Read Kahua KI 18 Bible Online

KI 18 - Kahua bible

KI 18

¹[១៥] Inê kê takuigo bâraha, Araha, suria go hagaramoniê, ma ko anumasiê.

²Na Araha ki na hagêguringa iaku, i manga na ruma nganganihaga ngavê. Na Araha ki na hagêguringa iaku. Inê kê gavagava vê i pasina. Ngaia ki na bêata iaku ma ki anumasiê; na ruma nganganihaga, gê tahitahi igê.

³Inê kê avarasia na Araha, ma ngaia ki hagatahiê tenira na merongaku. Ka visia raha na Araha!

⁴Inê kê haga ni tu igê na varo na mera. Inê kê manga na enoni na maganuha ki sugi ogo henia.

⁵Na mera ki haga ni toreê, ma kê aporo i na kiru.

⁶Na matena ga tarahuê na bagabevoani, inê kê avarasia na Araha: inê kê avarasia na God iaku.

⁷Ki nunu raha, ma ki angingi na maveta. Na hungani ka gisigisi ma ka maopa, suria God ki mangariaga ngavê.

⁸Na robona na gi ki hura me i barisuna, ma ka hura me i harana na bagavavatani raha na gi ma na hê karekare ni sivi.

⁹Ngaia ki tangahia na vavearo, ma ki so me igê na vaha na roto.

¹⁰Ngaia ki tage igê na marâ, i tonga na gagahana, ma ki gaha. Ngaia ki gaha me garigari renigi na gagahani na roga.

¹¹Ngaia ki aruha marena renia na roto hono. Na roto ni rangi ka rihia.

¹²Na rangi na hê ma na hê karekare ni sivi ka hura me tenia na marangea i maana, ma ka vota tenigi na roto ni rangi.

¹³Na Araha ki katoa na akurua i vavearo: na ringena na Araha God raramohaga hunia.

¹⁴Ngaia ki hanatenigi na mage, ma ki tokorenira na merongana. Ngaia ki hanasira renigi na marangea, ma ngaira ka gava sirasira.

¹⁵Na asi ki mamata tenigi na gatani na maveta. Suria igo, Araha, ko ramonira na merongamu, ma ko tamasi raha ni mangariaganiha tangara.

¹⁶Na Araha ki maroro so me ki tauê, ma ki okeê akê tenigi na rutuni.

¹⁷Ngaia ki hagatahiê tenia na raramohata na merongaku. Ngaia ki hagatahiê tenira na ani, ga ruhiê. Ngaira hato ka ramo tehariê.

¹⁸Matena gê pe ramo, ngaira ka tehariê, ma na Araha ki hagaramoniê.

¹⁹Ngaia ki tamaniê, kê tahitahi, suria i koro na obana reniê.

²⁰Na Araha ki vuriê igê na tarana ngekê, suria gê koro ma oto i maana. Ngaia ki korokoro tangê ma ki tamaniê, suria gê pe tanua ta na marâ, i era.

²¹Inê kê bani râ surigi me na ramata iana na Araha, ma kê pe murisigea na God iaku.

²²Inê kê marupegi tare na ramata hato iana, ma ki asa iaku, ve aharê igê.

²³Ngaia ki girara, vigê matarotaro i maana, ma kê pe tanua ta na marâ, i era.

²⁴Tahema na Araha ki vuriê, suria gê matarotaro, ma kê koro ma oto i maana.

²⁵Araha, igo ko toto surira na enoni, ga toto surigo. Igo ko korokoro tangara na ani, ga koro ma ka oto i maamu.

²⁶Igo ko takuira na enoni, ga matarotaro i maamu. Ma igo ko merongasira na ani, ga hagahagaparu.

²⁷Igo ko hagatahira na enoni, ga haritagi, ma ko hagamakira na ani, ga paroparo.

²⁸Igo, Araha, ko mavesia na obaku. Igo, God, ko mavesiê igê na roto.

²⁹Renia na hetamaniha iamu inê kê girara, gê teharira na rehagaro na mane ni me. Manga igo, God, ma ko tamaniê, inê kê girara, gê teharigi na raramohata na merongaku.

³⁰Na God ngekê ki koro teha igê na ara ni parongana hato. Na Araha ki hagamonarigi tare na suruha iana. Ngaia ki na bêata tangara na enoni hatohato, ga gavagava râ i pasina.

³¹Ngaia getea ma na Araha ngaia ki God. Ngaia getea ma God ngaia ki anumasigami.

³²Ngaia nga ki na God, i hagaramoniê, ma ki bêngeniê i tara.

³³Ngaia ki katoê, kê gaha rêrê manga na mage. Ngaia ki uruê igê na barani.

³⁴Ngaia ki hagesuriê renia na henahunahu, ma kê girara gê rohea na epage ni me.

³⁵Igo, Araha, ko anumasiê manga na bêata, ma ko hagatahiê. Na otomu ki tamaniê, ma na raramohamu ki hagaramoniê.

³⁶Igo ko hagabarasira na merongaku ga henahu rauê, ma inê kê pe ato bera.

³⁷Inê kê tavogenira na merongaku, ma kê henahuraura ngaira. Inê kê pe aporo me tenia na henahuita, mataro me kê nahuira ngavê.

³⁸Inê kê ahurara ka vota ka meme, ma kê purira so i ano.

³⁹Igo ko hagaramoniê tanga na henahuita, ma ko katoê, kê teharira na merongaku.

⁴⁰Igo ko katora na merongaku, ka gavagava teniê, ma ko nahuira ngavê na ani, ga ruhiê.

⁴¹Ngaira ka avaravara, ma ki asa, vige tahi. Ngaira ka avarasia na Araha, ma ngaia ki pe botage renira.

⁴²Inê kê nahu menamenarira, ka mangagi na momo, i toregi na roga. Inê kê purira so i ano, manga na makomako i tara.

⁴³Igo ko hagatahiê tenira na ani, ga urapusiê, ma ko katoê, kê marungira na enoni i maveta. Na enoni, gê pe bani girarara i nago, ka oga i ruguhaku i ngekê.

⁴⁴Na enoni mahuara ka maguteniê, ma ka bêtu tangê. Pusina ma ga girarê, ma ngaira ka tê viteaku.

⁴⁵Na enoni mahuara ka bagahagêguri, ka magu ma ka tata, ma ka hura me tenigi na ruma nganganihaga iata.

⁴⁶Na Araha ki mauri tare! Mu visia raha, suria i anumasiê tare. Mu kasia akê God raramohaga hunia, suria ngaia ki hagatahiê.

⁴⁷Ngaia ki katoê, kê teharira na merongaku, ma kê marungira na enoni hato i maveta.

⁴⁸Igo, Araha, ko hagatahiê tenira na merongaku, ma ko nakara i marungaku na enoni, ga urapusiê. Igo ko anumasiê tenira na enoni, ga oga sutaga.

⁴⁹Tahema, Araha, inê be kasigo akê i maata na enoni hato i maveta, ma be kirigo, be visigo raha.

⁵⁰God ki katoa, ki tehateha na ani, i bani kasia, ki maneraha urusina. Ngaia ki ama ni takuia tare nga na ani i bani atea. Ngaia ki takuira tare, ki bê ki arâ, o Tavite ma na raraha iana.