Read Kahua KI 19 Bible Online

KI 19 - Kahua bible

KI 19

¹[១៦] Na vavearo ki hagabângenigi mave na raramohana God ma na korohana. Na matava ka visigi mataha na marâ, God ki bani hagavoragi.

²Na tangiana ki hagarongoa ta na tangiana renigi. Na bungiani ki hagagirara nogana ta na bungiana.

³Ngaira ka pe tamasi renigi na tamasinge. Ngaira ka mangumanguaga ma.

⁴Henaka i manga i ngekana, ma na ringeta ka râhia na maveta hagenani. Ma na tamasinga iata ka rongo raha i na ara ni ariruguni na maveta. I haha i vavearo God ki bani naka na atohana na arito.

⁵Ngaia ki raboa i mavoraro ma ki togatoga manga na mane, i rêni tanga na hagataku. Ngaia ki manga na mane haoru, i mage ni tangotango ririhu.

⁶Ngaia ki akê ma ki aharêvoro, ma ki susu i kereso. Na bababana ki singira na ara ni marâ hato.

⁷Ga koro ngavê na ramata iana na Araha. Ngaira ka vatera na enoni na ramoha, ga mauri koro renigi. Na ramata iana na Araha ka na morani na ramata, ga hagamataharira na enoni, ga hite.

⁸Ka oto ngavê na ramata iana na Araha, ma ka hagakoro obata na enoni, ga marupegi. Ka matarotaro ngavê na ramata iana na Araha, ma ka mavesigi na obata na enoni.

⁹Na enoni ki ararira, viga hagahigasia na Araha, ma ka têtê viteana tare. Na suriha iana na Araha ka monari tare, ma ka oto igê na ara ni tarani.

¹⁰I arari, ga barigigi, teharia na golo. Ngaigi ki mamaki, teharigi na pirui matarotaro era.

¹¹Inê ki na kariamu, Araha. Na ramata iamu ka hagesuriê. Igo ko vuriê bâkoro, suria gê marupegi na ramata iamu.

¹²O ti ki girara i bâsigi na tasi iana marena? Araha, gu bonotenigi na tasi iaku, na ani gê hitenigi.

¹³Gu urapusiê nikâ tenigi na ani, gê giraragi vi na tasi. Siana ko hagamarumungenigi, ke aharêsiê. Vikana inê kê page matarotaro ngavê, ma kê page aharupa tenia na eraha na tasi.

¹⁴Gu aganarigi na tamasinga iaku ma na takotako iaku. Araha, igo ki na marungaku ma na hagamauri iaku.