵Ngaira ka page tamasigi na raramohamu ma na bâbâhamu. Ma inê be takotako renigi na mena iamu.

⁶Na enoni ka page tamasigi na tagaraha raha iamu, ma inê be tarohenigo, vi igo ko teha.

⁷Ngaira ka page tamasi renigi na korohamu, ma ka page kirigi na komaniha iamu.

⁸Na mahatanga ma na takuiha karu teha i pasina na Araha. Ngaia ki piringiape, ma na takuiha iana ki asa, vige page hato.

⁹Ngaia ki koro tangara na enoni hato, ma ki takuira na ara ni marâ hato, i bani hagavorara.

¹⁰Na marâ hato, go bani hagavorara, ka page hagarahasigo, ma na kariamu hato ka page visigo koro.

¹¹Ngaira ka page tamasia na bâbâhana na arahanga iamu, ma ka page tarohenia na raramohamu raha.

¹²Vikê na enoni hato ka page giraragi na tagaraha raha iamu ma na bâbâhana raha na arahanga iamu.

¹³Na arahanga iamu ki goga tare, ma igo ko Araha tare nga. Na Araha ki hagamonarigi tare na suruha iana. Na tauhana hato ka hagabângenia na korohana.

¹⁴Ngaia ki tamanira na enoni igê na mamasiaganiha iata, ma ki hagamahara na ani, ga tora higa.

¹⁵Na marâ hato, ga mauri, ka tako togo renigo, ma igo ko hagangêra igê na matena tanga.

¹⁶Igo ko hagangêra masu, ma ko vatera na obaniha iata na enoni hato.

¹⁷Na Araha ki oto igê na ara ni marâ hato, i tanugi, ma na tauhana hato ka hagabângenia na takuiha iana.

¹⁸Ngaia ki ngahisira na ani, ga avarasia, na ani ga avarasia igê na monariha.

¹⁹Ngaia ki vatera na obaniha iata na ani, ga hagahigasia. Ngaia ki aganarigi na angiha iata, ma ki hagatahira.

²⁰Ngaia ki marupera na enoni hato, ga takuia, ma ki page erasira ngavê na enoni era.

²¹Inê be hagarahasia tare na Araha. Na marâ hato, i bani hagavorara, ki ararira, viga hagarahasia God tare ma tarema.