Read Kahua KI 147 Bible Online

KI 147 - Kahua bible

KI 147

¹Hagarahasia na Araha! I ararigia, ga kiki ka visia raha God iaka. I tuguhigia, viga hagarahasia, hanana ga vagevage.

²Na Araha ki tagarahia aporo Jerusaleme. Ngaia ki torera aporo na enoni, ga bani henahuraura.

³Ngaia ki hagamanapura na enoni, i rugu na obata, ma ki baraigi na maara iata.

⁴Ngaia ki bani takusigi, vi gi hita na higu, ma ki hêtata hehegitigi.

⁵Na Araha iaka ki bâ hahaneaga ma ki raramohaga hunia. Na takoha mataha iana ki pe araria ta na marâ, vige maratorana.

⁶Ngaia ki ragera akê na enoni igê na mamasiaganiha iata, ma ki kasira so i ano na enoni era.

⁷Mu kiria na Araha ma kamu visia raha. Mu tarugigi na gita tanga God iaka.

⁸Ngaia ki nakagi na vaha i vavearo. Ngaia ki hagarangisia na maveta, ma ki katogi na go, ka taba igê na hungani.

⁹Ngaia ki hagangêra na marâ, ga mauri i ano, ma nikâ na kareta na manu, matena ga angiangi.

¹⁰Ngaia ki pe ageage renira na hosi ramo, se renira na mane ni me, ga pe magu.

¹¹Ma ngaia ki ageage hete renira na ani, ga hagahigasia, renira na ani, ga raruni togo renia na takuiha tarema iana.

¹²Jerusaleme, mu hagarahasia na Araha. Sione, mu visia raha na God iami.

¹³Ngaia ki katoa ki nganganihaga na hinua iami, ma ki vategamu na ramana.

¹⁴Ngaia ki vategamu na marapeha, ma ki hagangêgamu masu renigi na ngêra mora.

¹⁵Ngaia ki bonasia na maveta, ma na tamasinga iana ki hata ni voravora nga me.

¹⁶Ngaia ki hagarangisia na maveta, ki anumaga teha, ma ki tokorenigi mangagi na one na kârupu, i magarisi teha ngavê.

¹⁷Ngaia ki hagatorangenia na rangi na aisi, i manga na rarate. I asa ta na enoni, vige oga igê na anumaganiha.

¹⁸Ma ngaia ki tamasi, ma na aisi ki rono. Ngaia ki hagatorangenia me na roga, ma na ve ka gogogo.

¹⁹Ngaia ki hagagirarara na kariana renia na obaniha iana. Ngaia ki vatera na Isiraelita na hagesuringa ma na ramata iana.

²⁰Ngaia ki pe katogi na tarani ngegê tangara na enoni getera. Ngaira ka hitenigi na ramata iana. Hagarahasia na Araha!